Read Thangal Naga JAKOB 3 Bible Online

JAKOB 3 - Thangal Naga bible

JAKOB 3

¹Ka unaute aw, mi tampi sia in hung pang kei un, sia in siamlouh tanna lianjaw tang ding ihi uh chih ithei ngal ua.

²Ajiak pen sil tampi ah iun un i gilou uhi. Mi kuapeuh thugen lam a agitlouh kei leh, hua mi pen piching ahi a, apumpi vengtheimi zong ahi.

³Ngaiun, ithu uh ajuih theihna ding un sakolte kam ah sikbah ibah ua, tualeh apumpi uh apum in i kaiheithei uhi.

⁴En un longpite zong: alian mahmah na ua huih hattak mutleng in aom ua, hinanleh ahektu in ahekna neunoukhat tawh autna lamlam ah akiheisak hi.

⁵Huachimah bangin lei zong pumpi hiang neunoukhat ahi a, nasatak in aki uangsak jel hi! En in meisi neunoukhat in gammang kang nasathei hina e!

⁶Tualeh leipen meikuang ahi. I pumpi lak ah khialhna lawmpi pen lei ahi; tuachi`n leiin pumpi aun in ahihnin a, hinkhua lampi pailehna pen akangsak a, tualeh amah pen gawtmun meidil in akang jel hi.

⁷Ajiak pen sa namkim, vasa namkim, gul namkim, tuipi-a ganhing namkim khawijual theih ahi a, mite`n a khawijual thei uhi.

⁸Hinanleh leipen kuaman a khawijual theikei uhi, gilou omkinken theilou sihna gu a dim ahi.

⁹Hua in Pasian leh Pa tuh iphat ua, tualeh huamah in Pasian batpih a siam mihingte i hamsiatjel uhi.

¹⁰Kamsung khat mah a kipanin phatna leh hamsiatna apawtkhia jel hi. Ka unaute aw, hih silte pen hichibang ding hilou ahi!

¹¹Tuisam khat in anak kibang in tuilim leh tuikha a pawtkhawm sak thei hiam?

¹²Ka unaute aw, theipi kungah, Olive agahthei ngai ei? Grep guiah zong theipi agahthei ngai ei? Tuachimah bangin chikhuk in zong tui-al leh tuitam a pawtkhiasak theikei hi.

¹³Na lak uah kua ahia pil a thu theithei om? Kingiamkhiat tak leh piltak in a silbawl hoihte omdan hoih in ensak hen.

¹⁴Hinanleh na lungtang ua thangsiatna nasatak leh mahni angkhualna na neih uleh, uangkei unla thudik juausan kei un.

¹⁵Huachibang pilna pen tunglam a kipan ahikei a, leitung leh, pumpi utna leh, dawia hung kipan ahi.

¹⁶Ajiak pen thangsiatna leh mahni angsung khualna omna taphot ah buaina leh khialhna chiteng aom nak hi.

¹⁷Hinanleh tunglam a hung kipan pilna pen amasapen in asiangthou phot a, tuazoh chiangin kilep a ut a, anunnem a, ahounuam a, khuatuahna leh gahhoih in adim a, khentuam aneikei a, alepchiah kei hi.

¹⁸Tualeh adiktatna gah pen kilepna bawlte a pat a kilepna ah ahi.