Read Thangal Naga 1 PETER 1 Bible Online

1 PETER 1 - Thangal Naga bible

1 PETER 1

¹Peter, Jesu Krist sawltak in, Pontas gamte, Galatia gamte, Kappadosia gamte, Asia gamte, leh Bithinia gamte, a Pasian thu a khualjin a kikhenjakte kiangah.

²Thumang ding leh Jesu Krist sisan thehding a kha hihsiangthou jal a Pa Pasian theihkholhna dungjuia telte kiangah. Hehpihna leh khamuanna na kiang uah sukpungin omta hen.

³Misi lak a kipan a Jesu Krist thohkikna jiak a a khuatuahna thupitak dungjuia kinepna hing tang ding eite hung suangkhia kikpa, Pasian leh i Toupa uh Jesu Krist Pa pen phat in om hen!

⁴Goutan setheilou, tualeh nin banglou, tualeh tultheilou, van a nou a ding a khamsa muding in,

⁵hun nunung chiang a kilang ding hundamna muding a ginna jal a Pasian silbawl theihna a kep na hi uhi.

⁶Hua ah hahpak in na kipak ua, hilehzong tuin apoimohleh engbawlna tuamtuam in lungkham tadih mahle uchin zong,

⁷na ginna diktak uh etkhiatna pen kham meia etkhiat ahihnung a mangthang jel sang a manphajaw, Jesu Krist hung kilakni chiang a pahtawina leh zahbawlna leh thupina a muh a aom theihna ding in.

⁸Mungailoupi in, amah na it ua, tuin amah mukei nanle uchin zong, na gingta ua. Kipahna genguallouh leh thupina a dim in na kipak uhi,

⁹na ginna uh atawpna, nakha uh hundamna pen mu in.

¹⁰Hih hundamna thu pen, na kiang ua hundamna hung tung ding thu nagenkholh Jawlneite`n akan ua, pilvang tak in asuikhia uhi.

¹¹Krist thuakna leh anung a hung jui ding thupina ana matheihsak laiun, Krist Kha amauh sung a om in bangchik hunin ahia, ahihkeileh bangchi bang hun in ahia atheihsak chih zonkhiat tum in.

¹²Van a kipan a Khasiangthou hung kisawlkhia panpih a na kiang ua tangthupha gentute`n amauh a ding guak hilouin hinanleh eite dingin, hua na kiang ua thu kigensawnte nna asem uh chih na kiang uah suklat in a om hi. Hua silte pen vantungmite`n zong et a ut uh hi.

¹³Tuajiakin na lungsim kawng uh gak unla; pilvang un; Jesu Krist hung kilak chiang a hehpihna nou ahung puakding pen atawp dong in lam-en un.

¹⁴Thumangtakte bangin, na theihlouh lai ua na nidanglai utnate uh bang a omlou in.

¹⁵Hinanleh nou hung sampa a siangthou bangin nou zong na gamtatdan jousiah uah siangthou un;

¹⁶Ajiak pen, “Siangthou un, ajiak kei kasiangthou hi,” chih gelh ahi.

¹⁷Tualeh deihsaktuam neilou a michih a nasep dungjuia vaihawmsaktu pen Pa chia sam nahih uleh, hihsan a na vaihawmlai hun uh lauhdan siam in zang un.

¹⁸Na pu leh pate uapat tawndan a na muh uh na omdan uh bangmah hilou a pat sil sethei daan dangka leh kham a tat na hikei ua;

¹⁹hinanleh Belamnou demnabei leh nin banglou sisan bang a Krist sisan manpha a tat na hijaw uh chih nathei uhi.

²⁰Amah pen leitung kisiamma pek in guatkholh in aom taktak ngeingut a, hinanleh hih hun nunungte ah nou a dingin suklat in a omta hi.

²¹Amah jiakin misilak a kaithoupa leh thupina piapa Pasian na gingta uhi.

²²Unaute tung a itna dailou nei ding khop a Kha jiak a thutak juia na kha uh na hihsiangthou tak jiak un, it petmah in lungtang siangthouin khat leh khat ki ittuah un.

²³Khaichitang setheilak ah hilouin, hinanleh setheilou Pasian thu tangtawn a hing jing leh omjing lak a piangthak na hijaw uhi.

²⁴Ajiak pen, “Taksa jousiah hampa bang ahi a, tualeh mihing thupina zong hampapak bang ahi. Hampa pen avul a, apak zong apulh hi,

²⁵hinanleh Toupa thu pen tangtawn in a omjing hi.” Tualeh hihpen na kiang ua tangthupha manga thu kigenpen ahi hi.