Read Thangal Naga JUDA 1 Bible Online

JUDA 1 - Thangal Naga bible

JUDA 1

¹Juda, Jesu Krist sila leh Jakob sanggam in, Pa Pasian sianthousak, Jesu Krist a ding a kep-hoih leh sapte kiangah:

²Zahngaihna, khamuanna leh itna na kiang uah sukpung in omta hen.

³Ka ittakte aw, i hundamna thutangpi na kiang ua gelh ding ka hahngaihsut lai in, khatvei misiangthoute kipiasa ginna thu a na hahkat ding uh deihna tilkhouhna thu gelh ding kei dingin a poimoh hi.

⁴Ajiak masanglai pek a hih siamlouhna tang ding a guatsa, Pasian ngaihsaklou leh i Pa Pasian hehpihna thu pen hukna suaksak a, tualeh Toupa Pasian khat guak om leh i Toupa uh Jesu Krist, gingtalou agu`k a hunglut mi kuate hiam aom uhi.

⁵Hinanleh hih khatvei na theitamah nanle uchin, kung theisakkik ding hi, tuapen Toupa`n, amite Izipt gam a pat a hutkhiat zoh nung a, agingtaloute a hihmangthang hi, chih.

⁶Tualeh vantungmite atanvou uh hoihtak a kemlou a, hinanleh atenna mun uh nusia pen tangtawn a gakna sikkol bulh in mialnuai ah nithupi vaihawmni a dingin a koihhoihta hi.

⁷Sodom leh Gomorrah tualeh akim a khuapi omte, tuachimah bang a, kingaihna a kipumpiak leh, taksa tuamdangna delhte pen tangtawn gawtna thuak a ettawn ding a taklat a aom bang un.

⁸Huachimah bangin hih mang manten zong taksa ahihnin ua, thuneihna anial ua, thupinate agensia veu uhi.

⁹Hilehzong Michael vantungmi tungnung pen in Mosi luang thu ah dawi tawh kihau a a kinial laiun, gensia in a mohpaih ngam kei a, “Toupa`n hungtai heh!” a chijaw hi.

¹⁰Hinanleh huate in sil a theihlouhte uh a gensia ua, tualeh ngaihtuahna neilou gamsate bang a, pianken theihtheihna a atheih uh, hua silte ah amauh leh amauh aki hihsia uhi.

¹¹Atung uh agik hi! Ajiak pen Kaina lampi ajui ua, duhgawlna in Balaam khialhna ah lawptak in atai ua, tualeh Korah helna ah a mangthangta uhi.

¹²Hihte ahi uh na itna ankuang hoihlousaktute, noutawh an anek chiang ua launa dan theilou, amauh guak kivakte ahi uh. Amauh pen tuipailou meilum huih in apuakkawi lehlehte, phavang a sing gahlou, nihvei sisa, ajung tawh bawhkhiatte ahi uhi.

¹³Amauh leh amauh jumnang kipuakdok tawm, tuipi kinawk vonvon, aksi leng kawikawi, tangtawn a mialna vom ngingngeng a ding a koihhoihte ahi uhi.

¹⁴Tuin Enok, Adam a pat sagihnapa in zong, hihte tungthu ana genkholh hi. En in, “Toupa a misiangthou sangsawm tawh a hungpai hi

¹⁵mi jousiah tung a vaihawm ding leh, alak ua Pasian ngaihsaklou a nna asep uh Pasian ngaihsak louhna nna jousiah leh, Pasian ngaihsaklou mikhialten atung a a hamsiatna jousiah jiak a Pasian ngaihsaklou jousiah siamlouh tangsak ding in!” chi in.

¹⁶Hihte pen phunhatte leh nial hatte; amauh sa utna a gamtangte ahi uh; akam un ki-uangsakna thu thupi taktak agen ua, punna deihman a mi pahtawi chi`ngmi ahi uhi.

¹⁷Hinanleh nou, ittakte aw, noujaw i Toupa Jesu Krist sawltakte jang a masanglai a thu kigente theigige un;

¹⁸“Hun nunung chiangin Pasian ngaihsak louhna lam a amauh sa utna bang a om, simmohhatte ahung om ding uh,” chia ahung hilhte uh.

¹⁹Hichibang mite pen pawltuam bawlhat mi, taksa utna a kinga mi, kha neiloute ahi uhi.

²⁰Hinanleh nou, ittakte aw, noupen na ginna siangthou uh tungah kilamtou in; Khasiangthou ah thum un,

²¹tangtawn hinna a hung puilut ding i Toupa Jesu Krist zahngaihna pen ngakjingin Pasian itna ah noumah kikemsak un.

²²Tualeh khenkhat kituamkoihte lainat unla;

²³hinanleh khenkhatte meikuang a pat kaidok in; a taksa thanghuai uh banna puansilh tanpha kihdak in laukawm in hundam un.

²⁴Tuin na puklouhna ding ua nou hung vengbitthei leh, a thupina maia nasatak a nuamsa a mohsakna beia nou hung koihtheipa

²⁵i hundampa uh Pasian pil amah guak kiangah, thupinate, pahtawinate, vaihawmnate, leh sil bawltheihnate, tu leh tangtawn in omjingta hen! Amen.