Read Thangal Naga JAKOB 2 Bible Online

JAKOB 2 - Thangal Naga bible

JAKOB 2

¹Ka unaute aw, i Toupa Jesu Krist, thupina Toupa gingta kawm in mi khentuam neikei un.

²Ajiak pen na kikhawpna uah kham khutsip bulh puanhoih silh hunglut henla, tualeh mijawng khat zong puannin silh in hunglut taleh,

³tualeh puanhoih silhpa na zahbawl ua a kiang ah, “Nang hih munhoih ah touin,” nachi ua, tualeh mijawngpa kiangah, “Nang huatak ah dingin, ahihkeileh, Ka keng koihna ah touin,” nachi uhi,

⁴nalak uah khentuam neia, tualeh ngaihtuahna gilou neia thukhentute na hih uh ensaktute hilou ding na hi uh maw.

⁵Ngaiun, ka unau ittakte aw, Pasian in hih leitung a mijawngte ginna a hausa ding leh amah itte achiam kumpi gam luah ding a atel hilou amaw?

⁶Hinanleh nou mijawngte na simmoh uhi. Mihausate`n nou a hung bawlgenthei ua! Vaihawmna ah ahung kailut kei uh maw?

⁷Amauhte`n na kisapna uh min zah-omtak a gensia kei uh maw?

⁸Laisiangthou dungjuia, “Nangmah na ki it mahbang in na innvengte it in,” chih kumpi dan na hihtangtun taktak uleh na bawlhoih uhi.

⁹Hinanleh khentuam na neih uleh pen, sil na hihkhial ua, tualeh dan in giloutu na hih uh ahung theisak hi.

¹⁰Ajiak pen mi kuapeuhin dan juikim henla hinanleh munkhat ah kipalpuk taleh aun a khial a sim in aom hi.

¹¹Ajiak pen, “Angkawm ken,” chipa`n, “Tualthat ken,” zong achi hi. Tuin angkawm kei nanle chin zong hinanleh tual nathahleh, dan bawtsiatu na hi veve hi.

¹²Tuajiakin zalenna dan a vaihawmsak a om dingte bangin thu gen unla sil bawl un.

¹³Ajiak pen zahngaihna neilou mi pen zahngaihna beia vaihawmsak in a om ding hi; zahngaihna in vaihawmna azou hi.

¹⁴Ka unaute aw, min ginna ka nei chi henla nasep neikei taleh, bang a phatuam diai? Huachibang ginna in a hundam theidiai leh?

¹⁵Sanggampa hiam sanggamnu hiam khat guaktang in om henla niteng nek ding tasam taleh.

¹⁶Tualeh nalak ua khat in, “Khamuangtak in om inla! Lumtak leh vahtak in om in!” chi henla hinanleh a pumpi ding a sil poimoh petuan keileh, bang a phatuam diai?

¹⁷Tuachimah bangin ginna ngeizong nasep panglou in asi ahi.

¹⁸Hinanleh mi khenkhat in, “Nang ginna na nei a ken nasep ka nei ahi, na ginna pen na nasep panglouin hung ensak inla, tualeh ken ka ginna ka nasep in kung ensak ding.”

¹⁹Pasian khat aom chih na gingta maw? Na bawlhoih hi! Dawite`n zong a gingta ua, a kiling hial uhi, achi thei hi.

²⁰Hinanleh aw mimaw! Nasep pangloua ginna asi ahi chih nathei nuam ei?

²¹I pu uh Abraham in a tapa Isak maitam tung a alat laiin silbawl jiak a siamtang hilou amaw le?

²²Ginna in a silbawlte tawh a semkhawm a, tualeh a silbawlte jiakin ginna pen a bukimta hi chih nathei hi.

²³Tualeh Laisiangthou in, “Abraham in Pasian agingta a, tualeh hihpen a diktatna a sim ahi chih a tangtung a,” tualeh amah pen Pasian lawm chia sap in aomta hi.

²⁴Tuachi`n ginna jiak guak hilouin nasep jiak in mi`n siam atang chih na mu uhi.

²⁵Tuachimah bangin, kijuaknu Rahab in zong enkhiatute ana jintun a lamtuam a asawlkhiat jiakin silbawl jiak a siamtang hilou ahi maw.

²⁶Kha omloua pumpi asi ahihmah bangin, ginna zong nasep panglouin asi ahi.