Read Thangal Naga HEBRAIMITE 4 Bible Online

HEBRAIMITE 4 - Thangal Naga bible

HEBRAIMITE 4

¹Tuajiakin, i lau ding uh, atuachih keileh a tawldamna a lutna ding thuchiam omjing napi`n nalak ua mi khattou chinglouin na omkha ding uhi.

²Ajiak amau kiang a gen ahih mahbang in; tangthupha pen i kiang a gen ahi a, hinanleh thu a jatute a ginna tawh akizoplouh jiakin, athujakte uh pen amau`n a phattuampih kei uhi.

³Ajiak ei a gingtasate pen hua tawldamna ah i lutta uhi, “Ka tawldamna ah a lutkei ding uh: ‘Ka thangpaihna a ka kichiam mahbang in!’ ” leitung siamchil a pat nnate siamzohsa hitamahleh, chia agen mahbang in.

⁴Ajiak aman munkhat ah nisagih ni thu hichibang in agen hi, “Tualeh Pasian in nisagih ni in a nasep jousiah a pat a tawldamta hi,” chi in.

⁵Tualeh hihmun ah, “Ka tawldamna ah a lutkei ding uh,” achi kik hi.

⁶Tuajiakin mi khenkhat tawldamna ah alut ding uh thuchiam a omnak lai jiakin leh, nidang a tangthupha gen masaknate a thumanlouh jiak ua alutlouh jiak un.

⁷Hun sawtpi nungin David ah, “Tuni” chi`n bangni ahiam khat a guatkik a: “Tunia, a aw najak uleh, na lungtangte uh khauhsak kei un.”

⁸Ajiak Joshua in amaute tawldamna na piakhinta hileh, tuanung in aman nidang thu agen kei ding hi.

⁹Tuajiakin Pasian mite a dingin tawldamna khat aom nalai hi.

¹⁰Ajiak Pasian in ama nasepte a khawlsan mahbang in ama tawldamna a lutte zong a nasepte uapat a khawlta uhi.

¹¹Tuajiakin hua tawldamna a lut ding in hahpan in i pang ding uhi, atuachih keileh mi khattou hua gintatlouhna etsakna bang a om in i puk kha ding hi.

¹²Ajiak Pasian thu pen ahing a, sil a bawlthei a, namsau hiamtuah sangin ahiamjaw a, hinna leh kha, tualeh guhtuah leh chintuiguh khenthei khop in asunthei a, lungtang a ngaihtuahnate leh tupte theikhentu ahi. [1]

¹³Tualeh silsiam khatzong ama mitmuh a kisel bangmah a omkei a, hinanleh akiang a i tanchin i tutna dingpa mitmuh in siljousiah guaktang leh kihongsa ahi.

¹⁴Tuachiin, vante a paisuak Siampi, thupitak Jesu, Pasian Tapa, ineih jiakin i thugin uh i pomkip ding uh ahi.

¹⁵Ajiak i hatlouhnate uh hung thuakpih khalou siampi i neikei a, hinanleh eimah bang a lamchinteng a khemna tuaksa, khialjong khiallou nei i hijaw uhi.

¹⁶Tuajiakin zahngaihna i tantheihna ding un leh taksap hun chiang a panpihna ding a hehpihna leh zahngaihna i muhtheihna ding un, hangsantak in hehpihna laltouna pen inaih ding uhi.