Read Thangal Naga 2 PETER 2 Bible Online

2 PETER 2 - Thangal Naga bible

2 PETER 2

¹Hinanleh mi lak ah Jawlnei takloute zong ana om ua, tuachimah bangin nalak uah sia takloute zong ahung om ding uh a, amauhte`n amauhte leipa Toupa hilhial kitheihmoh bawl in mi hihsiathei gindan diklou aguk in ahung pualut ding uhi. Amauhte tungah thakhat in siatna atungsak ding uhi.

²Tualeh mi tampite`n, siatna lampi ahung jui ding ua, amauh jiakin lamdik pen gensiat ahi ding hi.

³Tualeh deihgoh mahmah nate jiakin juauthu in amauh punna dingin ahung zang ding uhi. Nidanglai a na tung ua a vaihawmna akhawl kei ding a, tualeh asiatna uh zong akhawl kei ding hi!

⁴Ajiak vantungmiten sil ahihkhial laiun Pasian in akhawi keia, hinanleh gawtmun ah apaia vaihawmsak a om ding in mialna khaute in akanjaw hi.

⁵Tualeh amah ngaihsaklou leitung tungah tuichim tungsak in, nidanglai leitung a khawikei a, hinanleh diktatna thugenpa, Noah, midang sagih tawh a hundamta hi.

⁶Sodom leh Gomorrah khuapite pen vut a suaksak a siatna tang ding in a mohpaih a Pasian ngaihsaklou hung om dingte etsakna dingin abawlta hi.

⁷Tualeh migiloute omdan thanghuaite thuakgimsak a om Lot midik pen, a hunkhiata hi.

⁸Hua midikpa pen, akiang ua a omlai in, amit in amu a, abil in aja a, danlou bangtak a a silbawlte un a lungsim diktat pen ahihna mahmah hi.

⁹Tuachi`n Toupa`n amah ngaihsak mite pen khemna a pat hutkhiatdan athei a, tualeh midiktatloute pen vaihawmni chiang a dingin gawt kawmkawm a sitdan athei hi,

¹⁰tualeh abik in utna thanghuai lam a sa dan bang a om leh, vaihawmna simmohte ahi uhi. Mot hansan leh genhak ahi ua, thupina ngahte agensiat unzong a laukei uhi.

¹¹Vantungmi hat leh silbawltheiten bawn Toupa maiah a tungthu uh gensak in a gensia-ngam kei uhi.

¹²Hinanleh, hih ganhing gilou, ngaihtuahna neilou mat a hihmang dingte bang a a theihsiamlouh uh silte agensia ua. Tuachi`n amauh siatna ah a beimang siang ding uhi,

¹³tualeh sunlaia ankuang lui buaia nuamsa mi ahihjiak un diktatlouhna man amu ding uhi. Na kiang a ankuang alui un thanghuaina gensiatna ahi uhi!

¹⁴Angkawmna mit a dim, khialhna tawpsan theihlouhte anei uhi. Mi kiploute a khempuk ua, enhatna lungsim apua ua, hamsiathuak tate ahi uhi!

¹⁵Lamdik ataisan ua a vakmang ua, diktatlouhna thaman ngainapa Beor tapa Balaam lampi ajuita uhi

¹⁶hinanleh amah pen agitlouh jiakin taihilh in aom a; sabiltung hamtheilou mi ham a ahung ham in Jawlnei motna a khamta hi.

¹⁷Huate pen tuikul tui omlou, huih mutleng kawikawi meilum bang ahi uhi; amau a dingin mialna thuk penpen tangtawn a sit ahi.

¹⁸Ajiak pen thuginalou chiakjen a gen in, gilou a omte a pat a suaktajoute pen taksa utna ah hukna in akhempuk nak uhi.

¹⁹Amauh siatna sila hihpum in, mite suahtatna thu achiam jel uhi; mi zoh a a omna huamah in amauh sila in asiamjel uhi.

²⁰Ajiak pen, Toupa leh hundampa Jesu Krist theihna jiak a leitung thanghuainate a nutsiatsan nung ua, huamah a ata`nkik ua zoh a aom uleh, amau a dingin aomdan nunung uh pen apatna sangin asiajaw hi.

²¹Ajiak diktatna lampi theihnung a, thupiak siangthou akiang ua kepsak a om pen nungngatsan sang in, diktatna lampi theilou ana hile uh amauh dingin ahoihjaw ding hi.

²²Ajiak pen, “Ui ama luakmah ah a kikkik a,” tualeh, “Vokpi kisilsiangsa buannawi a kisil ding a kik,” chih thupil diktak mah bangin amauh tungah ahung omta hi.