Read Thangal Naga KILAKNA 16 Bible Online

KILAKNA 16 - Thangal Naga bible

KILAKNA 16

¹Tuachi`n tempul sung a pat in aw ngaihtak khat in vantungmi sagihte kiangah, “Pai unla Pasian thangpaihna belhbute leitung ah va buakhia un!” achih kaja hi.

²Tuachi`n akhatna pen apai a a belhbu leitung ah a buakhia a. Tualeh gamsa chiamtehna nei leh alim biate tungah buahna leh meima huaisia hahnat a na ahung suakta hi.

³Tuachi`n vantungmi anihna in a belhbu tuipi tungah a buakhia a. Tualeh hihpen misi sisan bangin ahung omta a, tualeh tuipi sung a om hinna nei jousiah asita uhi.

⁴Tuachi`n vantungmi thumna in a belhbu luidungte leh tuinakte ah asungbua a, tualeh huate sisan ahung suakta hi.

⁵Tualeh tuite tung a thunei vantungmi in, “Aw Toupa, hih silte a vai nahawm jiakin, Nang omjing leh omkhin leh hung om dingpa na diktat hi!

⁶Ajiak pen amau`n misiangthoute leh Jawlneite sisan anasuah ua, tualeh nang a dawn ding un amau sisan na piata hi. Dawntaak mawng ahihjiak un!” achih kaja hi.

⁷Tualeh maitam a kipat adang khat in, Ahi, “Toupa Pasian hattungnung, na vaihawmte atak in adiktat hi!” achih kaja hi.

⁸Tuachi`n vantungmi alina in a belhbu Ni tungah asungbua a, tualeh amah kiangah mite meia haikak theihna silbawltheihna piak ahi.

⁹Tualeh mite pen mei samah mah a haikak in aom ua, tualeh hih hiite a gawtna tung a thuneipa Pasian min agensia ua, tualeh amah kiang a thupina pia ding in a kisik nuamkei uhi.

¹⁰Tuachi`n vantungmi angana in a belhbu gamsa laltouna tungah asungbua a, tualeh a kumpi lalgam pen mialna in a pumdimta a; tualeh amau`n na asak jiak un alei uh a themthem in apetkiamta uhi,

¹¹anatnate uh leh a meimate uh jiakin van Pasian agensia ua, asilbawlte uh akisik tuankei uhi.

¹²Tuachi`n vantungmi gukna in a belhbu Euphrate luipi ah a sungbua a, tualeh suahlam kumpipate a ding lampi bawl ahihtheihna dingin atuipen a kangsiangta hi.

¹³Tualeh ukeng tawh kibang khanin thum gulpi kam a kipan leh, Jawlnei taklou kam a kipan a hungpawt kamu a.

¹⁴Amauh pen hattungnung Pasian nithupi a kidouna a kaikhawm ding a leitung kumpi leh leitung pumpi paikhia, sillamdang bawl dawite kha ahi uhi.

¹⁵“Ngaiin! Guta bangin kungpai hi! Kigingjing leh puan silhsa a om tuh a hampha hi, atuachih keileh guaktang in avak ding a ajumhuaina a mukha ding uhi!”

¹⁶Tualeh amau`n amauhte mun khat, Hebrai ham a Armageddon kichi ah apuikhawmta uhi.

¹⁷Tuachi`n vantungmi sagihna in a belhbu huihkhua ah asungbua a, tualeh van a tempul a pat leh, laltouna a kipanin aw ngaihtak ahung suakkhiata a, “Bawlzoh ahita!” achi hi.

¹⁸Tualeh awte, sil gingte, vanpi gingte leh tunphete ahung om ua. Tualeh jin nasatak aling a, huachibang jinling nasia leh thupi leitung a mihing om a kipat a omkha naikei hi!

¹⁹Tualeh khuapi thupi pen sehthum in kikhen a, tualeh namte khuapite pen achimta hi. Tualeh a thangpaihna nou pen akiang a piak dingin Babilon khuapi thupi tuh Pasian maiah theihkhiat in ahung omta hi.

²⁰Tuachi`n tuikulh gam jousiah a taimangta a, mualte zong muh in aom nawn takei hi.

²¹Tualeh gial thupitak atang khat talent khat a gik van a pat in mite tungah akia a, tualeh miten hua gial a gawtna jiakin Pasian agensia uhi, ajiak pen hua gawtna pen ahuaisia mahmah hi.