Read Thangal Naga HEBRAIMITE 2 Bible Online

HEBRAIMITE 2 - Thangal Naga bible

HEBRAIMITE 2

¹Tuajiakin i thujaksate uh i ngaipoimoh diak ding uhi, atuachih keileh i tolhmang sak khading uhi.

²Ajiak vantungmite zang a thu kigen bawn akip a, tatkhialhna leh thumanlouhna chinteng in a kituahpih nuamman diktattak amuh uleh,

³hichituk a thupi hundamna thu ngaihsaklou a i om leh bangchiin ahia i suahtak ding uh?

⁴Pasian in zong chiamtehnate, sillamdangte, lamdang tuamtuamte leh, Khasiangthou silpiakte in, ama deihdan dungjuiin amauh a theihpih hi.

⁵Ajiak aman a tanchin i gen uh, tunung chiang a hung om ding leitung pen, vantungmite nuaiah akoih kei a.

⁶Hinanleh mikhat in khoimun hiam ah: “Mihing bang ahi hiam hizahta a na ngaihsak; ahihkeileh mihing Tapa zong bang ahi hiam hizahta a na khuahtuah?

⁷Nang vantungmite sangin amahpen themkhat ngiamjaw in na siam a; thupina leh zahna na khusak a, na khut nasepte tungah na koihta hi,

⁸siljousiah a thuthu a om ding in akeng nuaiah na koihta hi,” chi`n ana theisakta hi. “Sil jousiah a thuthu a om ding a anuai a akoih jiakin”; anuai a akoihlouh bangmah a omkei hi. Hinanleh tu leh tuin sil jousiah anuai a kikoih in i munai tadih kei uhi.

⁹Hinanleh Jesu pen, Pasian hehpihna jiak a michih a ding a sihna a cheptheihna ding a, sihna a thuakna ding jiakin themkhat vantungmite sang a ngiamjaw a bawla om a, thupina leh zahna khuksak a om in i mujaw uhi.

¹⁰Ajiak amah a ding a sil jousiah om a amah jiak a bangkim ompa a dingin pen, ta tampite thupina a puilutna a, a hundamna uh bawltu pen gimthuaknate jiak a sukbukim ahih akilawm mawng ahi.

¹¹Ajiakpen hihsiangthoutu leh hihsiangthoute pen khat a pat ahi ua, huajiakin aman amauhte pen unaute chih ajumkei hi.

¹²Tuachi`n, “Ka unaute kiangah na min ka phuangkhia ding a; kikhawmte lak ah la sa in kung phat ding hi,” chi in.

¹³Tualeh, “Amah ah ka ginna ka koih ding a,” achi kik hi. Tualeh, “En un keileh Pasian hung piak naupangte,” achi kik hi.

¹⁴Tuachi`n, naupangte pen taksa leh sisan tangkhawm ahihjiak un, amahngei in zong huamah bang a hungtang hi, sihna jiak a sihna thuneitu, dawi, a sukmang theihna ding in,

¹⁵sih laujiak a adamsung teng uh saltang a om jousiahte a suahtatsak theihna ding in.

¹⁶Ajiak aman vantungmite panpihna a piakei a, hinanleh Abraham suante a panpih jaw hi.

¹⁷Tuajiakin mi a ding a khialhna thupha tawina ding a, Pasian lam silte a siampi mi khuatuahthei leh gin-omtak ahihtheihna dingin, sil jousiah a a unaute bangbang a bawl a ahung ompen amah a dingin apoimoh him ahi.

¹⁸Ajiak amahngei in zong khemna tuak a ana thuaktak jiakin, khemna thuakte apanpih thei hi.