Read Thangal Naga 2 PETER 3 Bible Online

2 PETER 3 - Thangal Naga bible

2 PETER 3

¹Ittakte aw, tua, na kiang ua ka gelh, hih laikhak nihna ahi; hua tegel ah theihkhiatthak kikna in na lungsim siangtak uh ka tokthou hi.

²Jawlnei siangthoute`n ana genmasak uh thute, tualeh kou Toupa leh hundampa sawltakte thupiak ngaihsak jing a na omna ding un.

³Hih thei masa un, ni nunung lam ah simmoh hatte, amauh utna bang a gamta ahung om ding ua

⁴tualeh, “A hung paikik nang thuchiam khoiah ahia aom? Sil siamchil a kipat sil bangkim pilehpute ihmutnia kipat aom ngaingai bangin aomjel!” achi ding uhi.

⁵Ajiak hihte a kitheimoh bawl jel uhi, Pasian thu in nidanglai in vante ahung om a leizong tuilak a pat leh tuilak ah ana om hi,

⁶hua-ah hualaia leitung ompen tuiin atum a amangta hi.

⁷Hinanleh tu-a om vante leh lei pen hua thu jiak mah in Pasian ngaihsaklou mite vaihawmna leh manthatna ni a ding a koihhoih in, meia gawt ding a kholkhawm in a omta hi.

⁸Hinanleh ittakte aw, hih silkhat manghilh kei un, Toupa ngaih in nikhat pen kum sangkhat bang ahi a, tualeh kum sangkhat zong nikhat bang ahi.

⁹Mi khenkhatte`n jekai asak bang un Toupa pen a thuchiam lam ah a jekai kei hi, hinanleh kuamah manthat deihlou a, mi jousiah kisik ding deih in, eimah lam ah a dawhjou ahijaw hi.

¹⁰Hinanleh Toupa ni pen jan a guta bangin a hungtung ding hi, huani chiangin vante pen ngaihtak a ging in amang ding a, tualeh silbulte pen meisa a haitui ahi ding a, leizong asung a nasem omte tawh halmang in aom ding hi.

¹¹Tuajiakin hih silte jousiah pen beimang ding ahihjiak in, omdan siangthou leh Pasian ngaihsakna lam ah mi bang chibang hiding nahi ua le,

¹²Pasianni hungtung ding kinem leh kilawp in, huani in vante pen hung kang in amang ding a, tualeh silbulte zong meisa a haituiin a omta ding hi.

¹³Hitalehzong en, a thuchiam dungjuiin, asung a diktatna omna, vanthak leh leithak i kineppih ahi.

¹⁴Tuajiakin, ittakte aw, hih silte lam-en in, nin banglou leh dembei a, khamuang tak a ana om a muh na hihtheihna ding un kuhkal un.

¹⁵Tualeh i Toupa dohzohna pen hundamna in sim un. I sanggampa ittak Paul in akiang a piak pilna dungjuia na kiang ua agelh bang in.

¹⁶A laikhakte jousiah ah hih silte tungtang agenphial hi. Hua ah thu theihsiam haksate aom a, huate pen mi pillou leh mi kiploute`n Laisiangthou mundang alakkhial bang un lakhial in amauh siatna dingin azang nak uhi.

¹⁷Tuajiakin nou, ittakte aw, nou hua thute na theihkholh jiak un pilvang un, atuachih keileh migiloute khialhna puimang a om in na kipna ua pan in napuk kha ding uhi.

¹⁸Hinanleh i Toupa leh hundampa Jesu Krist hehpihna leh theihna ah hung khanglian un. Amah kiangah tu leh tangtawn in thupina omta hen! Amen.