Read Thangal Naga HEBRAIMITE 3 Bible Online

HEBRAIMITE 3 - Thangal Naga bible

HEBRAIMITE 3

¹Tuajiakin, unau siangthou, vanlam sapna tangte aw, i thugin uh sawltakte leh, siampi Krist Jesu ngaihtuah un.

²Pasian innsung mite jousiah lak a Mosi agin-om mahbang in, amahpen aguattu kiangah agin-om hi.

³Ajiak inn sang a alamtu pahtawia aom jawk bang ngeiin, amahpen Mosi sang a thupijaw a sim ahita hi.

⁴Ajiak inn jousiah mi kuahiam khat lam ahi a, hinanleh sil jousiah alamtu Pasian ahi.

⁵Tualeh Mosi pen khuanung a thu hung kigen dingte theihsakna dingin, Pasian innsung nasemte jousiah lak ah sila bangin agin-om taktak hi.

⁶Hinanleh, Krist pen, Tapa bangin ama innsung ngeiah agin-om ahi, a tawpdong a i hahkatna uleh i kinepna kipakna uh i tukdet phot uleh a innsung mite ihi uhi.

⁷Tuajiakin, Khasiangthou gen bang in, “Tunia a aw najak uleh,

⁸gamdai a ze-etni a ahih thangpaih bang un, na lungtang uh khauhsak kei un,

⁹hualaiin na pulehpate un ahung khem ua, ahung ze-et ua, tualeh kum sawmli sung ka silbawl a muta uhi.

¹⁰Tuajiakin, hua suante tungah ka hehta a, ‘tualeh amau`n a lungtang un a ngaihtuah khial gige ua, ka lampite zong a theikei uh,’ ka chi hi.

¹¹Tuachi`n ka thangpaihna in ka kichiam a: Ka tawldamna ah alutkei ding uh!” chi in.

¹²Pilvang un, unaute, atuachih keileh Pasian hing a pat paikhia dingin nalak ua mi khattou sungah gitlouhna, lungtang gilou ahung omkha ding hi.

¹³Hinanleh “Tuni,” akichih laiin nitengin khat leh khat ki hasottuah jaw un, atuachih keileh nalak ua mi kuahiam khat khialhna a khemna a hihkhauh in na omkha ding uhi.

¹⁴Ajiak i ginna kipatna uh a tawpdong a kiptak a i tukkip pouh uleh Krist tanpihtute i hita uhi.

¹⁵tualeh: “Tunia, a aw najak uleh, a hehsak lai uh bangin na lungtang uh khauhsak kei un,” chih ahihlai in.

¹⁶Ajiak khenkhat in ajak hang un a hihthangpai uh, ahita in zong Izipt gam a pat Mosi puikhiatte hilou ahi-uh maw le?

¹⁷Tuin kuate tungah ahia kum sawmli sung lungkim loua a om? Sil bawlkhialte, gamdaia aluang uh lumte tungah hilou amaw.

¹⁸Tualeh a gingtaloute kiang loungal kua kiangah ahia, “Tawldamna ah na lutkei ding uh,” chia a kichiamna?

¹⁹Tuachi`n gintatlouhna jiakin a lutthei takei uh chih imu uhi.