Read Thangal Naga KILAKNA 22 Bible Online

KILAKNA 22 - Thangal Naga bible

KILAKNA 22

¹Tualeh aman Hinna tui lui chimtak, kristal suang bang a siang, Pasian leh Belamnou laltouna a pat a hung luangkhia ahung ensak a

²kongjing laijang leh luiningtuak ah agah chituam tuam sawm leh nih nei, tualeh khateng a gah hinna singkung a om a, tualeh hua singgah pen namte sukdamna ding ahi.

³Tualeh huasan ah hamsia mawng mawng a om nawnkei ding a. Hinanleh Pasian leh Belamnou laltouna a omjawta ding hi, tualeh a silate`n a nna a sem ding uhi.

⁴Amau`n amah a mu ding ua, amin pen atal uah atuang ding hi.

⁵Huasan ah jan a om nawn kei ding a, meivak leh nivak zong a ngainawn kei ding uhi, ajiak Toupa Pasian in amauh a salhvak ding a, tualeh mau`n tangtawn tangtawn in vai ahawmta ding uhi.

⁶Tuachi`n aman ka kiangah, “Hih thute agin-om in adik ahi, tualeh Jawlnei siangthou Toupa Pasian in sil hung ompai dingte a silate musak dingin a vantungmi asawlta hi.”

⁷“Ngaiin! Kung paipah ding hi! Hih laibu a genkholhna juitaphot ahampha uhi!”

⁸Tualeh kei, Johan in, hih silte ka mu a, kaja hi. Tualeh kaja`k a ka muhtak in, hih silte hung musaktu vantungmi kengbul ah bia dingin ka pukta hi.

⁹Tuachi`n aman ka kiangah, “En in hihbang na bawlthei kei ding hi! Keipen nang leh na unau Jawlneite leh hih laibu a thu kigente juite na sila tanpih ka hi; Pasian bia in!” achi hi.

¹⁰Tualeh aman ka kiangah, “Hih laibu a genkholhna thute khakkhum ken, ajiak ahun atung ding ahita hi.

¹¹Kuahileh midiklou pen diklou in omden hen, kuahileh abuah pen abuah in omden hen, kuahileh midiktat pen diktatjing hen, kuahileh a siangthou pen siangthou jing hen.”

¹²Tualeh, “Ngaiin! Kung paipah ding hi! Tualeh michih a nasep bangbang ua piak ding ka nuamman ka kiangah a om hi.

¹³Kei Alpha leh Omega, apatna leh atawp amasapen leh anunung pen ka hi.”

¹⁴Hinna singkung a tan aneihtheihna ding uleh kot a khuapi sung a aluttheihna ding ua hih thupiak bawlte pen ahampha uhi.

¹⁵Hinanleh apualam ah uite, bumhatte, nu leh pa kal a thangtatte, tualthatte, milim biate, tualeh kuapeuh juau ngaina leh bawlte a om uhi. [3]

¹⁶“Kei Jesu in Saptuamte ding a hih thute na kiang ua hungtheisak dingin ka vantungmi kungsawl hi. Kei David jungjam leh a suan; tualeh Jingsol aksi taang pen ka hi,” achi hi.

¹⁷Tualeh tua Kha leh tua Mou in, “Hungpai in!” achi uhi. Tualeh aja taphot in, “Hungpai in!” chi uhen. Tualeh Kuapeuh a dangtak tuh hungpai hen. Tualeh a ut taphot in hinna tui amawkna in la hen.

¹⁸Ajiak kuapeuh hih genkholhna laibu a thute ja taphot kiangah ka theisak ahi: mi kuapeuh in hih thute abehlap leh, Pasian in hi laibua kigelh gawtnate atung ah abehlap ding hi.

¹⁹Tualeh mi kuapeuh in hih genkholhna laibu thute a pat alakmang leh hinna laibu leh khuapi siangthou, tualeh hih laibu a kigelh silte a pat atan ding pen Pasian in a lakmangsak ding hi.

²⁰Hih thute theisaktu in, “Pellou in! Kung paipah ding!” achi hi. Amen. Hungpai in Toupa Jesu aw!

²¹I Toupa Jesu Krist hehpihna na kiang uah omta hen. Amen.