Read Thangal Naga KILAKNA 14 Bible Online

KILAKNA 14 - Thangal Naga bible

KILAKNA 14

¹Tuachi`n ka en a, ngaiin, Belamnou Zion mual a ding leh; atal ua a Pa uh min kigelh chiat nuaikhat leh sangsawmli leh sangli kamu hi.

²Tualeh van a pat aw khat, tui tampi luang ging leh van ging ngaihtak bang kaja a, tualeh kaihging tumte kaihging tumging bang kaja hi.

³Amau`n laltouna mai leh ganhing lite mai leh upate maiah lathak hileh kilawm asa ua. Leitung a pat a tatkhiat hua nuaikhat leh sangsawmli leh sanglite chihlouh hua la kuaman ajilthei kei uhi.

⁴Hihte pen numeia kisubuah loute ahi uh, nungak siangthou bang ahihjiak un; hihte pen apaina teng a Belamnou juitute ahi uhi. Hihte pen Pasian leh Belamnou ding a gah masapen hi ding a mite lak a kipan a tatkhiat ahi uhi.

⁵Tualeh akam uah juauthu aom kei a; Pasian laltouna maiah gensiat beiin aom uhi.

⁶Tuachi`n vantungmi dang khat leitung a teng namchin, phungchin, hamchin leh hamchin kiang a tangkoupih ding tangtawn tangthupha neia vanlaijawl a leng kamu a.

⁷Aw ngaihtak a kikouin, “Pasian lau unla, a kiang ah thupina pia un! Ajiak pen a vaihawmna a hungtungta hi. Tualeh amah pen van leh lei leh tuipi leh tuinakte siamtu pen bia un!” achi hi.

⁸Tualeh vantungmi dang, anihna in ajui a, “Hua khuapi thupitak Babilon tuh achimta hi, achimta hi! A angkawmhat thangpaihna uain nam jousiah adawnsak jiakin!” chi in.

⁹Tuachi`n vantungmi, athumna in, amauh a jui a, “Mi khatpeuhin gamsa leh alim abiak a, ataltang hiam, akhut hiam a a chiamtehna aneihleh

¹⁰Pasian thangpaihna uain, ahehna nou kisung dimlet pen adawn ding a, tualeh vantungmi siangthou mai leh Belamnou maiah mei leh kat a gawt in aom ding hi, chi in.

¹¹Tualeh a gawtna uh meikhu pen tangtawn tangtawn in a jamtou a. Gamsa leh alim biate leh akhut a chiamtehna nei jousiahten sun hiin jan hitaleh khawl tawldamna amukei ding uhi.”

¹²Hihsan ah, Pasian thupiak juite leh Jesu gingta misiangthoute thuakzohna akilang hi.

¹³Tuachi`n van akipan aw khat in ka kiangah, “Gelh in: Tu-a pat misi Toupa a site pen ahampha uhi!” “Ahi, kha in! Asep gimnate uh khawlsan a, asilbawlte un hungjui ding ahihjiak in, achi hi,” chih kaja hi.

¹⁴Tuachi`n ka en a, ngaiin, meilum kang leh, hua meilum tung a Mihing Tapa hileh kilawm, a lutung a kham lallukhu khu a, akhut a kawite hiam tawi kamu a.

¹⁵Tualeh vantungmi dang khat tempul a pat a hung pawtkhia, aw ngaihtak a kikou in meilum tung a tou-pa kiangah, “Na kawite jang inla at in, nang dingin a at hun tungta hi, ajiak pen leitung buhte akuaita hi!” achi hi.

¹⁶Tuachi`n hua meilum tung a tou-pan akawite leitung ah a jangkhiata a, leibuhte at in aomta hi.

¹⁷Tuachi`n vantungmi dang khat van a tempul a kipat in ahung pawtkhia a, aman zong kawite hiam khat atawi hi.

¹⁸Tualeh meitung a thunei vantungmi dang khat, maitam a pat in ahung pawt a. Aw ngaihtak a kikouin kawite hiam neipa kiangah, “Na kawite hiam jang inla lei grepgah bomte khawm in, ajiak pen grepte aminsiangta hi!” achi hi.

¹⁹Tuachi`n vantungmi in a kawite leitung ah ajangta a lei grepte akhawm a, tualeh huate Pasian thangpaihna uain hekna ah apailutta hi.

²⁰Tualeh uain hekna pen khuapi pualam ah keng a totchil in a omta a, tualeh uain hekna a kipat sisan pen sakol kamkaih tanpha in farlong sangkhat leh zaguk sung ahung luangkhiata hi.