Read Thangal Naga HEBRAIMITE 11 Bible Online

HEBRAIMITE 11 - Thangal Naga bible

HEBRAIMITE 11

¹Tualeh ginnna pen sil kinepnate theihchianna, sil muhlouhte aom a theihna ahi.

²Ajiakpen hihthu ah upate`n pahtat alawh uhi. [4]

³Ginna in leitungte pen Pasian thu a suktuah khawm ahi chih ithei a, tuachi`n sil kimute zong sil kilangte asiam ahikei hi.

⁴Ginna in Abel in Kaina sangin kithoihna hoihjaw Pasian kiangah alan hi. Huajiakin midiktat ahi chih theihsakna alawh a, Pasian in a silpiakte a theihpih a; huajiakin sikhin napi`n, thu agen nalai hi.

⁵Ginna jiakin Enok sihna mulou dingin lakmang in a om a; tualeh Pasian in a lakmang jiakin, muh in aom takei. Lakmanga a omma in Pasian a kipaksak hi chih theihsakna anei hi.

⁶Hinanleh ginna louin amah kipaksaktheih gual ahikei hi, ajiak kuahileh Pasian kiang a hungpai in amah aom chih leh, amah guntuhtak a zongmite kiang a nuamman piatu ahi chih agintat ding ahi.

⁷Ginna in Noah, sil muhnailouhte thu Pasian hilh a na om in. Pasian lauhdan siam in a gamtang a a innkuanpihte hutdamna dingin kuang abawl a. Huatawh leitung siamlouh a tangsakta a ginna jiak a om diktatna gou luahtu ahung hita hi.

⁸Ginna in Abraham in anung chiang a gou ahung tan ding mun a sap a aom laiin a thumang a; tualeh khoilam a pai ding chih zong theilouin, a paikhia hi.

⁹Ginna in gamchiam ah, mi gam a teng bangin ana tengjing a, thuchiam kibanga a gouluahpih ding Isak leh Jakob tawh, puan innte ah, ateng uhi.

¹⁰Ajiak aman suangphum dettak nei, Pasian lam leh bawl khuapi pen a ngakjing hi.

¹¹Ginna in Sarah in zong nau paitheihna anei a, achiamtu pen muanhuai a asehjiak in ateknung in ta anei hi.

¹²Tuajiakin asisa tawbang, mikhat a pat in, van a aksite bang a tam leh, tuipi piau a sehnel bang a simsenglouh ahung suakta hi.

¹³Hihte jousiah ginna neiin sil chiamte tanglou in asita uhi. Hinanleh gamlapi a pat galmuh in apomkip uhi. Leitung ah mikhual leh khualjin ihi uhi chih ana phuangta uhi.

¹⁴Ajiak hichibang thu genten gamtuam khat azong uh chih chiantakin aphuang uhi.

¹⁵Tualeh amau`n ahung pawtna uh gam lunggulh taktak le uh pen, kik kikna hunlemtang ana muta tham ding uhi.

¹⁶Hinanleh tuin, gam hoihjaw deih ana hi ua, huapen, van gam ahi. Huajiakin a Pasian uh Pasian chih a sap a jumnawnkei ua; ajiakpen amauh a dingin khuapi khat guatsa in akoih uhi.

¹⁷Ginna in Abraham, ze-et a aom in, Isak alan a, thuchiamte tangpa in a tapa tang neihsun alan hi.

¹⁸“Isak ah na suante akisam ding,” kichipa pen.

¹⁹Pasian in misi lak a pan in zong amah a kaithouthei hi chia ngaihsun in; hua a kipan in etsakna in amah a mukikta hi.

²⁰Ginna in Isak in sil hungtung dingte tawh kisai in Jakob leh Isau a gualjawl hi.

²¹Ginna in Jakob in, Joseph ta tegel a gualjawl a, tualeh a chiangkhut dawn a kingam in Pasian abia hi.

²²Ginna in Joseph in, a sihkuan in Israel tate pawtkhiat ding thu agen a, tualeh aguhte tungtang ah thu ahilh hi.

²³Ginna in Mosi apianlai in, naungek melhoihtak ahi chih amuhtak un khathum sung a nulehpa phual in a om a; kumpipa thupiak zong a laukei uhi.

²⁴Ginna in Mosi, ahung pichin nung in, Pharaoh tanu tapa chih a om a utkei a.

²⁵Tomkhat sung khialhna nopna mansang in Pasianmite tawh gimthuakna a teljawta hi.

²⁶Krist kisimmohna pen Izipt gam goute sang a thupijaw a ngaiin, ajiak a nuamman muh ding lam a enjaw hi.

²⁷Ginna in aman kumpipa thangpaihna laulouin Izipt gam anusia a, muhtheih louhpa pen muhtheih bang a ngaiin athuak paisuak hi.

²⁸Ginna in paikan kut leh sisan thehna a bawl a, tamasa thattu in amauh a khoihkhak louhna ding in.

²⁹Ginna in mauh leigaw a pai bangin tuipi san akan ua, Izipt gammite`n zong huabang in bawl a sawm ua, hinanleh tuilak ah atumta uhi.

³⁰Ginna in Jeriko kulhbang ni sagih avialh nung un achimta hi.

³¹Ginna in kijuaknu Rahab zong gingloumite tawh amangthang khawm kei hi, aman enkhiatute khamuangtak a ana jintun jiak in.

³²Tualeh bang ahia ka genbeh lai ding? Gideon thute, Barak thute, Samson thute, Jephthah thute, David thute, Samuel thute leh Jawlneite thu genning chileng hun in ahung daih kei ding hi.

³³Huate`n kumpi gamte ala ua, diktatna asemkhia ua, thuchiamte atang ua, humpinelkaite kam achihsak ua,

³⁴meikuang thahatna a hihmit ua, namsau hiam apel ua, hatlouhna a pan in hatsakin aom ua, kidouna ah a hangsan mahmah ua, agalte uh pangkhawm adelhjak uhi.

³⁵Numeite`n a misi uh thoukik amu uhi. Midangte zong gawt in aom ua, thohkikna hoihjaw a muhtheihna ding un, hutkhiatna a deihkei uhi.

³⁶Midangte`n nuihjat bawlna leh vuakna athuak nalai ua. Ahi, tualeh kolbulh leh thong a khum in aom uhi.

³⁷Suang a denlup in aom ua, sing-atna a attan in aom ua, khem in aom ua, namsau tawh satlup in aom ua, belam vunte leh kel vunte silhsak in a vakthap ua, gentheitak in, gimthuak in, bawlgentheih in aom uhi.

³⁸Huate a dingin leitung omna tak ahikei hi. Gamdaite ah, mualte ah, guamte ah, leikawhawmte ah avak kawikawi uhi.

³⁹Tualeh hihte jousiahin a ginna jiak un phatna na ngahkhin nanle uh, silchiam a tangkei uhi,

⁴⁰ajiak eite pangloua amah hihbukim a aomlouh na dingin, Pasian in eite a dingin sil hoihjaw khat ahung piata hi.