Read Thangal Naga KILAKNA 3 Bible Online

KILAKNA 3 - Thangal Naga bible

KILAKNA 3

¹“Tualeh Sardis saptuam vantungmi kiangah hichi`n gelh in: “Pasian kha sagih leh aksi sagih neipa in hihthute agen hi. Na nasep ka thei hi; hing min napua a, hinanleh asi na hi!

²Kiveng inla, tualeh sil omnalai siding a kisate hatsak in, ajiak pen na nasep Pasian maiah a bukim in ka thei kei hi.

³Tuajiakin na muhdan leh na jakdan theigige inla; tukip in, tualeh kisik in. Huachia na kiveng kei leh guta bangin na kiang ah kungpai ding a, tualeh bangchik hun a na kiang kungtun ding na theikei ding hi.

⁴Sardis khua ah a puante uh ninsaklou min tawmnou khat nanei a; tualeh amauhte pen kei tawh, puankang silh in aleng ding uh, chitna aneih jiak un.

⁵Kuahileh agualjoupa pen puankang silhsak ahi ding a, tualeh amin uh pen hinna laibu a pat ka thaimang kei ding; ka Pa mai leh a vantungmite mai ah kagum ding hi.

⁶“Kuahileh bilnei jousiahin saptuamte kiang a kha thugen ja hen! chi in.

⁷“Tualeh Philadelphia khua a vantungmi kiangah hichin gelh in: “Amah siangthou leh dik, amah David chabi neipa, ahon chiang a kuaman a khaktheihlouh, a khak chiang a kuaman a hontheihlouhpa in hih thute agen hi.

⁸Na nasep ka thei hi, en in, na maiah kuaman a khaktheihlouh, kong kihong ka koih hi. Ajiak pen thahatna neunou khat nanei a, tualeh kamin na kitheihmoh bawl ngaikei hi.

⁹Ngaiin! Setan kikhopna inn a mi Judami hilou pia ka hi chia juau gente, ngaiin huate kungpia a, amauhte pen hungpaiin na kengbul ah kung biasak ding hi. Nang kung it chih atheihna ding un.

¹⁰Ka kuhkalna thu na kepjiak in, leitung a teng mite etkhiat ding a leitung pumpi a hungtung ding ze-etna hun a kipan in ken zong kung vengbit ding hi.

¹¹Ngaiin, kintakin kungpai hi, kuaman na lallukhu ahung laksak louhna dingin na silneihsa pen tukip in.

¹²Kuahileh agualjoupa pen, ka Pasian tempul ah khuam-in ka pangsak ding a; tualeh a pawtkhia ngai nawn mawng mawng kei ding hi. Tualeh atung ah ka Pasian min leh, ka Pasian khuapi thak Jerusalem, ka Pasian a kipan a van a pat a hung kumsuk min ka gelh ding a, atung ah kamin thak ka gelh ding hi.

¹³“Kuahileh bilnei jousiahin saptuamte kiang a kha thugen ja hen!

¹⁴“Tualeh Laudisia saptuam vantungmi kiangah hichin gelh in: “Amen, theihpihtu gin-om leh diktat, Pasian silsiam bul in hihthute agen hi.

¹⁵“Na nasep ka thei hi; lum lah lumlou, votlah votlou in na om hi. Na vot hiam na sat hiam a na om ka deih hi!

¹⁶Tuachia, lum pelhpulh a, sat lah salou vot lah votlou a na om jiakin, ka kam a pat kung siakhia ding hi!

¹⁷Ajiak pen nangman, Ka hausa a, hauhsatna ka neita, bangmah ka tasam nawnkei, nachi a, tualeh migenthei, haksa-thuakmi, mijawng, mittaw leh guaktang na hihlam na kithei kei hi.

¹⁸Nung hauhsat theihna dingin kham meia halchim leh na guaktang jumhuaina a kilaklouhna dingin nasilh ding puankang leh, na muhtheihna ding a namit na nuh ding mitna lou ka kiang a pat lei dingin kung deihsak hi.

¹⁹Ka it mahmahte pen katai a, ka soisa hi. Tuajiakin, thathou inla, kisik in.

²⁰Ngaiin! kotbulah dingin, ka kiu hi; mi khatpeuhin ka aw ajak a kot ahon leh, amah kiangah ka lut ding a amah tawh nitak an kane ding a, tualeh aman zong keitoh ane ding hi.

²¹A gualjoupa pen ka kiangah ka laltouna ah ka tousak ding a, kei zong ka gualzoh a ka Pa tawh a laltouna a ka tou mahbang in.

²²“Kuahileh bilnei jousiahin saptuamte kiang a kha thugen ja hen!”