Read תרגום יונתן בן עוזיאל - The Targum of Jonathan Ben Uzziel בְּמִדְבַּר‎ 17 Bible Online

בְּמִדְבַּר‎ 17 - תרגום יונתן בן עוזיאל - The Targum of Jonathan Ben Uzziel bible

בְּמִדְבַּר‎ 17

¹ומליל ייי עם משה למימר

²אמר לאלעזר בר אהרן כהנא ויפרש ית מחתיא מן בני יקידיא וית אישתא בדרי להאל ארום אתקדשא

³ית מחתיית חייבייא האילין דאתחייבו קטול בנפשתהון ויעבדון מנהון רדידי טסין חפיי למדבחא ארום קריבינון קדם ייי ואתקדשו ויהון לאת לבני ישראל

⁴ונסיב אלעזר כהנא ית מחתיית נחשא דקריבו יקידיא ורדידינון חפיי לגופה דמדבח דמן שירויא הוון תשמישתיה דמדבחא

⁵דוכרנא לבני ישראל מןבגלל דלא יקרב גבר חילוניי דלא מן בני אהרן לאסקא קטורת בוסמין קדם ייי ולא יהי גבר מתנטל למיפלוג על עיסק כהונתא כקרח וככנישת סעדוי וסופיה להובדא ולא כמיתותא דקרח וככנישתיה ביקידת אישא ובליעת ארעא אלהין למלקי בסגירותא היכמא דמליל למשה שוי ידך בעיטפך ולקת ידיה בצורעא הכדין ימטי ליה

⁶ואתרעמו כל כנישתא דבני ישראל ביומא חרן על משה ועל אהרן למימר אתון גרמתון דין מותא על עמא דייי

⁷והוה באתכנשות כנישתא על משה ועל אהרן למקטלהון ואתפניו למשכן זימנא והא חפייה ענן איקר שכינתא ואיתגלי תמן איקרא דייי

⁸ועל משה ואהרן מןקדם קהלא לתרע משכן זימנא

⁹ומליל ייי עם משה למימר

¹⁰איתפרשו מיגו כנישתא הדא ואישצי יתהון כשעא זעירא ואתרכינו בצלו על אפיהון

¹¹ואמר משה לאהרן סב ית מחתיא והב עלה אישתא מעילוי מדבחא ושוי קטרת בוסמין על אישתא ואוביל בפריע לות כנישתא וכפר אמטולהון ארום נפק מחבלא דאתכלי בחורב דשמיה קצף מןקדם ייי בהרמנא שרי לקטלא

¹²ונסיב אהרן היכמא דמליל משה ורהט למצע קהלא והא שרי קצף מחבלא לחבלא בעמא ויהב ית קטורת בוסמין וכפר על עמא

¹³וקם ליה אהרן בצלו במצע ועבד מחיצותא במחתייתא ביני מיתיא וביני חייא ואתכליית מותנא