Read Thangal Naga KILAKNA 21 Bible Online

KILAKNA 21 - Thangal Naga bible

KILAKNA 21

¹Tualeh ken vanthak leh leithak kamu a. Ajiak van masa leh lei masa apaimangta a, tuipi zong a omnawn kei hi.

²Tuachi`n kei Johan in khuapi siangthou, Jerusalem thak pen, mou apasal a ding a kijem bang a bawlzohsa-a Pasian a kipan a van a pat a hung kumsuk kamu hi.

³Tualeh van a pat in aw ngaihtak khat in, “Ngaiin, Pasian biakbuk mihingte lak ah a omta hi! Amah pen alak uah ateng ding a; amauh pen amite ahi ding ua, Pasian amah mah akiang uah aom ding a, tualeh a Pasian uh ahi ding hi.

⁴Tualeh Pasian in amit ua pat khitui jousiah a siaksiangsak ding hi. Sihna a omnawn kei ding a; lungkhamna leh kahna leh natna zong a omnawn kei ding hi, ajiak sil masa tengteng a paimangta hi,” achih kaja hi.

⁵Tualeh laltouna tung a tou-pa in, “Ngaiin, sil jousiah ka siamthakta hi!” achi hi. Tualeh aman ka kiangah, “Gelh in, ajiak hih thute adik in agin-om ahi,” achi hi.

⁶Tuachi`n aman ka kiangah, “Hih bawlkhit ahita! Kei Alpha leh Omega, abul leh atawp ka hi. Dangtak jousiah kiangah hinna tui luikhuk a om amawknan ka pia ding hi.

⁷Kuahileh agualjoutu in sil jousiah aluah ding a: Tualeh a Pasian ka hi ding a, amah zong ka tapa ahi ding hi.

⁸Hinanleh meipuahte, gingtaloute, kihdak omte, tualthatte, nu leh pa kal a thangtatte, bumsiamte, milim biate leh juau hatte jousiah tanding pen mei leh kaat a kang meidil ahi a, huapen sihnihna ahi.”

⁹Tuachi`n gawtna nunung sagihte a dim belhbu sagih nei vantungmi sagihte lak a khat ka kiangah hungpai in ahung houpih a, “Hungpaiin, Mou, Belamnou zi kung ensak ding hi,” achi a.

¹⁰Tualeh aman Kha in mualsang leh liantak khat tungah ahung paipihta a, tualeh hua khuapi thupitak, Jerusalem siangthou, Pasian a kipan a van a pat a hung kumsuk ahung ensak hi.

¹¹Pasian thupina nei a avaak pen suangmantam pen bang, jasper suang bang ahi a, kristal suang bang a siang ahi.

¹²Tualeh aman kulhbang thupitak leh sangtak zong anei a. Kong sawmlehnih anei a, tualeh hua kong sawmlehnihte ah vantungmi sawmlehnih aom hi, tualeh hua kongte tungah min kigelh a om a, huate pen Israel nam sawmlehnihte min ahi.

¹³Suahlam ah kongpi thum, mallam ah kongpi thum: simlam ah kongpi thum tumlam ah kongpi thum aom hi.

¹⁴Tualeh kulhbang in nuaiphah sawmlehnih anei a, tualeh huate tungah Belamnou sawltak sawmlehnihte min atuang hi.

¹⁵Tualeh amah kei hunghoupihpa`n khuapi a kotte leh akulhbang tehna dingin tehna kham pumpeng chiang atawi hi.

¹⁶Tualeh hih khuapi in ningli anei a, adunglam pen availam chia ahi a. Tualeh aman hua pumpeng chiangin hua khuapi pen ateh a: farlong sangsawm leh sangnih; adunglam leh availam leh asandan akibang hi.

¹⁷Tuachi`n aman kulhbang ateh a, mihing tehna a teh in, (huapen vantungmi tehna ahi a) “tong jakhat leh tong sawmli leh li ahi.”

¹⁸Kulhbang pen jasper suang a kibawl ahi a, akhuapi pen kham siang a kibawl limlang siang bang ahi.

¹⁹Tualeh kulhbang nuaiphah pen suangmantam chiteng a kijem ahi. Nuaiphah masapen tuh jasper suang ahi a, anihna saphire suang ahi a, athumna kalsidonia suang ahi a, alina emerald suang ahi a,

²⁰a ngana sardonik suang ahi a, a gukna sardia suang ahi a, a sagihna krisolit suang ahi a, a giatna beril suang ahi a, a kuana topaz suang ahi a, a sawmna krisoprase suang ahi a, a sawm leh khatna jasinth suang ahi a, a sawm leh nihna amethist suang ahi.

²¹A kot sawm le nihte pen tuikepsuang sawm leh nihte ahia, akotteng pen tuikepsuang khatchiat a bawl ahi a. Tualeh khuapi lamlian pen limlang etpailet theih bang kham siang set a kibawl ahi.

²²Hinanleh huasan ah tempul kamu kei a, ajiak pen Toupa Pasian hattungnung leh Belamnou pen a tempul uh ahimai hi.

²³Hua khuapi in Ni apoimoh kei a, kha zong apoimoh kei hi. Pasian thupina in hih pen ataanvak a, Belamnou pen ameivak ahimai hi.

²⁴Tualeh hundam a om namte pen hua va`k ah ava`k ding ua, tualeh leitung kumpipate`n athupina uh leh azah omna uh apualut ding uhi.

²⁵A kotte pen sun in a kikhak ngaikei ding hi; ajiak pen huamun ah jan aom ngaikei ding hi.

²⁶Tualeh amau`n huasung ah namte thupina leh zah-omna ahung pualut ding uhi.

²⁷Hinanleh huasung ah bangchik mah in silsianglou, ahihkeileh kihdakhuai leh juaubawl mawng mawng alutkei ding a. Hinanleh Belamnou laibu a min kigelhte guak alut ding uhi.