Read Ȧŋlemrȧnɛ Ȧfu Mathiu 20 Bible Online

Mathiu 20 - Ȧŋlemrȧnɛ Ȧfu bible

Mathiu 20

¹Ȧtesoma-e rȧbȧy ra ro riyana rǝ bȧlȧnɛ mɔ wuni ɔwe ba kǝfus, kɔ wur bǝth bǝth tǝ kǝyamɔ afǝm tǝ kǝyɔ mǝpanth ka akɔr kɔŋ ka yɛt ɛtɛp ɛgbam.

²Ma ɔ po gbanɛ mɔlɔ yi aŋyɔ mǝpanth ta asiliŋ ta arey ŋin-e, ɔ som ŋa ka akɔr kɔŋ.

³Ma ɔ wur ka aŋhawa aŋa bekȧ mǝsas-e, ɔ nənk alɔm aŋ tǝma ka ɔdɛr ɔthila kǝte ba mǝpanth.

⁴kɔ pa ro rɔŋaŋ, Naŋ sɔ-e, kɔ nu ka mapanth ro kɔr, ɔwa i ti sɔŋ nu ara yi rǝlompi. Kaŋ kɔnɛ.

⁵kɔ wur sɔ ka aŋhawa aŋa bekȧ tamthǝrukin yi tamthǝrɛŋanlɛ, kɔ yɔ yi sɔ.

⁶Ka aŋhawa aŋa bekȧ tɔfɔt ŋin, ɔ wur sɔ-e, kɔ bǝp alɔm aŋ tǝma tǝma gbo, ɔ pa ro ŋaŋ, kɔyɛŋ mǝ nǝ tǝma nɔ pali nǝ te yɔ mǝpanth-e?

⁷kaŋ pa ro ŋɔŋ, Pǝkasifɛ wuni o wuni ɔ tha yamɔ hɛ su. Kɔ pa ro ŋaŋ, Kɔnɛ nu sɔ ro kɔr, ɔwa ara yi rǝlompi, rǝ i ti sɔŋ nu.

⁸Ɔwa ma rȧfɔy rǝ bek-e, ɔmarki ka akɔr ɔ pa ka ȧŋbɔy ŋɔŋ ubaki, Tela aŋyɔ mǝpanth, mǝ ram ŋa aŋkala ŋaŋ, mǝ tǝp ka ɔlǝpsɔ mǝ gbanthi ka ɔtɔtɔkɔ.

⁹Ka ŋaŋ aŋa lǝpsɔ wɔŋ ka mapanth aŋ der, aŋ sɔthɔ ukin o kin asiliŋ.

¹⁰Ma aŋtɔtɔkɔ aŋ der-e, aŋ nanɛ kǝpa a tǝ bȧrȧ ŋa, kɛrɛ ŋaŋ sɔ aŋ sɔthɔ ukin o kin asiliŋ.

¹¹Maŋ wop ŋi-e, aŋ fɔfthənɛ ta ɔwe yamɔ ŋa,

¹²aŋ pa, Aŋe-e, ŋa lǝpsɔ wɔŋ ka mapanth, aŋ bulɔ gbo ahawa ŋin. Ɔwa mǝ po yɔ ŋa aŋ thǝnanɛ yi saŋ-e, saŋ aŋa thɔrɔ ɔlel ka ɔwon wa ȧŋrey.

¹³Kɛrɛ ɔ wosa, ɔ pa ka ukin ka ŋaŋ, Yathki, i yɔ hɛ mu ɔlǝs. Sǝ gbanɛ hɛ yi munɔ ta asiliŋ-i?

¹⁴Gbasi ara yi ara mu, mǝ kɔnɛ. Mȧselɔ ma mi miyɛŋ tǝ kǝsɔŋ aŋlǝpsɔ aŋe mɔ mǝ i po sɔŋ mu.

¹⁵Pǝ lomp hɛ ta ȧtȧ mi tǝ kǝyɔ mɔ mǝ i yema yi akɛŋ ka mi-i? thalɔm mǝ ba kǝtut ta mafinɔ ma mi-i?

¹⁶Tiyȧŋ aŋlǝpsɔ aŋ tǝ yi ȧtɔtɔkɔ ɔwa aŋtɔtɔkɔ aŋ tǝ yi alǝpsɔ. Kotȧy-e a tela agbȧthi, kɛrɛ a thith athȧn.

¹⁷Ɔwa ma Yisɔsȧŋ ɔ bɔ kɔ ro Yerusalɛm-e, ɔ gbasi aŋkarande tɔfɔt ŋarǝŋ rayɛr ka aroŋ, kɔ pa ro ŋaŋ,

¹⁸Ɔwa sǝ kɔ ro Yerusalɛm. A tǝ lȧnki ɔWan ka wuni ka aŋfode ȧbana yi aŋkarmɔkɔ ɔwa a tǝ sɔŋ kɔ mǝtheri tǝ kǝfi.

