Read Ȧŋlemrȧnɛ Ȧfu Mathiu 17 Bible Online

Mathiu 17 - Ȧŋlemrȧnɛ Ȧfu bible

Mathiu 17

¹Ɔwa kǝdarǝŋ ka mǝrei tamthǝrukin-e, Yisɔsȧŋ ɔ keranɛ Pitarȧŋ, Yemǝsȧŋ yi Yɔnȧŋ ɔwɔnt kɔŋ, kɔ gbepa ŋa rǝ kǝteŋ kǝbɔli rǝkɔm, ŋa son.

²Ka rabalanɛ rɔŋ rǝ lafthɛ rodi ka ŋaŋ. Ader rɔŋ rǝ gbɛntha mɔ aret, ɔwa ȧsuma tɔŋ tǝ fera mɔ ɔwaŋ.

³Ɔwa kǝla, Mosisȧŋ yi Ilayaŋ aŋ tɔrinɛ ro ŋaŋ, kaŋ fɔfȧnɛ kɔ.

⁴Ka Pitȧŋ ɔ pa, Pa, ɔfinɔ ta ȧtȧ su tǝ kǝyi nɔ. Bepi mǝ selɔ-e, i ti bɛmpa nɔ ɛgbɔm ɛsas, ŋin ta ȧtȧ mu, ŋin ta Mosis, dɛ yi ŋin ta Ilaya.

⁵Ma ɔ yi ka kǝfɔf-e, kǝrǝnt kǝfera kǝgbɛntha kǝ derǝr ŋa; ɔwa rim rǝ wur ka karǝnt, rǝ pa, ƆWan kȧmi ubɔthǝr kɔnɔ ɔwe, ta ɔwe pǝ thesanɛ mi finɔ. Tǝla kɔ nu.

⁶Ma aŋkarande aŋ tǝl ti-e, aŋ gbǝpsa, aŋ nesa ɔthasǝr.

⁷Kɛrɛ Yisɔsȧŋ ɔ der ɔ gboŋ ŋa, ɔ pa, Yokanɛ nu, te nu nesa.

⁸Maŋ ŋata ɛfɔr yaŋ-e, aŋ nənk hɛ wuni o wuni thambe Yisɔsȧŋ son.

⁹Ɔwa mɔ mǝ aŋ thor ka kateŋ-e, Yisɔs ɔ yamari ŋa, ɔ pa, Te kanɛ wuni o wuni mȧnǝnk ama nǝ po nənk haŋ ɔWan ka wuni ɔ kȧl yokanɛ ka rafi.

¹⁰Ka aŋkarande ŋɔŋ aŋ yif kɔ, aŋ pa, kɔyɛŋ aŋkarmɔkɔ aŋ pa Ilaya ɔ ba kǝmɔtha der-e?

¹¹Ka Yisɔsȧŋ ɔ lasi ɔ pa ro ŋaŋ, Tǝ tɛntɛnɛ Ilaya ɔ ba tǝ kǝder, ɔwa ɔ tǝ lompǝs mətȧy bɛ.

¹²Kɛrɛ i kanɛ nu kǝpa, Ilaya ɔ po thɔŋ der, kɛrɛ aŋ tɛ hɛ kɔ, ɔwa aŋ po yɔ kɔ tȧy o tȧy ȧte aŋ yema. Ɔwa yaŋ sɔ ɔWan ka wuni ɔ tǝ nakasi ka mȧta maŋ.

¹³Ka pǝ sɔk aŋkarande ŋɔŋ kǝpa ɔ fɔfȧnɛ ŋa ta Yɔn ɔBaftays.

¹⁴Maŋ bek ka ȧruniya-e, ulaŋgba ɔ der ro ŋɔŋ, ɔ sɔna kɔ tǝwu, kɔ pa,

¹⁵Pa, ba ȧney ta ɔwan kȧmi uruni, ɔ ba kǝtuk, ɔ sɔmpanɛ ɔbaŋ, kotȧy-e ɛlɔkɔ ɛgbathi ɔ fumpɔ ro nȧnt, ɔwa sɔ-e, ɛlɔkɔ ɛgbathi ɔ fumpɔ ro mȧnt.

¹⁶Ka i po kȧrȧ kɔ ka aŋkarande a mu, kɛrɛ aŋ gbǝli hɛ damǝr kɔ.

¹⁷Ka Yisɔsȧŋ ɔ wosa ɔ pa, O rǝkomra ara te lanɛ, rǝgbolŋanɛ, to mǝ i ba kǝwon yi naŋ-e? To mǝ i ba kǝwon tǝ kǝmuyu nu-e? Kara kɔ nɔ ro mi.

¹⁸Ka Yisɔs ɔ ŋal ɔkǝrǝfi, kɔ gbapɛ kɔ, ka ɔwath ɔ sɔthɔ kǝyeŋk mǝdɛr ka ȧŋlɔkɔ ŋati gbeŋ.

¹⁹Ka aŋkarande aŋ der ka Yisɔs mǝnǝŋkanɛ, aŋ pa, kɔyɛŋ saŋ sǝ te gbǝli wurɔ kɔ-e?

²⁰kɔ pa ro ŋaŋ, Salata kate lanɛ ka nu. Tɛntɛnɛ i kanɛ nu, Bepi gbo nǝ ba kǝlanɛ mɔ aluka ŋa amustard nǝ gbǝli pa ka kateŋ ake, Tɔnɛ nɔ mǝ kɔ ro, ɔwa kǝ tǝ tɔnɛ. Ɔwa koko rǝ tui hɛ nu tȧy.

²¹Kɛrɛ awunɔŋ aŋ wur hɛ thambe rǝ kǝramnɛ yi kǝwop asum.

²²Ɔwa maŋ yirȧ ro Kalili-e, Yisɔsȧŋ ɔ pa ro ŋaŋ, A ba kǝlaŋkli ɔWan ka wuni ka mȧta ma aŋfǝm,

²³ɔwa aŋ tǝ dif kɔ, kɛrɛ ka ȧŋrey aŋa bekȧ mǝsas-e, a tǝ yokas kɔ. Ka pǝ nɔsinɛ ŋa ɔthasǝr.

²⁴Maŋ bek ro Kepaniyɔm-e, ŋaŋ aŋa thoŋkla ɛfȧk ya ȧŋseth ŋa Kuru aŋ der ka Pita, kaŋ pa, Ɔkarmɔkɔ ka mu ɔ la hɛ ram ȧdiyɔ?

²⁵kɔ pa, Aŋko. Ma ɔ wɔŋ ro seth-e yeŋka ɔ fɔf rim-e, Yisɔsȧŋ ɔ pa, To mǝ nanɛ-e, Saymɔn? aŋbȧy ŋa ȧdȧru-e ka kanɛ mǝ aŋ sɔthɔ ɛfȧk-e, ka aŋwuth ŋaŋ gbeŋ thalɔm ka atik-e?

²⁶Ɔwa ma ɔ pa, Ka atik, Yisɔs ɔ pa ro ŋɔŋ, Tiyȧŋ aŋwuth aŋ ba hɛ kǝsɔŋ.

²⁷Kɛrɛ kȧmȧ sǝ te yɔ ŋa aŋ pǝnthbǝla-e, kɔnɛ ro baŋ mǝ fitha anǝmp, liŋ kalop ɔwe mɔtha der. Ma mǝ po kanthi kasǝŋ kɔŋ-e mǝ tǝ fir ri akala. Gbasi ŋi ɔwa sɔŋ ŋa ta ȧtȧ mi yi ta ȧtȧ mu.