Read תרגום יונתן בן עוזיאל - The Targum of Jonathan Ben Uzziel וַיִּקְרָא‎ 10 Bible Online

וַיִּקְרָא‎ 10 - תרגום יונתן בן עוזיאל - The Targum of Jonathan Ben Uzziel bible

וַיִּקְרָא‎ 10

¹ונסיבו בני אהרן נדב ואביהוא גבר מחתיתיה ויהבו בהון אישתא ושויאו עלה קטורת בוסמין וקריבו קדם ייי אישתא נוכרתא מן תפיין מה דלא פקיד יתהון

²ונפקת שלהובית אישתא מןקדם ייי ברגז ואיתפליגת לארבעתי חוטין ואעלת בגוא אפיהון ואוקידת ית נשמתהון ברם גופיהון לא איתחרכו ומיתו קדם ייי

³ואמר משה הוא דמליל ייי עימי בסיני למימר בדיקריבין קדמי אנא מקדש משכנא דאין לא מזדהרין בעיבידת קורבניא אוקידינון בשלהובית אשתא מןקדמוי מטול דעל מיחמי כל עמא איתיקר ושמע אהרן ושתיק וקבל אגר טב על משתוקיה

⁴וקרא משה למישאל ולאלצפן בנוי דעוזיאל ליואי חביבא דאהרן ואמר להון קריבו טולו ית אחיכון מן קודשא ותסוברונון למברא למשריתא

⁵וקריבו וסוברונון באונקלוון דפרזלא בכיתונהון וקברונון למברא למשריתא היכמא דמליל משה

⁶ואמר משה לאהרן ולאלעזר ולאיתמר בנוי רישיכון לא תרבון פרוע ולבושיכון לא תבזעון ולא תמותון ביקידת אישתא ועילוי כל כנישתא יהי רוגזא ברם שתוקו ותזכון ית דינא עליכון ואחיכון כל בית ישראל יבכון ית יקידתא דאוקד ייי

⁷ומתרע משכן זימנא לא תיפקון דילמא תמותון ארום משח רבותא דייי עליכון ועבדו הי כפיתגמא דמשה

⁸ומליל ייי עם אהרן למימר

⁹חמר וכל מידעם מרוי לא תשתי אנת ובנך עימך ביזמן מיעלכון למשכן זימנא היכמה דעבדו בנך דמיתו ביקידת אישתא קים עלם לדריכון

¹⁰ולאפרשא ביני קודשא וביני חולא וביני מסאבא וביני דכיא

¹¹ולאלפא ית בני ישראל ית כל קיימייא דמליל ייי להון בידא דמשה

¹²ומליל משה עם אהרן ועם אלעזר ועם איתמר בנוי דאישתיירו מן יקידתא סיבו ית מנחתא דאישתיירת מקורבנייא דייי ואיכלוה פטיר בסטר מדבחא ארום קודש קודשין היא

¹³ותיכלון יתה באתר קדיש ארום חולקך וחולק בנך היא מקרבניא דייי ארום הכדין איתפקדית

¹⁴וית חדיא דארמותא וית שקא דאפרשותא תיכלון באתר דכי אנת ובנך עימך ארום חולקך וחולק בנך איתיהיבו מניכסת קודשיא דבני ישראל

¹⁵שקא דאפרשותא וחדיא דארמותא על קורבני תרביא ייתון לארמא ארמא קדם ייי ויהי לך ולבנך עימך לקיים עלם היכמא דפקיד ייי

¹⁶תלתא צפיריא איתקריבו ביומא ההוא צפירא דריש ירחא וצפירא דחטאתא דלעמא וצפירא דחטאתא דקריב נחשון בר עמינדב לחנוכת מדבחא אזל אהרן ובנוי ואוקידו תלתיהון אתא משה ותבע ית צפירא דחטאתא די לעמא ותבעיה והא איתוקד ורתח על אלעזר ועל איתמר בנוי דאהרן דאישתיירו למימר

¹⁷מדין לא אכלתון ית חטאתא באתר קדיש ארום קודשין היא ויתה יהב לכון למישרי על סורחנות כנישתא לכפרא עליכון קדם ייי

¹⁸הא לא איתעל מן אדמון לות קודשא גוואה מיכל תיכלון יתה בקודשא היכמא דאתפקדית

¹⁹ומליל אהרן עם משה הא יומא דין קריבו בני ישראל ית קרבן חטאתהון ועלוותהון קדם ייי וארע יתי סקול כאילין בתרין בניי הלא מעשרא תניינא איתפקד די לא למיכול אביל מיניה כל דכן קרבן חטאתא ומה אילו אשתליית ואכלית מן קרבן חטאתא יומא דין אוף תרין בניי דאשתיירו הוה להון מן דינא דייתוקדון דלית אפשר דישפר קדם ייי

²⁰ושמע משה ושפר קודמוי ואפיק כרוזא במשריתא למימר אנא הוא דאתעלמת הילכתא מיני ואהרן אחי אדכר יתיה לי