Read Thangal Naga KILAKNA 13 Bible Online

KILAKNA 13 - Thangal Naga bible

KILAKNA 13

¹Tuachi`n tuipi sehnel tungah ka ding a, tuipi-a kipanin gamsa khat lu sagih leh kisawm nei; a kite tung a lallukhu sawm nei, tualeh a lutungte a Pasian gensiatna min nei hung pawtkhia ka muta hi.

²Tualeh hua ka gamsa muh pen gialbem tawh kibang ahi a, akeng vompi keng abang a, akam pen humpinelkai kam bang ahi. Tualeh amah pen gulpi in a silbawltheihna leh atouna leh thuneihna thupitak apia hi.

³Tualeh a lutangte lak a khat pen sihpih ding khop hial a liam hileh kilawm in kamu a, tualeh sihna khop hial a aliamna pen ahung damta a, leitung pumpi in hua gamsa pen lamdang sa in ajuita uhi.

⁴Tuachi`n gamsa kiang a thuneihna pia gulpi pen abiata ua, tualeh amau`n, “Gamsa tawh kibang kua aom a? Amah tawh kidoungam kua ahia aom?” chi`n gamsa pen abia uhi.

⁵Tualeh amah pen sil thupitakte genna ding leh Pasian gensiatna ding kam a kiang ah piak ahi a, kha sawmli leh nih sung thuneihna piak ahita hi.

⁶Tuachi`n aman Pasian gensiatna leh, amin leh atenna inn leh van a tengte gensiatna in akam akakta hi.

⁷Akiang ah misiangthoute tawh kidou ding leh amauh zoh ding thupiak ahita a. Tualeh phungchin leh, namchin leh, hamchin tung a thuneihna piak ahita hi.

⁸Tualeh leitung a teng jousiah leitung kisiamchil a pat a gohsa Belamnou hinna laibu a amin uh ki gelhkhalouten amah abia ding uhi.

⁹“Mi khatpeuhin bil aneihleh ja hen!

¹⁰Mi kuahileh sal a puiluttu, sal in atang ding a; mi kuahileh namsau a that tuh, namsau a thah in aom ding hi. Hihsan ah misiangthoute dohzohna leh ginna a kilang hi.”

¹¹Tuachi`n gamsa dang leitung a kipan a hung pawtkhia khat ka mu a; tualeh belam bang ki nih anei a, gulpi bangin thu agen a.

¹²Tualeh aman gamsa masapen thuneihna jousiah amaiah ajang a, leitung leh asung a tengte gamsa masapen sihna khop hial a liam hungdamkik pen a biasakta hi.

¹³Aman mihingte mitmuh in van a pat leitung ah meibang samkhia hial in, chiamtehna thupi taktakte abawl a.

¹⁴Tualeh hua gamsa mitmuh a sillamdang nna bawltheihna akiang a piak a omte zang in, leitung a omte kiangah, namsau a satna maliam neia hing nalai hua gamsa lim nabawl ding uh ahi, chin leitung a tengte a khemta hi.

¹⁵Tualeh gamsa lim a hamtheihna ding leh gamsa lim bialou jousiah a thahtheihna ding a gamsa lim kiang a hunakna piaktheihna silbawltheihna aman anei hi.

¹⁶Aman mijousiah, aneu leh alian, hausa leh jawng, saltang leh tanglou hitaleh, akhut jiatlam uah ahihkeileh atal uah chiamtehna aneisak chiat a,

¹⁷tualeh chiamtehna hiam, gamsa min hiam, ahihkeileh amin nambar neite chihlouh mi kuamah in leizong a leithei kei ding ua, juak zong a juaktheih kei ding uhi.

¹⁸Hihsan ah pilna akilang hi: Kuapeuh theihsiamna neiin gamsa nambar pen sim hen, ajiak pen hihpen mihing nambar ahi. Ama nambar pen 666 ahi.