Read Thangal Naga KILAKNA 17 Bible Online

KILAKNA 17 - Thangal Naga bible

KILAKNA 17

¹Tuachi`n belhbu sagih tawi vantungmi sagihte lak a khat hungpaiin ahung houpih a ka kiangah, “Hungpaiin, tui tampi tung a tou kijuaknu thupitak tung a vaihawmna kung ensak ding.

²Leitung a kumpipate`n amahnu a angkawmpih ua, tualeh a angkawm hatna uain in leitung a tengte dawnkhamsak in a om uhi,” achi hi.

³Tuachi`n aman keipen kha in gamdaiah ahung puamangta hi. Tualeh numei khat Pasian gensiatna min a pumdim, lutang sagih leh kisawm nei gamsa sandup tung a tou kamu a.

⁴Hua numeinu pen puan sandup leh sandaang in akijem a, kham leh suangmantam leh, tuikepsuang in akijem a, a angkawm hatna kihdak om leh buahna a dim kham nou pen akhut in atawi hi.

⁵Tualeh a taltang ah min khat, Thuguk kiphual: “Babilon thupi, kijuakte leitung a kihdak huaite nu,” chi`n a kigelh hi.

⁶Hua numeinu pen misiangthoute sisan leh Jesu martarte sisan dawnkham in kamu a. Tualeh amahnu ka muhtak in ken lamdang kasa a tualeh chijat-huai kasa mahmah hi.

⁷Hinanleh vantungmi in ka kiangah, “Bang ding a lamdang sa nahia? Hua numei leh atuanna lutang sagih leh kisawm nei gamsa thugu`k kung hilh ding hi.

⁸Hua na gamsa muh pen a omkhin a, aom kei a, tualeh kuakhuk tawbei a pat ahung pawtkhia ding a manthaina ah apai ding hi. Tualeh leitung siamchil a pat leitung a teng hinna laibu a amin uh kigelhlouten hua gamsa omkhin leh omnawnlou leh hung om ding pen amuh chiang un lamdang asa mahmah ding uhi.

⁹“Hihsan ah pilna lungsim aom hi. Lutang sagihte pen, numeinu touna mual sagihte ahi uhi:

¹⁰kumpi sagih aom a, ngate apu`kta a, khat a om a, tualeh adang ahung omnai kei hi; tualeh a hungpai chiangin tomnoukhat sung aom ding hi.

¹¹Hua gamsa omkhin leh omlou pen amah mah zong agiatna ahi a, tualeh sagihte lak a ahi a, tualeh manthaina ah apai hi.

¹²“Hua kisawm namuhte pen kumpi lalgam neinailoute ahi uhi, hinanleh amau`n gamsa tawh dakkal khat sung kumpipate bang a thuneihna anei uhi.

¹³Hihte lungsim khat in a om ua, tualeh gamsa kiangah a thuneihna uleh ahatna uh apia ding uhi.

¹⁴Hihte`n Belamnou a kidoupih ding ua, tualeh Belamnou in amauh ajou ding hi, ajiak amah pen toupate Toupa leh kumpite Kumpipa ahi, tualeh amah tawh omte pen sapte, telte, tualeh gin-omte ahi uhi,” achi hi.

¹⁵Tuachi`n aman ka kiangah, Kijuaknu touna na tui muhte pen, mite leh, mipite leh namte leh, hamte ahi uhi.

¹⁶Tualeh gamsa tung a kisawm namuhte, hihte`n kijuaknu ahua ding ua; hihsia leh saguak in abawl ding ua; asa ane ding ua tualeh meiin ahalmang ding uhi.

¹⁷Ajiak pen Pasian thute suktangtung a aom masiah amah deihlam a bawltheihna ding uleh, lungsim khat aneihna ding uleh, alalgam uh gamsa kiang a a piaktheihna ding un Pasian in a lungtang uah akoihta hi.

¹⁸Tualeh, “Hua na numei muhnu pen hua khuapi thupi leitung a kumpipate tung a vaihawmtu pen ahi,” achi hi.