Read Thangal Naga KILAKNA 8 Bible Online

KILAKNA 8 - Thangal Naga bible

KILAKNA 8

¹Tualeh aman chaimtehna sagihna aphelzoh in, dakkal lang sung ding bang vantung asip dingdeng hi.

²Tualeh vantungmi sagih Pasian mai a ding kamu a, akiang uah pengkul sagih piak ahita uhi.

³Tuachi`n vantungmi dang khat a hungpai a gimnamtui halna kham bawm tawiin maitam bul ah ading hi. Tualeh a kiang ah laltouna mai a kham maitam tung a misiangthoute thumna tawh alatkhawm dingin gimnamtui tampi piak ahi hi.

⁴Tualeh gimnamtui khu pen misiangthoute thumna tawh kijawk in vantungmi khut a pat in Pasian maiah ajamtouta hi.

⁵Tuachi`n vantungmi in gimnamtui halna ala a maitam meiin a thundim a leitung ah a paikhiata hi; tualeh huasan ah awte, vanpi gingte, tunphete leh jinlingte ahung omta hi.

⁶Tuachi`n vantungmi sagih pengkul sagih neiten mut ding in a kisata uhi.

⁷Vantungmi khatna in amut a. Gial leh mei, sisan tawh kihal ahung omta a, huate leitung ah paihkhiat in aom a. Singkung sehthum suah sehkhat akangtum a, tualeh hampa hing jousiah a kangtumta hi.

⁸Tuachi`n vantungmi nihna in amut a. Mei a kang, mual lianpi hileh kilawm, tuipi ah paih in aom a. Tualeh tuipi sehthum suah sehkhat sisan ahung suakta hi,

⁹tualeh tuipi a om hinna nei ganhingte pen sehthum suah sehkhat asita ua, tualeh longpi zong sehthum suah sehkhat asiata hi.

¹⁰Tuachi`n vantungmi athumna in amut a. Tualeh aksi lianpi khat meisel bang a kuang, van a pat in ahung kiasuk a, luidungte sehthum suah sehkhat leh tuinakte tungah atu a.

¹¹(Hua aksi min pen “Gamsai” ahi.) Tualeh tuipi sehthum suah sehkhat gamsai ahung suakta a, tualeh hua tui khatsak ahihjiak in mi tampi asita hi. [1]

¹²Tuachi`n vantungmi alina in amut a. Ni sehthum suah sehkhat, kha sehthum suah sehkhat, aksi sehthum suah sehkhat suksiat in a omta a, tuachi`n sehthum suah sehkhat mialsak a aom ta`k mahbang in, sun pen sehthum suah sehkhat vaklouin a om a; jan zong huachimah bang in.

¹³Tualeh ka etleh, vantungmi khat vanlaijawl a leng a aw ngaihtak a, vantungmi thum in amut ding, hua pengkul gin hung om nalai dingte jiak in, “Leia omte tung agik, agik, agik hi!” Achih kaja hi.