Read Thangal Naga KILAKNA 9 Bible Online

KILAKNA 9 - Thangal Naga bible

KILAKNA 9

¹Tuachi`n vantungmi ngana in amut a. Aksi khat van a pat a leia kiasuk kamu a, tualeh a kiang ah kuakhuk tawbei chabi piak in a om hi.

²Tualeh aman kuakhuk tawbei pen a hong a, tualeh hua kuakhuk a pat in haltuina mei nasatak khu bangin meikhu ahung pawtkhia a, tualeh hua kuakhuk a meikhu jiakin ni leh vanlaijawl ahung mialta hi.

³Tuachi`n hua meikhu lak a pat in kauphe leitung ah ahung pawtkhia a, lei a mom-aite hatna bang hatna akiang uah piak ahi uhi.

⁴Amauh pen a taltang ua Pasian chiamtehna neiloute guak chihlouh leia hampa hiam silhing hiam, ahihkeileh singkung mawng mawng susialou ding a thupiak ahi uhi.

⁵Tualeh amauh pen huate that ding a hatna piak ahikei ua, hinanleh kha nga sung bawlgenthei ding a piak ahi uhi. Tualeh abawl gentheihna uh pen mom-ai in mi apeh chiang a anat bang ahi.

⁶Huani chiangin mi`n sihna ajong ding ua hinanleh amukei ding uhi, sih a utding ua hinanleh sihna in amauh a taimangsan ding hi.

⁷Kauphe mel pen gal kuan ding a mansa a om sakolte bang ahi uh. A lutung uah kham tawh kibang lallukhu hileh kilawm aom a; amaite uh mihing mai abang hi.

⁸Amau`n numei sam bang sam anei ua, tualeh aha uh humpinelkai ha bang ahi.

⁹Tualeh amau`n sik awmphaw bang awmphaw anei ua, akhajap gin uh galdou ding a kuan sakolleng tampi ging bang ahi.

¹⁰Amau`n mom-ai bangin mei anei ua, ameiah gu aom a, tualeh agu hatdan pen mihingte kha nga sung ahihna thei hi.

¹¹Tualeh amau`n kuakhuk tawbei vantungmi pen kumpipa in anei ua; Amin Hebrai hamin Abaddon ahi a, Grik hamin Appolion ahi, (“Hihsiapa chihna ahi”). [2]

¹²Tunggikna khat abeita. Tunggikna nih hungpai ding a omlai hi.

¹³Tuachi`n vantungmi gukna in amut a. Tualeh Pasian maia om kham maitam ki lite a pat aw kaja a.

¹⁴Pengkul nei vantungmi kiangah, “Euphrate luipi lian a vantungmi li hen a omte sut in!” chi in.

¹⁵Tuachi`n adakkal leh, ani leh, akha leh, akum, huntak a mihing sehthum suah sehkhat that ding a mansa a kikoih vantungmi lite khah in a omta hi.

¹⁶Tualeh hua sakol tungtuang galkap mite tamdan maktaduai zanih ahi uh: aphakzah uh kigen kaja hi.

¹⁷Tualeh hichibang in mangmuhna in: sakolte leh atung a tuang mei bang a san engdup leh kaat bang a eng awmphaw neite kamu a. Tualeh hua sakolte lutang pen humpinelkai lutang bang ahi a, tualeh akamsung ua pat in mei leh meikhu leh kat apawtkhia hi.

¹⁸Hih gawtna thumte akam ua pat a hung pawtkhia mei leh meikhu leh kaat in mihingte sehthum suah sehkhat thah in a omta hi.

¹⁹Ajiak ahatnate uh pen akam uh leh ameidawn ua om ahi a. Amei uh pen gul tawh kibang ahi a, lutang anei ua; huate a mi a suknat uh ahi.

²⁰Hinanleh hih gawtnate-a silou midangte pen dawite leh mu lah mutheilou, ja lah jatheilou, pai lah paitheilou, kham milimte, daan, sumsan, suang leh sing milimte a biaklouhna ding ua a khut ua a silbawlte uh tawpsan dingin a kisik tuankei uhi.

²¹Tualeh a tualthahna uleh, a mibumna uleh, a angkawmna uleh, a guktatna uapan a kisik tuankei uhi.