Read Thangal Naga HEBRAIMITE 13 Bible Online

HEBRAIMITE 13 - Thangal Naga bible

HEBRAIMITE 13

¹Unau ki itna omsak jing un.

²Mikhualte hoihbawl ding manghilh kei un, ajiak huachibang bawl in mi khenkhaten theiloupi`n vantungmite ana zintun uhi.

³Thong sung a kan a omte pen amauh tawh kankhawm a om bangin theijing un, tualeh gelgawtna thuakte, nou zong pumpi a om na hih jiak un theijing un.

⁴Mi jousiah lak ah kitenna zahbawl in om henla, tualeh lupna zong hihbuah louhin om hen; hinanleh nu leh pa kal a thangtatte leh angkawmte pen Pasian in vai a hawmsak ding hi.

⁵Na omdan uh deihgohna panglou in hihen, nasil neihsun uh tungah lungkim un; ajiak aman, “Bangmahchik in kung nusiangai kei ding a, tai zong kung taisan ngaikei ding hi,” achi hi.

⁶Tuachi`n hangsan takin, “Toupa pen a hung panpihtu ahi a; ka laukei ding hi. Mihing in bang ahung bawl thei dia?” ichi ngam uhi.

⁷Na tung ua thuneitute leh na kiang ua Pasian thu gentute theijing un; a omdan ua sil hung omkhiate ngaihtuah unla, a gindan uh jui un.

⁸Jesu Krist pen jani leh tuni leh tangtawn in a ngaingai ahi hi.

⁹Thugin tuamtuamte leh lamdangte puakmang in omkei un; ajiak pen lungtang hehpihna a hihkip tuh ahoih ahi, nek ding a hihkip ding ahikei, huachibang lungkhamten huate ah phattuamna a mutuan kei uhi.

¹⁰Biak buk nasemtute`n a nektheihlouh na uh maitam inei uhi.

¹¹Siampi in khialh thoihna ding a mun siangthoua a sisan a lutpihjel gan luangte ahihleh huan pualam ah a halmangjel uhi.

¹²Tuajiakin Jesu`n zong ama sisan tawh mite khialhna a hihsiangthou theihna dingin kulh kongkhak pualam ah a thuakta hi.

¹³Tuajiakin amah a simmohna uh pua in a kiangah huang pualam ah i paikhia ding uhi.

¹⁴Ajiak hihsan ah a omjing ding khuapi i neikei ua, hinanleh khuapi hung om ding pen izong uh ahijaw hi.

¹⁵Tuajiakin, ama vang in, pahtawina kithoihna pen Pasian kiangah tawplou in ilan ding uhi, huapen amin a i kipahna phuankhiatna muk gahte ahi.

¹⁶Hinanleh silhoih bawl leh silphal pen manghilh kei un, ajiakpen huachibang kithoihnate ah Pasian a kipak mahmah hi.

¹⁷Na tung ua thuneitute thu mang unla a thuthu un om un. Ajiak pen na tungtang thu uh gendingte bangin na kha uh a hungvensak uhi. Huapen lunggimtak a bawllou a kipaktak a a bawltheihna ding un. Lunggimtak a abawl uh nou a dingin a phatuamkei hi.

¹⁸Kou a dingin hung thumsak un; ajiakpen sil bangkim ah diktak a gamtat ut in, sialehpha theihna hoihtak ka nei uh chih ka thei hi.

¹⁹Hinanleh kintak a na kiang ua sawlkik a ka omtheihna dingin, hihpen abiktak in na kiang uah kung ngen hi.

²⁰Tuin khamuanna Pasian, i Toupa uh Jesu Krist misi lak a kipan a a kaithoupa, tangtawn a thukhun sisan jal a belampu thupitak in,

²¹Jesu Krist jal a a mitmuh a adeihlam taphot bawl ding in silhoih chinteng ah nou hung hihbukim hen, amah kiangah thupina tangtawn tangtawn in omta hen! Amen.

²²Tualeh unaute, hasotna thu ngaithei teitei dingin kung ngen hi, ajiakpen thu tomnoukhat in na kiang uah kung gelh hi.

²³I sanggampa uh Timothi khakkhiat in a omta chih na theita un; a hung paipaileh, amah tawh nou kung mu ding hi.

²⁴Nou hung lamkaihte jousiah leh misiangthoute jousiah chibai hung na buksak un. Itali gam a mite`n chibai ahung buk uhi.

²⁵Na kiang uah hehpihna om hen. Amen.