Read Thangal Naga TITA 1 Bible Online

TITA 1 - Thangal Naga bible

TITA 1

¹Paul, Pasian sila leh Pasian mitelte ginna dungjui leh Pasian ngaihsakna bang a thutak theihna lam a Jesu Krist sawltak in,

²juautheilou Pasian in hun kipatma pek a achiamsa tangtawn hinna kinepna ah,

³hinanleh Pasian I hundampa uh thupiak dungjuia ka kiang a kepsak a om thu tangkoupih jiakin ahuntak ah athu pen suklat in a omta hi.

⁴Ginna munkhat lam thu a ka tapa Tita kiang ah: Pa Pasian leh Toupa Jesu Krist I hundampa uh kiang a kipan hehpihna, zahngaihna, tualeh hua khamuanna om hen.

⁵Hih jiakin ahi Krit tuikulh gam a ka hung nutsiat, sil bawl zohlouh a omte na bawlzohna ding leh, kung thupiak bang a khuachin a upate na guattheihna ding in:

⁶kuahileh demnabei, zi-khat nei, gin-omtak tatsiatna leh thuzohlouhna neilou tate nei ahihnak uleh.

⁷Ajiak saptuam lamkai pen Pasian dangka kemtu ahihjiak in demnabei ahih ngeingei ding ahi. Mi genhak lou, hehbaih lou, uain khamhat lou, mivuak-hat lou, dangka duh-am lou ahih ding ahi. [1]

⁸Hinanleh mi houpihdan siam, hoihnalam deih, lungsim dik, midiktat, misiangthou, mahni kithunun ahih ding ahi.

⁹Thugin diktak a nialkalhtute a hasottheihna ding leh a diklouhdan uh a theihsak theihna ding in. Amah kihilhna sa bang a thu pen a tukkip jing ding ahi.

¹⁰Ajiak pen mi thumanglou, thu genmawk mawkte, leh mikhemhatte tampi aom uhi; adiak in amauhte teptanlou lak a mi ahi uhi.

¹¹Huate kam pen humsak ding ahi, punna nin deihman in thu ahilhlouh ding uh ahilh ua, mi innkuan sung a tokbuai jel uhi.

¹²Amauh lak a khat, a Jawlnei uh khat in, “Krit gammite pen juau genjingte, gamsa giloute, thadah anhaite ahi uh,” chi`n agen hi.

¹³Hih theihpihna thu adik ahi. Tuajiakin ginna lam a ahung diktheihna ding un hahtak in taihilh in,

¹⁴Judate tangthu leh thutak nungheisante thupiak a ngaihsak louhna ding un.

¹⁵Misiangthou a dingin sil jousiah asiangthou hi, hinanleh mibuak leh gingloute a dingin bangmah asiang aom kei hi. A lungsim uleh a sialehpha theihna uh asianglou ahita hi.

¹⁶Pasian ka thei uh chi in aphuang ua, hinanleh a silbawl un anial uhi. Huat-huaite, thumangloute, tualeh silhoih bawl ding a chingloute ahi uhi.