¹⁹Aŋ tǝ lȧnki kɔ ka tȧbona tǝlɔm kȧmȧ aŋ sel kɔ, ɔwa aŋ tǝ sap kɔ, aŋ tǝ tȧŋ kɔ ka kǝnt kǝpǝŋkinɛ. Ɔwa ka ȧŋrey aŋa bekȧ mǝsas-e, ɔ tǝ yokanɛ.

²⁰Ka ɔkara ka aŋwuth ŋa Sɛbidi ɔ der ka Yisɔs yi aŋwuth ŋɔŋ aruni, kaŋ bȧtho kɔ, kɔ tholir kɔ tȧy.

²¹kɔ pa ka ɔya, Ko mǝ yema-e? Ka ɔya ɔ pa ro ŋɔŋ, Yamari kȧmȧ aŋwuth a mi aruni ŋarǝŋ aŋe aŋ yirȧ, ukin ka kȧdiyɔ ka mu, ɔwa ukin ka kȧmɛrɔ ka mu ka rȧbȧy ra mu.

²²Kɛrɛ Yisɔsȧŋ ɔ wosa ɔ pa, Nǝ tɛ hɛ ȧte nǝ yif. Nǝ gbǝli mun ka ampɔthi mǝ i re mun-i? A gbǝli baftays nu yi ȧŋbaftisəm aŋa a baftays mi-i? kaŋ pa ro ŋɔŋ, Sǝ gbǝli.

²³kɔ pa ro ŋaŋ, Tɛntɛnɛ nǝ tǝ mun ka ampɔthi a mi, ɔwa a tǝ baftays nu yi ȧŋbaftisəm aŋa a baftays mi. Kɛrɛ tǝ kǝyira ka kȧdiyɔ kȧmi yi ka kȧmɛrɔ ka mi-e, tȧy ta mi tǝ kǝsɔŋ thahɔ, kɛrɛ a tǝ sɔŋ ti ka ŋaŋ ta aŋa ɔKas kȧmi ɔ bɛnɛ ti.

²⁴Ma aŋtɔfɔt aŋ tǝl ti-e, pǝ bansȧnɛ ŋa ta aŋwɔnt ŋarǝŋ.

²⁵Kɛrɛ Yisɔs ɔ tela ŋa ro ŋɔŋ, kɔ pa, Nǝ tȧrȧ kǝpa aŋbȧki ŋa tȧbona tǝlɔm aŋ gbǝka ŋa, ɔwa aŋfǝm ŋaŋ ȧbana aŋ yɔ ŋa afɔsɔ.

²⁶Kɛrɛ ya tha mǝ pǝ yi kǝtɔŋ ka nu. Wuni o wuni ɔwe yema yi ubana kǝtɔŋ ka nu, ta ɔ yi ȧbɔy a nu.

²⁷Ɔwa wuni o wuni ɔwe yema yi utɔtɔkɔ, ta ɔ yi utar ka nu;

²⁸mɔ mǝ ɔWan ka wuni ɔ te der kȧmȧ a yɔna kɔ, kɛrɛ tǝ kǝyɔna afǝm, dɛ yi tǝ kǝsɔnd aŋesǝm ŋɔŋ tǝ kǝbani afǝm alai.

²⁹Maŋ wur kǝyɛfǝ ro Yɛriko-e, runiya rǝbana rǝ tȧŋ kɔ.

³⁰Ɔwa afǝm afith ŋarǝŋ aŋ yirȧ ro roŋ rayɛr, ma aŋ tǝl kǝpa Yisɔsȧŋ ɔ thas-e, aŋ sel ɛrɔŋ, aŋ pa, Pa, ba su ȧney, munɔ ɔwan ka Debid.

³¹Ka ȧruniya rǝ ŋal ŋa kȧmȧ aŋ taŋk, kɛrɛ aŋ bȧr sel ɛrɔŋ, aŋ pa, Pa, ba su ȧney, munɔ ɔwan ka Debid.

³²Ka Yisɔs ɔ tǝma son, ɔ tela ŋa ɔ pa, Ko nǝ yema i yɔna nu-e?

³³kaŋ pa ro ŋɔŋ, Pa, kȧmȧ a kanthi ɛfɔr ɛ su.

³⁴Ka Yisɔsȧŋ ɔ ba ŋa ȧney, ɔ gboŋ ɛfɔr yaŋ. Ɔwa ka ɔlɛmp wati aŋ sɔthɔ kakǝli ka ŋaŋ, kaŋ tȧŋ kɔ.