Read Thangal Naga JAKOB 5 Bible Online

JAKOB 5 - Thangal Naga bible

JAKOB 5

¹Nou mihausate, tuin ngaiun! Na tung ua haksatna hungtung dingte jiakin kap unla kikou un.

²Na hauhsatnate uh asiagawpta a, napuante uh nget in anejouta hi.

³Na khamte uleh na daan dangkate uh a samek siangta hi, huate siatgawpna pen na khialhna uh theihsakna ahi ding a, na taksa uh pen meikak bangin anejou ding hi. Hun nunung lam a dingin gou na kholta uhi.

⁴Ngaiun! Na lou ua buh at kilawhte thaman, amauh khem a na piaklouh uh. Akikou ua! Tualeh a attute kikou aw pen mipite Pasian bil ah alutta hi.

⁵Leitung ah kipaktak leh nuamsatak in na teng ua; gohni a ding bang in na lungtangte uh na thausak uhi.

⁶Midik siamlouh na tangsak ua na thatta uh, tualeh amau`n ahung doudal kei uhi.

⁷Tuajiakin, unaute aw, Toupa hungpai mateng dohjoutak in om un, ngaiun, louneimi in leigah manphatak a ngak a guah masa leh guah nunung amuh masiah dohjoutak in a ngak hi.

⁸Nou zong dohjoutak in om un. Na lungtang uh hihkip un, ajiak Toupa hung painang anaita hi.

⁹Unaute aw, khat leh khat kiphunsan kei un, siamlouh tansak in na om khading uhi. Ngaiun vaihawmtu kongkhakbul ah aom hi.

¹⁰Ka unaute aw, Toupa min a thugente pen gimthuakna leh dohzohna lam a etton dingin zang un.

¹¹Ngaiun, a thuaktute pen ahampha in isep uhi. Job thuaktheih dan naja ua, Toupa`n atawp a abawl dan, Toupa pen zahngaihna leh lainatna a dim ahih zong na mu uhi.

¹²Hinanleh ka unaute aw, sil jousiah sang a athupi pen ahihleh, kichiam kei un, van louin hiam, lei louin hiam, kichiamna dang mawng mawngin kichiam kei un, “Hi” nachih uh hi, “Hilou” nachih uh hilou hisakjaw un, atuachih keileh vaihawmsak in na om kha ding uhi.

¹³Na lak uah haksatna thuak aom hiam? Thum hen. Kipak aom hiam? Phatnala sa hen.

¹⁴Na lak uah damlou aom hiam? Saptuam upate sam henla amau`n Toupa min a sathau nuh in thum uhen.

¹⁵Tualeh ginna a thumna in damlou pen ahundam ding a, Toupa`n amah a kaithou ding hi; tualeh khialhna a bawlleh huate pen ngaihdamsak ahi ding hi.

¹⁶Sukdam a na omtheihna ding un, na khialhnate uh thupha ki tawituah unla, khat leh khat ki thumsak un. Midiktat thumna pen a phatuam mahmah hi.

¹⁷Elijah pen eimah bang mihing ahi a, aman guah juklouhna dingin lungluttak in athum a, tualeh kumthum leh khaguk leitungah guah julouin a omta hi.

¹⁸Tualeh athumkik a, van in guah ajusak a leiin agahte ahung piangsakta hi.

¹⁹Unaute aw, nalak ua mi kuapeuh thutak a kipat namangta henla mikhat in puikik taleh,

²⁰amah mikhial a lammanna a kipan kiheisaktu in sihna a pat kha khat ahundam ding a, khialhna tampite a khuhmang ding ahi chih kithei hen.