Read Thangal Naga TITA 3 Bible Online

TITA 3 - Thangal Naga bible

TITA 3

¹Amauhte vaihawmtute leh thuneitute kiang a kituhlut ding in, thumang ding in, silhoih taphot bawl ding a kimansa a om ding in.

²Mi kuamah gensialou ding in, migi in, mi jousiah kiang a ki ngiamkhiatna ensak dingin hilhpha in.

³Ajiak eite ngei zong nidanglai in mimawte, thumangloute, khem a omte, utna leh nopna chituam tuam nabawlte, gilou leh thangsiajing a omte, kihdakhuaite tualeh khat leh khat kimudahte i nahi uhi.

⁴Hinanleh mihing tung a hundampa uh Pasian chitna leh itna ahung kilat nung in,

⁵diktatna eiten ibvawlte uh jiak hilou in, pianthakna silna leh Khasiangthou a siamthakkikna in leh a zahngaihna dungjuiin ahung hundamta hi.

⁶Hua Khasiangthou pen Jesu Krist i hundampa uh jiak in i tung uah kichingtak in ahung sungbuata hi,

⁷a hehpihna a siamtansak a om in, tangtawn kinepna dungjui in gouluahtute ding a siam in i omngei ding uhi.

⁸Kuapeuh Pasian gingtasate`n silhoih bawl ding ngaihtuah jing uhen chih thu pen agin-om ahi, tualeh hihthute pen khauhtak a na genjing ka deih hi. Hihte pen mihing dingin ahoih a tualeh aphatuam hi.

⁹Hinanleh dokna mot-huaite, khangthusutte, kinialnate leh danthu a kikalhnate pen ki heimangsan in, ajiak huate pen sil phatuamlou leh bangmahlou ahi.

¹⁰Gindan diklou neimi pen khatvei nihvei nahilhzoh nungin nial in,

¹¹huachibang mipen a lampial in a khial a, amah leh amah siamlouh kitangsak ahi chih nathei uhi.

¹²Artema hiam, Tikika hiam na kiang ua kungsawl chiangin Nikopoli khua ah ka kiang ah hungpai teitei sawm in, ajiak huamun ah phalbi sung om ka sawm hi.

¹³Jenas danthu thei leh Apollo a khualjinna ua bangmah a taksap louhna ding un, kintak in sawlkhia in.

¹⁴Tualeh eima mite zong gahloua a omlouhna ding un apoimohna kin a azak ding silhoih bawl kijilsak in.

¹⁵Ka kiang a omte jousiahin nang chibai a hungbuk hi. Ginna a ei hung itte chibai nabuk in. Na kiang uah hehpihna om hen. Amen. [2]