Read Thangal Naga KILAKNA 5 Bible Online

KILAKNA 5 - Thangal Naga bible

KILAKNA 5

¹Tualeh amah laltouna tung a tou-pa jiatlam ah asunglam leh a nunglam a kigelh chiamtehna sagih a kichiamteh laibujial khat kamu hi.

²Tuachi`n vantungmi khat aw ngaihtak a kikou a, “Kua ahia laibujial pen hong a hua chiamtehna omte phel ding a taak?” chi kamu hi.

³Tualeh van ah hin leiah hileh, tualouin leinuaiah hitaleh hua laibujial hongthei leh atung enthei mi kuamah aom takei hi.

⁴Tuachi`n hua laibujial hong ding leh sim ding hiam ahihkeileh atung entaak mi kuamah ka muhlouh jiakin hahkah in ka kapta hi.

⁵Hinanleh upate lak a khat in ka kiangah, “Kap ken. Ngaiin! Judah nam a humpinelkai, David jung in, hua laibujial pen, hong ding leh hua chiamtehna sagihte phel ding in ajouta hi,” achi hi.

⁶Tualeh ka etleh, ngaiin, laltouna leh ganhinglite laiah leh upate laiah thahsa hileh kilawm Belamnou, kii sagih leh mit sagih nei ding kamu a. Huate pen Pasian kha sagih leitung pumpi a sawlkhiatte ahi uhi.

⁷Tuachi`n amah a hungpai a laltouna tung a tou-pa khut jiatlam a pat in laibujial pen alata a.

⁸Tualeh laibujial pen alaktak in, ganhing lite leh upa sawmnih leh lite pen Belamnou maiah akhupbok ua, kaihging leh gimnamtui a dim kham belhbu atawi chiat ua, huapen misiangthoute thumna ahi.

⁹Tualeh amau`n lathak khat asa ua: “Nang pen laibujial la a, hua chiamtehna pheltaak na hi, ajiak pen thah in na om a, chichin hamchin, michin leh namchin a pat mite na sisan in Pasian a dingin nungtanta hi.

¹⁰Tualeh i Pasian kiangah lalte leh siampute in nung bawlta hi, tualeh leitung ah vai ahawm ding uhi,” chi in.

¹¹Tuachia ka etleh, laltouna leh ganhing lite leh upate kimkot ah vantungmite aw tampi kaja a! Atamdan uh pen sangsawm mun sangsawm leh asang asang a tampi ahi uh,

¹²tualeh, “Thah a om Belamnou pen thuneihnate, hauhsatnate, pilnate, thahatnate zahnate, thupinate leh gualjawlnate tangtaak ahi!”

¹³Tualeh van a om, leia om, leinuaia om leh, tuipi sung a om ganhing jousiahin: “Laltouna tung a tou-pa leh Belamnou kiangah, gualjawlnate, zahnate, thupinate leh thuneihnate, tangtawn tangtawn in omjingta hen!” achih uh kaja hi.

¹⁴Tuachi`n ganhing lite`n, “Amen!” achi ua. Tualeh upa sawmnih leh liten khupbok in amah tangtawn tangtawn a hingjingpa pen abiata uhi.