Read Thangal Naga HEBRAIMITE 10 Bible Online

HEBRAIMITE 10 - Thangal Naga bible

HEBRAIMITE 10

¹Danthu pen silhoih hung om dingte lim ahi a. Alim taktak ahihlouh jiakin kumsial a kithoihna alat jelte un ahung naihtute a bukimsak joukei hi.

²Atuachilou hileh, alat uh tawptalou ding uh maw, ajiak abiatute pen khatvei hihsiangthou a omte in khial kitheihna a neinawn kei ding uhi.

³Hinanleh hua kithoihnate ah kumteng in khialhnate kiphawk khiatna aom hi.

⁴Ajiak pen bawngtalte leh kelte sisan in khialhnate a lamangthei kei hi.

⁵Tuajiakin leitung a a hungpailai in aman: “Kithoihna leh sillat na deih kei a, hinanleh pumpi khat nung bawlsak hi;

⁶halmang sillatte leh khialhna sillatte ah, nang kipakna na neikei, achi hi.

⁷Tuachi`n ken, ‘Ngaiin, laibu jial ah keima thu gelh ahi, na deihlam bawl ding in kungpai hi, Pasian aw,’ ” ka chi hi.

⁸“Masang in kithoihna leh silpiak leh halmang sillatte leh khialhna kithoihna na deihkei a,” hua ah kipahna zong na neikei hi. Huate pen danthu bang a lat ahi, a chihtak in.

⁹Tuachi`n aman, “Ngaiin, na deihlam bawl ding in kungpai hi, Pasian aw,” achi hi. Anihna a tunding theihna dingin aman amasapen a lamangta hi.

¹⁰Hua deihna lam a Jesu Krist pumpi khatvei ngamden ding a lat jiakin hihsiangthou in i omta uhi.

¹¹Tualeh siampu tengin niteng a nna sem in, khialhnate lamang theilou kithoihna ngaimah lan jeljel in ading uhi.

¹²Hinanleh Krist in tangtawn a ding a khialhnate ding a kithoihna khat alat nungin, Pasian jiatlam ah a touta hi.

¹³Huanungsiah a melmate akeng ngakna a bawl ahih masiah uh a ngakjingta hi.

¹⁴Ajiak aman sillat khat in hih siangthousate pen tangtawn a dingin a hihbukimta hi.

¹⁵Thamlouin Khasiangthou in zong ikiang uah ahung theisak hi, ajiak aman,

¹⁶“Huanite nung chiang a, na kiang ua ka thukhun ding pen hih ahi, Toupa`n achi: a lungtangte uah ka dante ka koih ding a, tualeh alungsimte uah ka gelh ding hi,” chia a genkhit nung in.

¹⁷Tuachi`n aman, “A khialhnate uleh danlou bangtak a a gamtatnate uh ka theigige nawn kei ding hi,” achih behlap nalai hi.

¹⁸Tuachibang ngaihdamna omna phot ah, khialhna a dingin sillat aom nawn kei ding hi.

¹⁹Tuajiakin unaute, Jesu sisan jiak a mun siangthoupen a lutngamna nei in,

²⁰ei a ding a siangthou bik a ahung bawlsak lamthak leh hing ah puanjak (huapen a taksa chihna ahi) kantan in.

²¹Tualeh Pasian innkuanpihte tung a siampi ineih jiak in.

²²Sialehpha theihna hoihlou a pat i lungtang uh thehsiang a om in, i pumpite uh zong tuisiang a sil a om in, tualeh ginna theihchetna lungtang diktak tawh inaih ding uhi.

²³I kinepna thuphuan pen uh linglou kei in i tudet ding uhi, ajiak amah thuchiam hungpiatupa a gin-om hi.

²⁴Tualeh itna leh silhoih bawlna lam a kitokthou dingin khat leh khat i kingaihtuah ding uhi.

²⁵Khenkhatte omdan bang a i kikhopnate uh tawpsan louin, hinanleh khat leh khat kihasot tuah jawin, tualeh ni a hungnai semsem chih na muh mahbang un ki hasottuah sem un.

²⁶Ajiak pen thutak theihna ineih nung a utna neia ikhialh teitei uleh, khialhnate ding a kithoihna a om nawn kei hi.

²⁷Hinanleh vaihawmna lauhuai kichiantak lam etna banghiam leh doudaltute kangmang ding thangpaihna meiah a omjawta ding hi!

²⁸Kuapeuh Mosi dan deihloumite pen theihpihtu nih leh thum thu in zahngaihna beiin asijel uhi.

²⁹Pasian Tapa tuanden a, thukhun sisan amah suksiangthouna pen sil nadanmai a sim a, tualeh hehpihna kha thangpaisak pen! Hua sang a bangchituk a gawtna thupijaw ahia thuakleh kilawm a na ngaihtuah uh? [3]

³⁰Ajiak pen, “Phulak him him kei lak ding ahi, keiman ka thukding hi.” Toupa`n achi, chihleh, “Toupa`n amite vai ahawmsak ding,” chia gentu amah ithei uhi.

³¹Pasian hing khutsung a puk pen sil lauhuai mahmah ahi!

³²Hinanleh nidanglai a, hihvak a na omnung ua, thuakna haksatakte na thuaklai nite uh ngaihtuah kik un,

³³langkhat ah phawknate leh gimthuaknate thuak in na om ua, langkhat ah ahihleh huachibang a bawl a omte thuakpihtute na hung hi uhi.

³⁴Ajiak nou ka kolhbulhna ah nung lainat ua, van ah gou hoihjaw leh omjing ding na neih uh kitheiin, na van uh hung laksakte uzong kipaktak in na thuakjawta uhi.

³⁵Tuajiakin, nuamman thupitak muding a na kimuanna uh; paikhia mawng mawng kei un.

³⁶Bangjiakin ahia ichihleh, Pasian deihlam na bawlzoh ua, thuchiam pen na muhtheihna ding un, thuakzohna na poimoh uhi.

³⁷Ajiak pen “Tomkhat zoh chiang in, ahung paidingpa a hungpai ding; ajekai nawn kei ding hi.

³⁸Tuachi`n midiktat ginna in a hing ding a; hinanleh a nungtolh leh pen, ka kha in amah ah kipahna a neikei ding hi.”

³⁹Hinanleh eite pen mangthang ding a nungtolhte lak a mi i hikei ua, hinanleh hinna humbit ding a gingtate lak a mi i hijaw uhi.