Read Thangal Naga KILAKNA 18 Bible Online

KILAKNA 18 - Thangal Naga bible

KILAKNA 18

¹Hih silte zoh in vantungmi dang khat silbawltheihna thupitak neia van a pat hung kumsuk kamu a, tualeh athupina in leitung ataan vaak a.

²Tualeh amah aw ngaihtak in hahkou in akikou a: “Babilon thupi achimta hi! Achimta hi! Dawite tenna leh, kha buah chinteng kulh, vasa sianglou leh, kihdak om chinteng bawm ahung hita hi.

³Ajiak nam jousiahin a angkawm hatna thangpaihna uain adawnta ua. Tualeh leitung a kumpipate`n amah a angkawmpih ua, amah noptatseng jiakin leitung a summet bawlte ahausa gawpta uhi,” achi hi.

⁴Tualeh van a pat aw dang khat kaja a, “Ka mite a khialhna a na jauhlouhna ding un leh! amahnu tawh agawtna na tankhawm louhna ding un; amah a pat hung pawtkhia un!

⁵Ajiak a khialhnate van atungta a, tualeh a gitlouhnate Pasian in atheigige hi.

⁶Aman ahung piak bangbang in amah pia unla; asilbawl bang jelin alehnih in thuk un. ahalna nou ah amah dingin alehnih in halsak un.

⁷A kithupisakna zah leh a noptatna zahzah in, amah bawlgim un. Ajiak aman a lungtang in, ‘Kumpinu in katou a! meithai ka hikei a, ka lungkham ngaikei ding, achi hi.

⁸Tuajiakin nikhat thu in amah gawtna sihna leh kialna leh su`nna ahung tung ding a. amahnu pen huaisiatak in meiin akangtum ding hi, ajiak pen amah tung a vaihawmtu Toupa Pasian pen ahat ahi,” achi hi.

⁹Leitung a kumpipate, amah na angkawmpih a amah tawh nuamtak a na omten, amahnu kakna meikhu amuh chiang un akah ding uhi.

¹⁰Amahnu kibawlgim jiak a lau a gamla pia dingin, “Tajang aw! Tajang aw! Babilon khuapi thupi, khuapi hat! Dakkal khat sung a natung a vaihawmna a hungtunta`k a maw!” achi ding uhi.

¹¹Tualeh leitung a summet bawlte`n amahnu kah in asu`n ding uh, ajiak mi kuamah in asummet bawlna uh alei nawnlouh ding jiak in;

¹²asummet bawlnate-uh pen kham leh dangka-eng, suangmantamte, tuikepsuangte, puan malngatte, puan sandupte, puan nemte, puan sandaangte, saiha a kibawl bel chituam tuamte, sing mantampente, daante, sikte leh suangkaang bel chituam tuamte;

¹³tualeh singthakte, sil namtuite, sathau namtuite, begawte, uainte, annelte, gehute, gante tualeh mite hinnate bang ahi.

¹⁴“Silgah na lunggulhte`n nang ahung nusiata ua, sil limtuak leh hoih jousiahin nang ahung paimangsanta hi, hihte pen na mungai nawnkei ding hi!”

¹⁵Hih silte a summet bawl amahnu jiak a hung hausate pen amahnu ki bawlgimna laujiakin gamlapi a dingin. Kap in asu`n ding ua,

¹⁶tualeh, “Tajang aw! Tajang aw khuapi thupi! Puan malngat leh, puan sandup leh puan sandaang, kham leh suangmantam leh tuikepsuang a kijempi!

¹⁷Dakkal khat sung maimai in hihbang a hauhsatna thupi bangmahlou ahung suakta`k mai!” chi in. Tualeh longpu jousiah leh long a tuangte jousiah leh long mite leh tuipi tung a summet bawl jousiahte gamlapi ah ading ua,

¹⁸akakna meikhu amuh un a kikoukhia ua, “Hih khuapi thupi bang khoiah aom a!” achi uhi.

¹⁹Amau`n a lutung ua leivui kitheh in a kikoukhia ua, kap leh mau pum in, “Tajang aw! tajang aw! Amah manphat jiak a tuipi a long neite hihhauhsat a omna khuapi thupi! Dakkal khat sungin suksiat ahung hita hi!”

²⁰Nang van leh sawltak siangthoute leh Jawlneite! Amahnu tung ah nuam un! Ajiak Pasian in amahnu tungah na phuba uh ahung laksakta hi!

²¹Tuachi`n vantungmi hattak khat in buhgawina suang liantak hileh kilawm suang lian khat ala a tuipi ah apailut a, “Hichibang a nasatak in Babilon khuapi thupi pen paihkhiat in aom ding a, muhkik in a omngai nawn kei ding hi.

²²Kaihging tumte, lasiamte, theile mutte, leh pengkul mutte a pan ging kilawm nasung ah a kijangai nawn kei ding hi! Khutsiammi, banglampeuh a khutsiam mawng mawng nasung ah aki munawnkei ding a; tualeh buhgawina gin mawng mawng zong jaak in aom ngainawn kei ding hi!

²³Meivak vaak zong nasung ah ataang nawn kei ding a; mou leh mouneitu aw zong akijangai nawnkei ding. Ajiak na summet bawlte hih leitung miliante ahi ua, na bumsiamna-a nam jousiah khem a aom ta`k jiak in!”

²⁴Tualeh amahnu sungah Jawlneite leh, misiangthoute leh, leitung a thah a omjousiahte sisan muh in a omta hi, achi hi.