Read Thangal Naga HEBRAIMITE 9 Bible Online

HEBRAIMITE 9 - Thangal Naga bible

HEBRAIMITE 9

¹Tuachi`n thukhun masapen in zong Pasian nasepna dante leh hih leitung lak a mun siangthou a nanei taktak hi.

²Ajiak puanbuk a kibawl a, amasapen ahihleh, meivak koihna leh, dohkan leh, tanghou koihna mun siangthou akichite ahi.

³Tualeh puanjak nihna nungah mun siangthou pen kichi puanbuk aom hi.

⁴Huasan ah gimnamtui halna kham bawm leh thukhun singkuang leh, kham tuia luankhum asung a manna omna kham bel leh, Aaron chiangsel leh, thukhun suangpekte omna aom hi.

⁵Tualeh atung ah zahngaihna touna liah in thupina Cherubimte a om uh. Huate tungthu pen tuin akim sipsip in i genthei kei ding uhi.

⁶Tualeh hih silte hichibang a guatkholh ahih chiangin, siampute`n Pasian nna sem ding in puan inn masapen sungah alutjel uhi,

⁷hinanleh dannihna ah siampi guak, kumteng in khatvei, ama khialhna leh mipite khialhna a ding a alat ding sisan tawilou hilou in alutjel hi.

⁸Hih in ahihleh, puanbuk dantan masapen aom laisiah mun siangthou pen a lutna lampi a kilang nailou ahi, chih Khasiangthou in ahung theisak hi.

⁹Huapen tulai hun tehkakna ahi, huasan ah sialehpha theihna lam a abiatu hoih bukimsak theilou silpiakte leh kithoihnate alanjel uhi,

¹⁰huate pen nekte, dawnte, kisuksiangna tuamtuamte leh, taksalam dante guak ahi.

¹¹Hinanleh Krist pen silhoih hung om dingte siampi ding a hungpai in, puanbuk lianjaw leh bukimjaw khut a bawllouh, huapen, silsiam lak a ahikei chihna ahi.

¹²Kelte leh bawngnoute sisan a hilou in, hinanleh amah mah sisan ngeiin, eite a ding a tatkhiatna muin mun siangthou ah ngamden dingin khatveiin ana lutta hi.

¹³Ajiak bawngtalte leh kelte sisan leh bawngla vutvam mi nin tung a theh inbawn taksa asianthousak leh,

¹⁴Krist, tangtawn kha jiak a gensiat bei a Pasian kiang a kilan sisan in, Pasian hing nna sem ding in, silbawl sisa a pat in na sialehpha theihna uh bangzahta in a sianghthousak tazen diam!

¹⁵Tualeh hih jiakin amah pen thukhunthak palai ahi a, thukhun masa nuaia tatkhialhnate a pat a tatkhiatna ding a asihtak jiakin, sapten tangtawn a gouluah ding thuchiam pen a tangthei ding uhi.

¹⁶Ajiak pen thukhun omna peuh ah thukhungtu sihna zong a om ngeingei ding ahi,

¹⁷ajiak pen mihingte asih nungin thukhun in thu aneipan giap hi, a thukhungtu adamsung teng pen thu mawng mawng a neikei hi.

¹⁸Tuajiakin thukhun masa ngeizong sisan panglou in sukkip ahikei hi.

¹⁹Ajiak Mosi in danthu dungjuia kithuhilhna jousiah mi kiang a agenzoh in bawngnoute leh kelnoute sisan pen, tui tawh khausandup tawh, hussop tawh ala a, tualeh laibu leh mipite jousiah atheh a. [2]

²⁰“Hihpen Pasian in ahung piak thukhun sisan ahi,” chi in.

²¹Tuachimah bangin aman puanbuk leh nasepna kuang leh nou, vanzak jousiah sisan atheh hi.

²²Tualeh danthu in siljousiah sisan a hihsiangthou phial in a om a, sisan suahlou in ngaihdamna a omkei hi.

²³Tuajiakin vanlam a sil omte batpihte pen hihte a hihsiang a aom ding him ahi, hinanleh vanlam sil taktakte pen hihte sang a kithoihna hoihjawte a hihsiangthou a aom ding ahi.

²⁴Ajiak Krist pen a taktak etsakna, khut a bawl mun siangthou ah alut kei a, hinanleh tuin Pasian maiah eite tang a kilang dingin van ah a lutjawta hi.

²⁵Siampi kumteng a ama sisan hilou tawikawm a mun siangthou a alutjel bangin, amah pen amah leh mah kilan dingin a lutngaikei hi,

²⁶huachilou hileh leitung siamchil a pat tamvei a thuakkhinta ding hi. Hinanleh tu huntawp ah amah pen khialhna sukbeina ding a amah kilan tawm dingin khatvei ahung kilangta hi.

²⁷Tualeh mihing a dingin khatvei sih seh ahi a, hinanleh hihzoh chiangin vaihawmna a om ding.

²⁸Tuachimah bangin Krist zong, mi tampite khialhna puamang ding a khatvei lat in aom a. Amah kilawptak a na ngaktute kiangah khialhna panglou in hundamna mu dingin anihveina ahung kilang kik ding hi.