Read Thangal Naga KILAKNA 19 Bible Online

KILAKNA 19 - Thangal Naga bible

KILAKNA 19

¹Hih silte nungin van ah mi tampitak aw kaja a, “Halleluijah Hundamna leh thupina leh zah-omna leh thuneihna pen Toupa i Pasian uh a ahi!

²Ajiak pen a vaihawmna athutak in adik hi! Ajiak aman kijuaknu thupitak a-angkawm hat jiak a leitung hihthanghuai nu pen vai ahawmkhum a. Tualeh asilate phuba pen atung ah a laksakta hi.”

³Amau`n, “Halleluijah! achi kik ua. Amahnu halna meikhu tangtawn tangtawn in ajamtouta h!”

⁴Tualeh upa sawmnih leh lite leh ganhing lite pen khupbok in, “Amen! Halleluijah!” chi in laltouna tung a tou-pa Pasian abiata uhi.

⁵Tuachi`n laltouna a pat aw khat ahung gingkhia a, “Nou a silate jousiah leh, nou amah lau, aneu alian in i Pasian pahtawi un!”

⁶Tualeh mi tampite awging bang, tui tampite luan-ging bang, vanpi ging thupitak bangin kaja a. “Halleluijah! Toupa Pasian sil jousiah neipa in vai a hawm hi!

⁷Kipak in i nuam ding uh tualeh akiang ah pahtawina ipia ding uhi. Ajiak pen Belamnou zineih hun a hungtungta a, azi zong kisakhinsa in a omta hi.”

⁸Tualeh amahnu puan malngat leh puannem a kijep ding phal ahi a. (Hua puan malngat pen misiangthoute diktatna ahi,) chi in.

⁹Tuachi`n aman ka kiangah, “Gelh in: Belamnou ankuang umding a sapte ahampha uhi.” Tualeh aman ka kiangah, “Hihte pen Pasian thugen diktakte ahi,” achi hi.

¹⁰Tualeh amah bia-in akengbul ah ka khupbok a, hinanleh aman ka kiangah, “En in, huate bawlken! Kei pen na sila tanpih leh Jesu theihpihna thu nei na-unaute lak a khat ka hi. Pasian bia in!” Ajiak pen Jesu theihpihna pen thu genkholhhna kha ahi, achi hi.

¹¹Tuachi`n van kihong kamu a, tualeh ngaiin, sakol ka`ng khat leh atung a tuangpa gin-om leh thutak kichi kamu a. Aman a diktatna in vai ahawm a, tualeh gal abawl hi.

¹²Amitte pen meikuang bang ahi a, a lutung ah lallukhu tampi aom hi; tualeh amah loungal kuaman atheih theihlouh min anei hi.

¹³Aman sisan a kidiah puan asilh a, amin pen “Pasian thu” a kichi hi.

¹⁴Tualeh van a om galkap hon in, puan malngat, vaam leh siangthou a kivon in, sakol kang tung a tuang in amah ajui uhi.

¹⁵Tualeh namte athahtheih na`ngin akam a pat namsau hiamtak apawt hi. Tualeh aman amauhte sikchiang in vai ahawmkhum ding a; hattungnung Pasian lauhhuaina leh thangpaihna uain hekna pen a tuanchil tading hi.

¹⁶Tualeh aman apuantung leh amalpi tung ah, “Kumpite Kumpi toupate Toupa chia kigelh min anei hi.”

¹⁷Tuachi`n vantungmi khat Ni sung a ding ka mu a, tualeh amah aw ngaihtak a kikou in, vanlaijawl a leng vasate kiangah: “Hungpai unla, Pasian ankuang luina thupitak ah hung kikhawm khawm un!

¹⁸Kumpipate sa, galkap sapte sa, mihatte sa, sakolte sa, leh atung a tuangte sa, tualeh mi jousiah zalen leh saltaang, aneu leh aliante sa, nanek theihna ding un!” achi hi.

¹⁹Tualeh hua gamsa leitung kumpipate leh a galkap honte uh, hua sakol tung a tuangpa leh a galkapte tawh kidou ding a a kikhop khawm uh kamu hi.

²⁰Tuachi`n gamsa pen mat in a omta a, tualeh Jawlnei taklou gamsa chiamtehna neite leh, alim biate akhemna a amai a sillamding bawltu zong amah tawh matkhawm in a omta hi. (Hih tegel pen kaat a kang meidil ah ahingtang san a pailut in a omta uhi.)

²¹Tualeh avalteng pen sakol tung a tuangpa namsau, akam a hungpawtkhia pen in thah in aomta ua, tualeh amauh sa in tungleng vasa jousiah agilvahta uhi.