Read Thangal Naga 1 PETER 4 Bible Online

1 PETER 4 - Thangal Naga bible

1 PETER 4

¹Tuajiakin eite a ding a Jesu Krist in taksa a hung thuaksakta ahihman in, nou zong huachibang lungsim in kithuam un; ajiak pen kuapeuh taksa a thuaksa in khialhna a tawpsanta hi.

²Ahun omlaiteng taksa a mihing utnalam bang a hing taloua hinanleh Pasian deihdan a a hinjawkna ding in.

³Ajiak huknate, sa utnate, uain hainate, uainmun nopnate, ankuang luinate, tualeh milim biakna kihdakhuaite a i omlaia Jentelte deihlambawlna i tu-masang hinkhuate uh ahunta hi.

⁴Huasan ah amauh nopbawl luatna banga na bawllouh uh lamdang asa ua, nou ahung gensiajel uhi.

⁵Huate`n mihing leh misite vaihawm ding a mansa a ompa kiangah a tanchin uh agen ding uhi.

⁶Taksa a om mihingte bang a vaihawmsak a aom ua, kha a Pasian bang a a hintheihna ding un, hihjiakin akiang uah tangthupha gen in aom hi.

⁷Hinanleh siljousiah tawpna ding pen anaita hi, huajiakin lungsim diktak pua unla thum kawm in pilvang un.

⁸Tualeh sil bangkim tungah, khat leh khat ngainatak in ki ittuah chiat un, ajiak ki it tuahna in khialhna tampi akhuhkhum hi.

⁹Phunchiak louin khat leh khat ki jintun tuah chiat un.

¹⁰Michih in silpiak na muh bangjel un Pasian hehpihna kemtu hoihtakte bangin, huate in nna kisepsak tuahchiat un.

¹¹Kuapeuhin thu agen leh Pasian kam a thupawt bangin gen hen; mi kuapeuhin thu nna asepleh Pasian in hatna a piak bangjel in sem hen, Jesu Krist jal a Pasian pen sil bangkim a pahtawi a a omtheihna ding in. Amah kiangah tangtawn tangtawn in pahtawina leh lalna omta hen. Amen.

¹²Ittakte aw, nou ze-et ding a na tung ua ze-etna hungtung pen sillamdang bang ahia hungtung bangin ngaihtuah kei un.

¹³Hinanleh Krist thuaknate kikoppih na hihjiak un kipak un, tuachi`n athupina ahung kilat chiangin nou zong nakpitak a nuam in na kipak ding uhi.

¹⁴Krist min jiak a phawk na hih uleh, na hampha uhi, ajiakpen thupina kha leh Pasian kha natung uah aom hi. Amauh lam thu ah amauh pen gensiat ahi a, hinanleh noulam thu ah pahtawiin aom hi.

¹⁵Hinanleh nalak ua kuamah in tualthat bangin hiam, guta bangin hiam, silgilou bawl bangin hiam ahihkeileh midangte silbawl gensiami ahihjiak in hiam thuakkei hen.

¹⁶Ahihhang in mi kuapeuhin Kristian ahihjiak a athuakleh, jumkei hen, hinanleh hih tungtang jiakin Pasian pahtawijaw hen.

¹⁷Ajiak Pasian innkuante lak ah vaihawmna pat hun a hungtungta hi; tualeh eite a pat ahihleh Pasian tangthupha gingtaloute bang ahita diai le?

¹⁸Tualeh, “Midiktat bawn hundam ahih hamham leh; mikhialte khoiah akilang tading ua le?”

¹⁹Tuajiakin, kuapeuh Pasian lemsak dungjuia thuakten silhoih bawl in akha uh siamtu gin-omtak kiang a bangin a kiang ah kemsak hen.