Read Thangal Naga 1 PETER 5 Bible Online

1 PETER 5 - Thangal Naga bible

1 PETER 5

¹Na lak ua upate pen kei na upa hihpih uleh Krist thuakna theihpihtu leh, thupina hung kilang ding zong tanpihtu in, kung hasot hi

²nalak ua Pasian belam pawl omte vak un, alou theilou ahihjiak hilou in, utthu jaw in, metna nin deihjiak hilou in, lungsim a deih taktak jaw in.

³Pasian goutante tung a kithuneisak louin, hinanleh pawlte etton hiding in.

⁴Tualeh belampu lianpen ahungkilat chiangin thupina lallukhu tultheilou na muding uhi.

⁵Tuachimah bangin, nou khanglaite upate nuaiah kituhlut un. Ahi, na un un khat leh khat kithuman tuah chiat unla, kingiamkhiatna in kithuam un, ajiak “Pasian in mi kiliansakte adou a, hinanleh mi kingiamkhiatte hehpihna apia hi.”

⁶Tuajiakin ahuntak a nou ahung pahtawi theihna dingin, Pasian khut hattak nuaiah kingiamkhiat un.

⁷Aman ahung ngaihsak jing jiakin na lungkhamna jousiah uh a tungah nga un.

⁸Pilvang unla, kiveng gige in om un. Ajiak na melmapa uh Dawimangpa humpinelkai humham bangin, nek ding zongin avak kawikawi hi.

⁹Na sanggamte uh leitung a omte tungah huachibang gimthuaknate atung hi chih theiin, amah pen ginna kiptak a om in, dou un.

¹⁰Hinanleh Krist Jesu mang a tangtawn thupina ding a eite hungsampa, hehpihna Pasian, tomkhat sung nathuak nung un nou ahung hoih bukimsak in, ahung hihkip in, ahung hihhat in, ahung omdetsak ding hi.

¹¹Amah kiangah tangtawn tangtawn in pahtawina leh lalna omta hen. Amen.

¹²Sanggampa gin-omtak a ka theih Sila khut in nou hasotna leh, huapen Pasian hehpihna diktak idinna uh ahi chih theisak kawm in na kiang uah tomkimtak in kung gelh ahi.

¹³Nou tawh telkhawm, Babilon aom saptuamte`n, chibai ahung buk uhi; tuachimah bangin ka tapa Marka in zong ahung buk hi.

¹⁴Itna a kitawp in khat leh khat chibai kibuk un. Krist ah aom noute jousiah kiangah khamuanna om hen. Amen.