Read Thangal Naga KILAKNA 20 Bible Online

KILAKNA 20 - Thangal Naga bible

KILAKNA 20

¹Tuachi`n vantungmi khat van a kipan a hung kumsuk, akhut a kuakhuk tawbei chabi leh sikkhau lianpi tawi kamu hi.

²Aman hua gulpi, gulpitek, dawi leh setan pen aman a, kum sangkhat sung dingin amah akanta hi.

³Tualeh kum sangkhat achin masiah a namte akhemkik louhna dingin, kuakhuk tawbei ah apailut a, a khakkhum a, asindetta hi. Hinanleh hih silte zoh chiangin amah pen tomkhat khahkhiat ahi ding hi.

⁴Tualeh laltounate leh atung a toute kamu a, akiang uah vaihawmna piak ahi ua. Tuachi`n Jesu thu theihpihna leh Pasian thu jiak a alu uh tan a om gamsa leh alim biangailou a, atal uh hiam, akhut uh hiam a zong chiamtehna neingailoute khate kamu hi. Amauhte ahung hing ua, Krist tawh kum sangkhat vai ahawmta uhi.

⁵(Hinanleh misidangte pen kum sangkhat abei masiah ahingkik kei ding uhi.) Hih pen thohkikna masa ahi.

⁶Thohkikna masa a pangte a hampha uhi, a siangthou uhi. Huate tungah sihnihna in thu aneikei a, hinanleh amauh pen Pasian leh Krist siampute ahi ding ua, amah tawh kum sangkhat vai ahawm ding uhi.

⁷Tualeh kum sangkhat abeichiang in, setan pen khum a aomna a pan khahkhiat in aom ding a,

⁸tualeh leitung lite a om namte leh, Gog leh Magog, khem a kidouna a puikhawm dingin apaikhia ding hi. A tamdan uh pen tuipi a sehnel bang ahi.

⁹Amauh pen leitung vailam khaksuak in apaitou ua, misiangthoute giahphual khuapi deih-om pen a kualkhumta uhi. Tualeh Pasian a hung kipan van a panin mei ahung kiasuk a, amauh a kangmangta hi.

¹⁰Amauh khemtu dawi pen gamsa leh Jawlnei taklou omna mei leh kaat dil ah paihlut in a omta a, tangtawn tangtawn in thuakgimsak in aom ding uhi.

¹¹Tualeh laltouna kaang thupitak leh atung a toupa; amai a pat lei leh van taimangnapa kamu a, amauh a dingin mun mawng mawng muh in aom takei hi.

¹²Tualeh misite alian aneu Pasian mai a ding kamu a. Tualeh laibute akihong a, tualeh laibu dang hinna laibu zong akihong hi. Tualeh misite pen hua laibu a akigelh bangin anasep uh dungjui un vaihawmsak in a omta uhi.

¹³Tuipi in asung a misi omte ahung pawtkhiasakta a, tualeh sihna leh misikhua in asung a misi omte ahung puakhiata ua, tualeh amauh asilbawlte uh dungjui a vaihawmsak in a omta uhi.

¹⁴Tuachi`n sihna leh misikhua pen meidil ah paihlut in a omta uhi. (Huapen sihnihna ahi.)

¹⁵Tualeh kuapeuh hinna laibu a kigelh amuhlouh jousiah meidil ah paihlut in a omta uhi.