Read Thangal Naga KILAKNA 2 Bible Online

KILAKNA 2 - Thangal Naga bible

KILAKNA 2

¹“Ephesa khua a saptuam vantungmi kiangah hichin gelh in: “Akhut jiatlam a aksi sagih tawipa, kham meivak sagih lak a vak kawikawipa in hih thute agen hi.

²Na nasep, na sepgimnate, na thuakzohnate, tualeh migiloute na thuaktheihlouh dante. Tualeh hiloupia sawltak ka hi uh chite na theihkhiat a, mijuau ahihdan uh na matkhiat leh.

³Tualeh na thuakjou a, na dohzou a, tualeh kamin jiak a na gimdan leh na gimlouhdan ka thei hi.

⁴Hitalehzong demna khat kungnei hi, na itna masa na nutsiattak jiak in.

⁵Tuajiakin na pukna laitak theigige inla; kisik inla, tualeh nasep masakpen bawlkik in. Atuachih keileh, kintak in na kiangah kungpai ding a na kisik keileh na meivak tunna pen amun a kipan ka suan ding hi.

⁶Hinanleh hihthu ah na hoih hi: Nikolaitan pawlte nasep na huatna ah, huapen ken zong ka hua hi.

⁷“Kuahileh bilnei jousiahin saptuamte kiang a kha thugen ja hen! “A gualjoupa kiangah Pasian paradis laijang a om hinna sing a pat nek ding ka pia ding hi.

⁸“Tualeh Smarna khua saptuam vantungmi kiangah hichin gelh in: “Amasa pen leh anunung pen, si-a hingkikpa in hihthu agen hi.

⁹Na nasepte leh gimthuaknate leh na jawndan, hinanleh na hausa hi ka thei hi. Tualeh Judami hiloupia ka hi chi, setan kikhopna inn hingal, huate gensiatna ka thei hi!

¹⁰Nung thuak ding silte lauken. Ngaiin, etkhiat a na omtheihna ding un dawiin nalak ua khenkhatte thong ah ahung khum ding a, nisawm sung gimthuakna na nei ding uh. Hinanleh sihtanpha in gin-om un, tuachi`n hinna lallukhu kung pia ding hi.

¹¹“Kuahileh, bilnei jousiahin, saptuamte kiang a kha thugen ja hen! “A gualjoupa pen sihnihna a natsak in a omkei ding hi.

¹²“Tualeh Pergamos khua a saptuam vantungmi kiangah hichin gelh in: “Amah namsau alangnih a tat-hiam tuak neipan hihthu agen hi:

¹³Na nasep leh na tenna mun, setan touna ngeizong khoisan ahia chih ka thei hi. Tualeh kamin na pomkip a, tualeh ka martal gin-om Antipa, setan tenna nalak ua thah a aomlai in zong nung ginna na tukip hi.

¹⁴Hinanleh demna sil themkhat kung nei hi: ajiak pen Balaam thugin juite hua-ah na ompih a, aman Israeltate maia pukna bawl ding leh, milim biakna sa ne ding leh angkawmna khialhna bawl ding in Balak a thuhilh hi.

¹⁵Huachimah bangin Nikolaitan pawlte thugin jui mi khenkhat zong nanei a, huapen ka hua hi.

¹⁶Kisiik in! Atuachih keileh, kintak in na kiang ah kungpai ding a ka kam a pawt namsau in amauh ka dou ding hi.

¹⁷“Kuahileh bilnei jousiahin saptuamte kiang a kha thugen ja hen! “A gualjoupa kiangah manna kiphualgu anek ding ka pia ding a, suangkang khat, hua suangtung a minthak atangtu loungal kuaman a theihlouh kigelh ka pia ding hi.

¹⁸“Tualeh Thiatira khua a saptuam vantungmi kiangah hichin gelh in: “Pasian Tapa meikuang bang mitnei a, dangka san tawhbang keng neipa in hihthu agen hi.

¹⁹Na nasepte, na itnate, na nasepnate, na ginnate, tualeh na dohzohnate ka thei hi. Tualeh na silbawl a masapen sang in a nunung pen a thupijaw hi.

²⁰Hitalehzong demna sil themkhat kung nei hi: hua numei Jezebel na phal jiakin, aman amah leh amah Jawlnei ka hi kichi in ka silate angkawmna khialhna bawl ding leh milim biakna sa ne ding in ahilh a a khemgawp hi.

²¹Amahnu pen a angkawmna a pat kisik dingin hun ka pia a, hinanleh a kisik kei hi.

²²Ngaiin, amahnu pen damlouhna lupna ah ka pai ding a, tualeh a angkawmpihte pen gimthuakna thupi ah ka puilut ding hi, a silbawl uh a kisik kei uleh.

²³A tate sihna in ka that ding hi. Tualeh saptuam jousiahin keipen lungsim gil leh lungtang jongpa ka hi chih athei ding uh, tualeh na-un un na nasep dungjui un kung pia ding hi.

²⁴“Tuin nang leh Thiatira khua a om, hih thugin neilou leh, agen uh bang a ‘setan thuthukte theilou,’ mi dang jousiah kiangah ka gen ahi. Tunggikna dang mawng mawng natung uah ka koihkei ding hi.

²⁵Hinanleh hua na neihsa uh kungpai masiah tukip un.

²⁶Tualeh agualjoupa leh atawp dong a ka nna sempa kiangah, namte tung a thuneihna ka pia ding hi;

²⁷ken zong ka Pa a kipat ka muh bang ngeiin, aman zong atung uah bel khengpan bel ahal a akek bangin sikchiang in vai ahawm ding hi,

²⁸tualeh amah pen jingsol aksi ka pia ding hi.

²⁹“Kuahileh bilnei jousiahin saptuamte kiang a kha thugen ja hen!