Read Ȧŋlemrȧnɛ Ȧfu Mathiu 10 Bible Online

Mathiu 10 - Ȧŋlemrȧnɛ Ȧfu bible

Mathiu 10

¹kɔ tela ro ŋɔŋ aŋkarande ŋɔŋ tɔfɔt ŋarǝŋ, ɔ sɔŋ ŋa afɔsɔ rokɔm ka aŋkǝrǝfi alǝs tǝ kǝwura ŋa ka afǝm, dɛ yi tǝ kǝyeŋkǝs rǝtu o rǝtu.

²Ɔwa ames ma aŋsom tɔfɔt ŋarǝŋ mi ame; Ɔtɔtɔkɔ, Saymɔnȧŋ, ɔwe a bont Pita, yi ɔwɔnt kɔŋ Andru. Yemǝsȧŋ ɔwan ka Sɛbidi, dɛ yi Yɔn ɔwɔnt kɔŋ.

³Filipȧŋ, Barthɔlɔmiyuȧŋ, Thɔmɔsȧŋ yi Mathyɔŋ, ɔthonkla ɛfȧk. Yemǝsȧŋ, ɔwan ka Alfiɔs, yi Thȧdiyɔsȧŋ.

⁴Saymɔnȧŋ ɔwe ro Kenan, yi Yudas Iskariyɔt ɔwe sɔnd kɔ.

⁵Antɔfɔt ŋarǝŋ aŋe-e, ŋa Yisɔs ɔ som, ɔ yamari ŋa, kɔ pa, Te nu kɔ ka tȧbona tǝlɔm, te nu wɔŋ rǝ kǝpet o kǝpet ka aŋSamariya,

⁶kɛrɛ kɔnɛ nu gbo ka talɔmɛ tǝsɔkar ta ȧŋseth ŋa aŋIsrɛl.

⁷Ɔwa ma nǝ kɔnɛ-e, tam nu, nǝ pa, Rȧbȧy ra ro riyana rǝ po fat.

⁸Yenkǝs nu aŋtuy, fethǝr nu aŋa ba arom-e, yokas nu aŋfi-e, wurɔ nu aŋkǝrǝfi. Naŋ nǝ po sɔthɔ rǝ kǝte ram, ɔwa sɔŋ nu rǝ kǝte gbasi ȧrȧm.

⁹Te nu keranɛ abɔŋɔ, akala ȧferȧ, thalɔm akɛm ka ɛbuthu ɛ nu.

¹⁰Te nu keranɛ ɛgbaŋfa ka ȧŋbiyas, te nu keranɛ suma tǝrǝŋ, te nu keranɛ ɛkɔftha thalɔm tǝtǝk, kotȧy-e wuni yɔ mǝpanth ɔ mar sɔthɔ ɛyɛt yɔŋ ɛdi.

¹¹Rǝ kǝpet o kǝpet thalɔm tǝgbɔm o tǝgbɔm mȧ nǝ wɔŋ-e, thɛns ri nu wuni finɔ; ɔwa rǝ mǝ nǝ yianɛ haŋ nǝ wur ri.

¹²Ma nǝ wɔŋ rǝ aseth-e, kori ŋi.

¹³Bepi ȧŋseth aŋ yi afinɔ-e, yɔ mathɔfǝl ma nu mǝ rensa ŋi, kɛrɛ bepi aŋ yi hɛ afinɔ-e, yɔ mathɔfǝl ma nu mǝ kȧl ro nu.

¹⁴Ɔwa wuni o wuni ɔwe te malanɛ nu, ɔwa ɔ te tǝl ȧsim ta nu-e, ma nǝ wur ka ȧŋseth ŋati-e, thalɔm ka kȧpet kati-e, koŋkoŋ kabof ka ȧtȧtək ta nu.

¹⁵Tɛntɛnɛ i kanɛ nu, pǝ tǝ yi ɔfisa ta ȧŋthɔf ŋa ro Sɔdɔm yi ro Kɔmɔra ka ȧŋrey ŋa kagbǝk ɛpa, pǝthasi ta kȧpet kati.

¹⁶Kǝla, i som nu mɔ tǝlɔmɛ kǝtɔŋ ka tȧthɔlu. Tiyȧŋ, yi nu na atempi yereŋ mɔ ɛbok, ɔwa yi nu na athɔfǝl bɛm mɔ tǝpǝrǝm.

¹⁷Kɛrɛ pɛndaf nu afǝm, ȧtesoma-e aŋ tǝ lȧnki nu ka aŋgbǝka, ɔwa aŋ tǝ sapa nu nǝkɛt ka ɛseth yaŋ ɛgbanɛ.

¹⁸Aŋ tǝ kera nu sɔ rodi ka aŋbȧy yi aŋbȧki salata mi, kȧmȧ nǝ yi mǝseri ro ŋaŋ yi ka tȧbona tǝlɔm.

¹⁹Kɛrɛ ma a lȧnki nu-e, te nu soli ta ȧte mǝ nǝ fɔf, kotȧy-e ka ȧŋlɔkɔ ŋati a tǝ sɔŋ nu ȧte mǝ nǝ fɔf.

²⁰kotȧy-e naŋ tha mǝ fɔf, kɛrɛ ɔYina mǝsǝm ka ɔKas ka nu kɔnɔ mǝ fɔf rokor ka nu.

²¹Ɔwɔnt ɔ tǝ lȧnki ɔwɔnt ka rǝfi, ɔwa ɔkas ɔ tǝ lȧnki ɔwan kɔŋ. Ɔwa awuth aŋ tǝ yokar aŋa kom ŋa kȧmȧ aŋ yɔ a dif ŋa.

