Read Thangal Naga KILAKNA 11 Bible Online

KILAKNA 11 - Thangal Naga bible

KILAKNA 11

¹Tuachi`n pumpeng chiang tehna bang khat ahung kipia a, tualeh vantungmi ading a, ka kiangah, “Thou inla Pasian tempul leh maitam leh asung a biatute teh in.

²Hinanleh huangsung tempul pualam tehken; nusia in, ajiak huapen Jentelte kiang a piak ahita hi, tualeh khuapi siangthou pen amau`n kha sawmli leh nih a tuanden ding uhi.

³Tualeh ka theihpihtu nihte kiangah silbawltheihna ka pia ding a, amau`n la-ip silh in ni sangkhat leh zanih leh sawmguk sung thu agen ding uhi,” achi hi.

⁴Hihte pen Olive sing nihte leh leitung Pasian maia ding meivak tunna nihte ahi uhi.

⁵Tualeh mi khatpeuhin amauh ahihnatleh, akam uapat mei hung pawtkhia in a melmate uh a kangmang a; tualeh mi khatpeuhin amauh ahihnatleh, huachimah bang a thah in aom ding hi.

⁶Hihte`n a thugen hunsung ua guah juklouhna dingin van khaktheihna sil bawltheihna anei ua. Tualeh tui sisan suaksak theihna leh, a ut dandan ua leitung gawtna chinteng a gawttheihna, silbawltheihna anei uhi.

⁷Tualeh atheihpihna thugen uh azoh chiang un, kuakhuk tawbei a pat hung pawtkhia gamsa in adou ding a. Ajou ding, tualeh athat ding hi,

⁸tualeh aluang uh pen kha lam a Sodom leh Izipt kichi, i Toupa uh zong kilhden a om na khuapi thupitak kongjing ah alum ding hi.

⁹Tuachi`n mipite leh, phungchin leh, hamchin leh, namchin a miten nithum leh akim aluang uh a en ding ua, aluang uh hankhuk a vuiding aphal kei ding uhi.

¹⁰Tualeh leitung a tengte a kipak ding ua gualnop a bawl ding ua. Tualeh silpiakte a kikhaktuah ding uhi, ajiak pen hih Jawlnei nihten leitung a tengte ana bawlgenthei mahmah uhi.

¹¹Tuin nithum leh akim zoh in, Pasian a kipan hinna kha asung uah alut a, akeng un ading uhi, tualeh amauh mute tungah launa thupitak a tungta hi.

¹²Tualeh amau`n van a kipan a aw ngaihtak in, “Hihlam ah hungpaitou un!” Akiang ua achih aja ua, tualeh amauh meilum lak ah van ah akahtouta ua a melmate un amauh amu uhi.

¹³Huahun laitak mah in jin nasatak in aling a, tualeh hua jinling ah mi sangsagih thah in a om hi. Avalteng pen alau mahmah ua van Pasian kiangah thupina apiata uhi.

¹⁴Tunggikna nihna abeita a. Ngaiin, tunggikna thumna ahung paipah ding hi!

¹⁵Tuachi`n vantungmi sagihna in a pengkul amut a, van ah aw ngaihtak aging a, “Hih leitung kumpi gamte pen i Toupa uleh Krist kumpi gam ahung hita, amah pen tangtawn tangtawn in kumpi in atou ding hi!” chi in.

¹⁶Tualeh Pasian maia a laltouna ua tou upa sawmnih leh lite pen khupbok in Pasian abia ua,

¹⁷amau`n: “Na kiang ah kipahthu kunggen uhi, aw Toupa Pasian hattungnung, omjing leh, omsa leh, hung om ding! Ajiak nangman na thahatna thupitak na lata a tualeh vai nahawmta hi!

¹⁸Namte aheh ua, tualeh na thangpaihna a hungtungta, tualeh misite vaihawmsakna ding leh, na silate,Jawlneite leh misiangthoute leh, na min laute, milian leh mineu kiang a, nuamman piakna ding hun leh, leitung susiate na suksiatna ding hun pen a hungtungta hi!” chi in.

¹⁹Tuachi`n van ah Pasian tempul akihongta a, a tempul sung a thukhun bawm ahung kimu a; tualeh tunphe bang, awging bang, van ging bang, jinling bang, tualeh gialkia thupitak bang ahung omta hi.