Read Thangal Naga JAKOB 4 Bible Online

JAKOB 4 - Thangal Naga bible

JAKOB 4

¹Na lak ua kidounate leh kihaunate, khoia kipan a hungpai ahia? Na pumpi hiangte ua kidoujing na taksa utnate ua kipan a hungpai hilou ahi maw?

²Na lunggulh ua na neituan kei uhi; tual nathat uhi. Na deihgoh ua na neijou tuankei uh; na kidou ua gal na bawl uhi. Hinanleh na ngetlouh jiak un, na nei kei uhi.

³Na ngen ua, na nget diklouh jiak un na neituan kei uh, na nopsakna ding ua nazak sawm jiak un.

⁴Nou angkawmpate leh angkawmnute! Leitung lawm hihna pen Pasian tawh kimelmakna ahi chih theilou na hi uh maw? Tuajiakin kuapeuh leitung lawm hih ut tuh Pasian melma in amah akisiam hi.

⁵“Kha eimah sung a tengin thangsiakhop in ahung deih hi,” chih Laisiangthou in amawk gen hiding a gingta na hi uh hiam?

⁶Hinanleh hehpihna tamsem ahung pia hi; tuajiakin Laisiangthou in, “Pasian in mi kisatheite a doudal a, hinanleh mi kingai-ngiamte kiangah hehpihna apia hi.”

⁷Tuajiakin Pasian kiangah kituhlut un. Dawi doudal un, tuachi`n ahung taimangsan ding hi.

⁸Pasian naih un, tuachi`n aman ahung naih ding hi. Mikhialte, na khutte uh silsiang un! Lungsim mumal neiloute, na lungtangte uh hihsiang un!

⁹Dah un, sun unla, kap un. Na nuihnate uh dahna suak henla, na nuamnate uh dahna suak hen!

¹⁰Pasian mitmuh in kingaingiam un, tuachi`n aman ahung tawisang ding hi.

¹¹Unaute aw, khat leh khat kigensia kei un, mi asanggam gensia tualeh asanggam vaihawmsak pen, dan gensia a dan vaihawm khum ahi; hinanleh dan na gensiat lehjaw, dan juitu na hikei a vaihawmtu na hita hi.

¹²Dan piatu khat aom a aman a hundam thei a a hihsiathei hi. Midang vaihawmsak nang, kua na hia?

¹³Tuin hungpai un, nou, “Tuni hiam jingchiang hiam in hua khuapi ah ipai ding ua huamun ah kumkhat i vatam ding a, lei in i vajuak ua ipung ding uh,” chitute.

¹⁴Ahiin, jingchiang a bang hung om ding chih na theikei uhi. Na hinna uh bang ahia? Tuimei tomnoukhat hung kilang a mangkikpai bang leltak ahi.

¹⁵Hua sang in, “Toupa`n pha asakleh i hing ding a, hih ahiam, hua ahiam i bawl ding,” na chi ding uhi.

¹⁶Hinanleh tuin, na kisaktheihnate uah nuam nasa uh; huachibang nopsakna jousiah pen khialhna ahi.

¹⁷Huajiakin, miin, silhoih bawl ding thei a bawl tuanlou pen, amah a dingin khialhna ahi.