Read Thangal Naga KILAKNA 1 Bible Online

KILAKNA 1 - Thangal Naga bible

KILAKNA 1

¹Jesu Krist kilakna, Pasian in akiang a sil hungtung pai ngeingei dingte a silate a theihsak ding a apiak pen; aman huapen a sila Johan kiangah vantungmi sawl in chiamtehna in a theisakta hi,

²tualeh aman Pasian thu leh Jesu Krist theihpihna thu leh a silmuh jousiah a theisakta hi.

³Hih genkholhna thute simleh ngaikhiate leh, asung a thu kigelh jui mipen ahampha hi; ahun anaitak jiak in.

⁴Johan in Asia gam a om saptuam sagihte kiangah: Amah a omjing leh a omsa leh hung paidingpa a pat leh, a laltouna mai a om Kha sagihte a pat,

⁵tualeh theihpihtu gin-om, misi lak a piang masa, leh leia kumpipate vaihawmtu Jesu Krist a kipan, Hehpihna leh khamuanna na kiang uah om hen. Amah ei hung it a i khialhna a pat ama sisan mahmah a hung silsiangtu leh,

⁶Pasian a Pa kiang a lalte leh siampute a hungsiamtu kiangah, thupina leh thuneihna tangtawn tangtawn in omjingta hen! Amen.

⁷En in! meipi tawh a hungpai hi; mit jousiahin amah amu ding hi, amah su`ntute mahmah in zong; tualeh leitung a nam jousiah amah jiakin akap ding uhi. Huachi hihen! Amen.

⁸“Kei Alpha leh Omega, Abul leh Atawp ka hi,” Toupa, omjing leh omsa leh hungpai ding pa, hat tungnung in, achi hi.

⁹Kei, Johan, na sanggampa uleh Jesu Krist a gimthuakna leh kumpi gam leh thuakzohna a natanpih uh, Pasian thu leh Jesu Krist thu theihpihna jiakin Patmos kichi tuikulh gam ah ka om a.

¹⁰Toupa ni in kha in ka om a, tualeh ka nunglam ah pengkul gingbang aw ngaihtak kaja hi.

¹¹Kei, Alpha leh Omega, Amasapen leh Anunungpen ka hi, tualeh, “Na silmuhte laibu ah gelh inla, Asia gam a om saptuam sagihte kiangah khak in: Ephesa khua ah, Smarna khua ah, Pergamos khua ah, Thiatira khua ah, Sardi khua ah, Philadelphia khua ah, tualeh Laudisia khua ah,” chi in.

¹²Tuachi`n hua ahung houpih aw pen muh tum in ka kihei a, tualeh ka kiheileh kham a kibawl meivak tunna sagih kamu a,

¹³tualeh hua meivak tunna sagihte laiah Mihing Tapa tawh kibang, mi khat a kengphang dong a puansilh, a awm kham kawnggak a kigak ka mu hi.

¹⁴Alu leh asam samul bangin akang a, vuk bangin angou a, tualeh amit pen meikuang bang ahi;

¹⁵a kengphang pen dangka san taak tak meia halsan bang ahi a, tualeh a aw pen tui tampi luang gingbang ahi.

¹⁶Aman akhut jiatlam ah aksi sagih atawi a, akam a pat in namsau alangnih a hiamtuah apawt a, tualeh amel pen ni hahsat a asat laitak bang ahi.

¹⁷Tualeh amah ka muhtakin, asi bangin a kengbul ah ka pukta hi. Hinanleh aman a khut jiatlam ka tungah nga in, ka kiangah, “Lauken! kei amasapen leh anunung pen ka hi.

¹⁸Kei a hingjingpa ka hi. Tualeh kasi a, tualeh ngaiin, tangtawn in ka hing ahi. Amen. Tualeh misikhua leh sihna chabi kanei hi.

¹⁹Na silmuhsate leh, sil omlaite leh tunung a sil hung om dingte gelh in.

²⁰Ka khut jiatlam a aksi sagih na muhte leh, kham meivak sagih na muhte thugu`k ahihleh, aksi sagihte pen saptuam sagihte vantungmite ahi uh: tualeh meivak tunna sagih na muhte ahihleh saptuam sagihte ahi uhi, achi hi.