Read תרגום יונתן בן עוזיאל - The Targum of Jonathan Ben Uzziel בְּרֵאשִׁית‎ 12 Bible Online

בְּרֵאשִׁית‎ 12 - תרגום יונתן בן עוזיאל - The Targum of Jonathan Ben Uzziel bible

בְּרֵאשִׁית‎ 12

¹ואמר ייי לאברם איזל לך מארעך אתפרש מן ילדותך פוק מבית אבוך זיל לארעא דאחזינך

²ואעבדינך לעם רב ואיבריכינך וארבי שמך ותהי מברך

³ואבריך ית כהניא דפרסין ידיהון בצלו ומברכין ית בנך ובלעם דמלטט יתהום אילוט ויקטלוניה לפיתגם דחרב ויתברכון בך כל זרעית ארעא

⁴ואזל אברם היכמה דמליל ליה ייי ואזל עימיה לוט ואברם בר שובעין וחמש שנין במיפיקיה מחרן

⁵ודבר אברם ית שרי אינתתיה וית לוט בר אחוי וית כל קיניינהום דיקנו וית נפשתא דיגיירו בחרן ונפקו למיזל לארעא דכנען ואתו לארעא דכנען

⁶ועבר אברם בארעא עד אתר שכם עד מישר דהוה מיירי וכנענאי בכין הוו בארעא דעד כדון לא מטא זימנא דבני ישראל למירתא

⁷ואיתגלי ייי לאברם ואמר לבנך אתין ית ארעא הדא ובנא תמן מדבחא קדם ייי דאיתגלי ליה

⁸ואיסתלק מתמן לטורא דממדנח לביתאל ופרסיה משכניה ביתאל מן מערבא ועי ממדינחא ובנא תמן מדבחא קדם ייי וצלי בשמא דייי

⁹ונטל אברם אזיל ונטיל לדרומא

¹⁰והוה כפנא בארעא ונחת אברם למצרים לאיתותבא תמן ארום תקיף כפנא בארעא

¹¹והוה כמא דקריב למיעל לתחום מצרים ומטו לנהרא וגליאו בשריהון למיעבר ואמר אברם לשרי אינתתיה הא עד כדון לא איסתכלית בבישריך וכדון ידעית ארום אינתתא שפירת חזו אנת

¹²ויהי ארום יסתכלון ביך מצראי ויחמון ית שופריך ויימרון אינתתיה דא ויקטלון יתי ויתיך יקיימון

¹³אימרי בבעו דאחתי אנת בגין דייטב לי בגיניך ותתקיים נפשי אמטולתיך

¹⁴והוה כדי על אברם למצרים וחמון מצראי ית אינתתא ארום שפירא היא לחדא

¹⁵וחמון יתה רברבי פרעה ושבחו יתה לפרעה ואידברת אינתתא לבית מלכותא דפרעה

¹⁶ולאברם אוטב פרעה בגינה והוו ליה מדיליה עאן ותורין וחמרין ועבדין ואמהן ואתנין וגמלין

¹⁷וגרי מימר דייי בפרעה מכתשין רברבין וית אינש ביתיה על עיסק שרי איתת אברם

¹⁸וקרא פרעה לאברם ואמר מה דא עבדת לי למא לא חוית לי ארום אינתתך היא

¹⁹למא אמרת אחתי היא ודברית יתה לי לאינתו ומן יד איתגריאת בי מכתשא ולא קריבית לותה וכדון הא אינתתך דבר ואיזל

²⁰ופקיד עילוי פרעה גוברין ואלויאו יתיה וית אינתתיה וית כל דיליה