Read Thangal Naga 1 JOHAN 4 Bible Online

1 JOHAN 4 - Thangal Naga bible

1 JOHAN 4

¹Ittakte aw, kha jousiah gingta kei un, hinanleh khate pen Pasian a pan ahihleh hihlouh enchianjaw un; ajiak pen Jawlnei taklou leitung ah tampi a pawtkhiata hi.

²Hihmi-ah Pasian kha nathei ding uhi: Jesu Krist taksa ngeiin a hungpai chih na phuangkhia taphot Pasian a pan ahi.

³Tualeh Jesu Krist taksa ngeiin a hungpai chih na phuangkhialou kha taphot Pasian a kipan ahikei hi. Hihpen Krist doudalpa kha, hungpai ding ahi chih na jak uh pen ahi; tuin zong leitung ah a omkhinta hi.

⁴Tanoute aw, noupen Pasian a kipan na hi ua, huate na jouta uhi; ajiak amah nou a ompa pen leitung a ompa sangin alianjaw hi.

⁵Amauh pen leitung a kipan ahi ua; tuajiakin leitung sil thute agen uhi, tualeh leitung in athu uh a ngaikhiajel hi.

⁶Eipen Pasian a kipan ihi uhi. Kuahileh Pasian thei taphot in i thu a ngaikhiajel a, kuahileh Pasian a kipan hilouin i thu a ngaikhia kei hi. Hih a pat in kha dik leh diklou ithei uhi.

⁷Ittakte aw, khat leh khat iki ittuah ding uh ahi, ajiak itna Pasian a kipan ahi; tualeh michih itna nei taphot Pasian a piang ahi a Pasian athei hi.

⁸Itna neilou mi in Pasian a theikei hi, ajiak pen Pasian itna ahi.

⁹Hihmi-ah Pasian in eite ahung itna a kilangta: amah jal a ihintheihna ding a Pasian in a Tapa tangkhat neihsun leitung a ahung sawl jiak in.

¹⁰Hih ah itna a om, Pasian i it chih ahikei a, hinanleh aman eite ahung it a, i khialhnate thupha tawina dingin a Tapa ahung sawl chih ahijaw hi.

¹¹Ittakte aw, Pasian in hichituk a ahung itleh, ei zong khat leh khat iki ittuah ding uh ahi.

¹²Kuaman Pasian a mungaikei hi; eite khat leh khat iki ittuahleh, Pasian eiah a omjing a, a itna zong eimah ah abukim hi.

¹³Aman a kha a hungpiak tak jiakin hihmi-ah eite amah ah i om a, amah ei ah a om chih ithei uhi.

¹⁴Tualeh Pa in Tapa pen leitung hundampa dingin asawl chih imuta ua, tualeh itheisakta uhi.

¹⁵Mi kuapeuh Jesu Pasian Tapa ahi chia phuangkhia taphot tuh Pasian amah ah aom a, amah zong Pasian ah aom hi.

¹⁶Tualeh i tung a Pasian in itna a neihpen i thei ua ging zong i gingta uhi. Pasian itna ahi a, kuahileh itna a om tuh Pasian ah aom a, Pasian zong amah ah a om hi.

¹⁷Hihmi-ah i tung a itna a bukimta hi: vaihawmni chiang a hangsanna i neihtheihna ding in, amah om bang a eite zong i omjiak un.

¹⁸Itna ah launa a omkei a, itna bukim in launa a delhmangjaw hi; ajiakpen launa in thuakgimna anei hi, ajiak launa neimi pen itna ah a bukim nailou ahi.

¹⁹Aman ei ahung it masak jiak in; en zong amah i it uh ahi.

²⁰Mi`n Pasian ka it, chin a sanggam huataleh, amah mijuau ahi; ajiak amuh gekguk a sanggam bawn a itkeileh, amuhlouh Pasian bangchin a it thei dia.

²¹Tualeh amah a pat hih thupiak inei uhi: mi kuahileh Pasian it in a sanggam zong a it ding ahi, chih.