Read Thangal Naga KILAKNA 12 Bible Online

KILAKNA 12 - Thangal Naga bible

KILAKNA 12

¹Tualeh van ah chiamtehna thupitak khat ahung kilang a. Numei khat ni a kithuam, akengnuai ah khapi, tualeh a lutung ah lallukhu aksi sawmlehnih ahung om a.

²Tuachi`n amahnu pen naupai ahi a, nauvei leh nau suakkhia ding natna in akapta hi.

³Tualeh chiamtehna dang van ah ahung kilang kik a. Ngaiin, mei bang a san gulpi, lutang sagih leh kisawm nei, alutung a manglukhu sagih khu ahung om hi.

⁴Amei in van a aksi sehthum suah sehkhat akai a leiah apaikhiata a. Tualeh anau asuahkhiat phetleh ana valhjoupai dingin gulpi pen numei nausuak dingnu maiah ading hi.

⁵Amahnu in ta pasal, namjousiah tung a sikchiang a vaihawmtu ding khat ahung neikhiata a. Tualeh ata pen kipelkhia in Pasian leh a laltouna ah laktouh in a omta hi.

⁶Tuachi`n numeinu pen ni sangkhat leh zanih leh sawmguk avaaktheihna ding un gamdaiah Pasian in abawlsa mun ah a taimangta hi.

⁷Tualeh van ah kidouna aom a, Michael leh a vantungmite`n gulpi adou ua. Tualeh gulpi leh a vantungmiten zong adou uhi;

⁸hinanleh a joutakei ua, amun uh zong van ah muh in a omnawn takei hi.

⁹Tuachi`n gulpi lian pen paihkhiat in a omta a, hua gulpitek pen Dawi leh setan zong a kichi hi, leitung pumpi khemtu, amah pen leitung ah paihkhiat in a omta a, a vantungmite zong amah tawh paihkhiat in a om uhi.

¹⁰Tuachi`n van ah aw ngaihtak khat in, “Tuinjaw i Pasian uh hutdamna leh! Thahatna leh! Kumpi gam leh Krist thuneihna a hungtungta hi! Ajiak pen i unaute uh hektu pen paihkhiat in a omta hi, aman asun ajan in i Pasian maiah amau ahek hi.

¹¹Tualeh amau`n Belamnou sisan jiak leh atheihpihna thu uh jiakin amah pen ajouta ua, tualeh sihtanpha in ahinna uh a itkei uhi.

¹²Tuajiakin nou van leh asung a tengte kipak un! Hinanleh leitung leh tuipi a tengte tung agik hi! Ajiak pen hun tomnoukhat aneita chih a theihjiak in, dawipen heh mahmah in, na kiang uah ahung paisukta hi.”

¹³Tuin gulpi in leitung a paihkhiat ahi chih atheihtak in hua numei ta pasal neinu pen agawtta hi.

¹⁴Hinanleh numeinu pen gulpi mai a kipan hunkhat leh, hunte leh, hun kimkhat khawia a omna ding mun a alenlut theihna dingin, muvanlai liantak kha piak ahi a.

¹⁵Tuachi`n gulpi in numeinu tui a tawhmangsak theihna dingin, anung ah tuikhanglian banghial in akam a pat tui a siakhia hi.

¹⁶Hinanleh leiin numeinu apanpih a; leiin akam akak a hua gulpi in akam a pat a siatkhiat tuikhanglian pen a valhbeita hi.

¹⁷Tualeh gulpi pen numeinu tungah aheh mahmah a, a chikhak omsun Pasian thupiak juite leh, Jesu Krist theihpihna pomtute douding in a kuanta hi.

¹⁸Tuachi`n gulpi pen tuipi piau sehnel tungah a dingta hi.