²²Afǝm bɛ aŋ tǝ gbɛŋa nu salata ȧŋes a mi, kɛrɛ ɔwe mǝ muyu haŋ ka ɔthalnɛ-e, kɔnɔ kati ɔ tǝ kisi.

²³Bepi a sompa nu ka kȧpet ake-e, gbukɛ nu nǝ kɔ ka kȧlɔm. Tǝ tɛntɛnɛ i kanɛ nu, nǝ gbǝli hɛ po kori tapet ta aŋIsrɛl bɛ haŋ ɔWan ka wuni ɔ po der.

²⁴Ukarande ɔ thas hɛ ɔkarmɔkɔ kɔŋ, thalɔm ȧbɔy ɔ thas hɛ ɔmarki kɔŋ.

²⁵Ɔbeki ta ɔkarande tǝ kǝyi mɔ ɔkarmɔkɔ kɔŋ, dɛ yi ȧŋbɔy mɔ ɔmarki kɔŋ. Bepi a po bont ɔmarki kɔŋ, dɛ yi ȧŋbɔy mɔ ɔmarki kɔŋ. Bepi a po bont ɔmarki ka ȧŋseth Biyɛlsibɔb-e, pǝ tha gbethi ŋaŋ aŋa yi ka kabɔr kɔŋ.

²⁶Tiyȧŋ te nu nesa ŋa, kotȧy-e tȧy tǝgbǝpǝr tǝ yi hɛ ȧte mǝ a te ba kǝgbǝpǝri; ɔwa tȧy tǝmaŋknɛ tǝ yi hɛ ȧte mǝ a te ba kǝŋaibi.

²⁷Ȧtȧ i kanɛ nu ka ɔbi-e, pa ti nu ka ɔwaŋ. Ɔwa ȧte nǝ tǝl ro lǝns-e, tam ti nu ka ɛseth rokɔm.

²⁸Te nesa aŋa mǝ dif aŋdɛr, kɛrɛ aŋ gbǝli hɛ dif aŋesǝm. Kɛrɛ nesa nu kɔn ɔwe gbǝli dim aŋesǝm dɛ yi aŋdɛr ro yahanama.

²⁹A thila hɛ ɛgbaŋa ŋarǝŋ ta apɛni-i? Ɔwa hali ukin ka ŋaŋ ɔ fumpɔ hɛ ro thɔf thambe ɔKas ka nu ɔ tȧrȧ ti.

³⁰Ɔwa hali aŋfon ŋa tabomp ta nu-e, a po lɔm ŋa bɛ.

³¹Tiyȧŋ te nu nesa, nǝ ba mɔlɔ pǝthasi ɛgbaŋa agbȧthi.

³²Wuni o wuni ɔwe mǝ seri ta ȧta mi rodi ka aŋfǝm, minɛ sɔ i ti seri ta atɔŋ rodi ka ɔKas kȧmi ɔwe yi ro riyana.

³³Kɛrɛ wuni o wuni ɔwe mǝ pɛnsanɛ mi rodi ka aŋfǝm-e, minɛ sɔ i ti pɛnsanɛ kɔ rodi ka ɔKas kȧmi ɔwe yi ro riyana.

³⁴Te nanɛ kǝpa i der tǝ kǝsɔŋ mǝthɔfǝl ka ȧdȧru. I der hɛ tǝ kǝsɔŋ mǝthɔfǝl, kɛrɛ i karanɛ agbathɔ.

³⁵kotȧy-e i der tǝ kǝbot mǝputhanɛ kǝtɔŋ ka ɔwan uruni yi ɔkas kɔŋ, kǝtɔŋ ka ɔwan ubɛra yi ɔkara kɔŋ, dɛ yi kǝtɔŋ ka ɔwe balȧ ka ɔwan kɔŋ uruni yi ɔniŋkara kɔŋ.

³⁶Ɔwa aŋtheranɛ ŋa wuni aŋ tǝ yi ka rȧkomra rɔŋ gbeŋ.

³⁷Wuni o wuni ɔwe bɔthǝr ɔkas thalɔm ɔkara pǝthasi minɛȧŋ, ɔ bek hɛ ta ȧtȧ mi. Ɔwa wuni o wuni ɔwe bɔthǝr ɔwan uruni thalɔm ɔwan ubɛra pǝthasi minɛȧŋ, ɔ bek hɛ ta ȧtȧ mi.

³⁸Ɔwa kɔn ɔwe te gbasi akǝnt kɔŋ kǝpǝŋkinɛ, ɔ tȧŋ mi-e, ɔ bek hɛ ta ȧtȧ mi

³⁹Ɔwe mǝ bɛnɛ aŋesǝm ŋɔŋ ɔ tǝ dim ŋi, ɔwa ɔwe mǝ dim aŋesǝm ŋɔŋ salata mi ɔ tǝ fir ŋi.

⁴⁰Ɔwe malanɛ nu ɔ malanɛ mi, ɔwa ɔwe malanɛ mi-e, ɔ malanɛ ɔwe som mi.

⁴¹Ɔwe mǝ malanɛ unabi pǝkasifɛ ɔ yi unabi-e, ɔ tǝ sɔthɔ ȧŋrȧm ŋa unabi, ɔwa ɔwe mǝ malanɛ wuni lompi pǝkasifɛ ɔ yi wuni lompi-e, ɔ tǝ sɔthɔ ȧŋrȧm ŋa wuni lompi.

⁴²Wuni o wuni ɔwe mǝ sɔŋ apɔthi ŋa mȧnt mǝtaŋk tǝ kǝmun ka ukin ka aŋlɔl aŋe pǝkasifɛ ɔ yi ukarande-e, i kanɛ nu tɛntɛnɛ ɔ ba hɛ kǝdim ȧŋrȧm ŋɔŋ.