Read Thangal Naga HEBRAIMITE 6 Bible Online

HEBRAIMITE 6 - Thangal Naga bible

HEBRAIMITE 6

¹Tuajiakin Krist thubulte nusia in pichin lam i manoh ding uhi. Silbawl sisa a pan kisiknate, Pasian lam a ginnate;

²baptisma thuginte leh, khut ngakte leh misi thohkikna thu leh tangtawn vaihawmna thute.

³Tualeh Pasian in ahung phalsakleh hihte i bawl ding uhi!

⁴Ajiak khatvei hihvak a om a, vanlam silpiak chiamta a, Khasiangthou tansak a om a;

⁵tualeh Pasian thu hoih leh hun hungtung ding a sil bawltheihnate chiamkhinte pen,

⁶apuk ua ahihleh, kisik ding a siamthak gual ahikei uhi! Pasian Tapa amauh a ding a kilhlum kik leh sialphou ahihjiak un.

⁷Ajiak lei atung a ju guahtui na dawnjel in, amauh ding a lou na kikhawhte ding a, anteh louhing nektheih hung suah in Pasian a pat gualjawlna amu uhi.

⁸Hinanleh lingkungte leh loupa pak lingneite asuahkhiat leh pen, deihlouh in a om a, tualeh hamsialawh in a om a; atawpna pen meia hal ahi.

⁹Hinanleh ittakte aw, kou hichibang in gen mahle ung, noupen hih sang a hoihjaw leh hundamna tawh kithuah khawm silte nabawl uh kung gingta uhi.

¹⁰Ajiak amin a nna nasep uleh na itna uh na suklat uh, misiangthoute nna nasepsak ua, tualeh tua nna nasep jing uh pen manghilh dingin Pasian pen a diktatlou a hikei hi.

¹¹Tualeh noute kuapeuhin kinepna theihchianna kim muding in, atawp dong in taimachiat le uchin chih kung deih mahmah uhi.

¹²Ki thadahsak lou a, hinanleh ginna leh thuakzohna jiak a thuchiam gouluahtute omdan entonte na hih uh kung deih hi.

¹³Ajiak Pasian in Abraham kianga a thuchiam laiin, amah sanga lianjaw a a kichiam theihlouh jiakin, amah leh amah a kichiam a

¹⁴“Gualjawl zong kung gualjawl taktak ding a tualeh pung zong kung pungsak ding hi,” chi in.

¹⁵Tuachi`n aman dawhjoutak a athuak mualsuah nungin silchiam pen amuta hi.

¹⁶Ajiak mihingte pen, amau sang a lianjaw in a kichiam veu ua, tualeh thu namdetna ding a kichiamna pen amauh a dingin kinialna jousiah suktawpna ahi.

¹⁷Huachibang in, Pasian in thuchiam gou luahtu dingte kiangah ngaihtuahna kiptak a kikhekkik theihlouhdan nasatak a ensak nuam in, huapen kichiamna in a hihkipta hi.

¹⁸Huapen Pasian juauthei ahihlouhna, kikhekkik theilou sil nihte jiak a, eite kihumbitna ding a imai a kinepna kikoih pen tuding a taiten hasotna thupitak i neihna ding un ahi.

¹⁹Hih kinepna pen, hinna sikkip in inei a, chiantak leh kiptak tualeh puanjak sung a lut ahi.

²⁰Hua ah Jesu, Melkizedek omdan bang a tangtawn a siampulal a siam in, eite ding a ma kaiin ana lutta hi.