Read Ȧŋlemrȧnɛ Ȧfu Mathiu 23 Bible Online

Mathiu 23 - Ȧŋlemrȧnɛ Ȧfu bible

Mathiu 23

¹Ka Yisɔsȧŋ ɔ fɔfȧnɛ ȧsuniya yi aŋkarande ŋɔŋ,

²kǝpa, Aŋkarmɔkɔ yi aŋFarisi aŋ yirȧ ka ɔyira wa Mosis.

³Tiyȧŋ mȧtȧy bɛ ama aŋ yamari nu-e, yɔ, ɔwa wop ma nu. Kɛrɛ te nu tansanɛ mȧyɔs maŋ, kotȧy-e aŋ pa kɛrɛ aŋ yɔ hɛ.

⁴Aŋ sek ɛlik ɛlel ɛtuy gbanɛ, aŋ bot yi ka tȧkǝnkla ta aŋfǝm, kɛrɛ ŋaŋ ŋanɛ aŋ yema hɛ borȧ yi hali yi ȧsel ŋaŋ ŋin.

⁵Mȧyɔs maŋ bɛ aŋ yɔ ma kȧmȧ afǝm aŋ nənk ma. Aŋ bondǝs mȧbani maŋ, aŋ bondǝs ɛlɛmpɛ ya ȧsuma taŋ.

⁶Aŋ bɔthǝr ɔdɛr ɔtɔtɔkɔ ka ɛmet, dɛ yi ɔyira ɔfinɔ ka ɛseth ɛgbanɛ,

⁷yi ɛkori ka ɔdɛr ɔthila dɛ yi kȧmȧ aŋfǝm aŋ bont ŋa Karmɔkɔ.

⁸Te nu selɔ a bont nu Karmɔkɔ, kotȧy-e ukin kɔnɔ yi ɔkarmɔkɔ ka nu, kɔnɔ yi Kraistȧŋ. Na bɛ nǝ yi awɔnt.

⁹Te bont wuni o wuni nɔru ukas ka nu, kotȧy-e ukin kɔnɔ yi ɔKas ka nu, kɔnɔ yi ro riyana.

¹⁰Te selɔ a bont nu amarki kotȧy-e ukin kɔnɔ yi ɔMarki ka nu, kɔnɔ yi Kraistȧŋ.

¹¹Ɔwe yi ubana thɔŋ bɛ kǝtɔŋ ka nu-e, ɔ tǝ yi ȧbɔy a nu.

¹²Ɔwa wuni o wuni ɔwe mǝ ŋatanɛ, a tǝ thora kɔ, ɔwa wuni o wuni ɔwe mǝ thoranɛ, a tǝ ŋata kɔ.

¹³Kɛrɛ mɔnɛ ro nu naŋ akarmɔkɔ yi aFaresi, amunafaki! Ȧtesoma-e nǝ kantha rȧbȧy ra ro riyana ka aŋfǝm. Kotȧy-e naŋ nǝ wɔŋ hɛ, ɔwa nǝ selɔ hɛ ŋaŋ aŋa yema tǝ kǝwɔŋ, aŋ wɔŋ.

¹⁴Mɔnɛ ro nu naŋ akarmɔkɔ yi aFaresi, amunafaki! Ȧtesoma-e nǝ lǝsǝr ɛseth ya ȧŋbora, ɔwa rǝ kǝkɔnthɔsnɛ nǝ ramnɛ kǝramnɛ kǝbɔli. Tiyȧŋ na mǝ tha sɔthɔ mǝtheri mǝlel.

¹⁵Mɔnɛ ro nu naŋ akarmɔkɔ yi aFaresi, amunafaki! Ȧtesoma-e nǝ kɔth kɔth ro baŋ yi ro gbaŋ tǝ kǝlȧfthi ȧŋmerȧ ŋa wuni kin. Ɔwa ma ɔ po lȧfthɛ-e, nǝ sǝki kɔ wan ka yahanama marǝŋ marǝŋ pǝthasi nu.

¹⁶Mɔnɛ ro nu naŋ atǝmȧ kǝdi aŋfith! Nǝ pa, Wuni o wuni ɔwe gbiŋ ka ȧŋseth ŋa Kuru-e, tȧy thahɔ, kɛrɛ wuni o wuni ɔwe mǝ gbiŋ ka mabɔŋɔ ma ȧŋseth ŋa Kuru-e, ɔ sekǝrnɛ.

¹⁷Na apǝŋk dɛ yi afith. Areke thas-e, mabɔŋɔ thalɔm ȧŋseth ŋa Kuru aŋa sǝmǝs mȧbɔŋɔ-e?

¹⁸Ɔwa nǝ pa sɔ, Wuni o wuni ɔwe mǝ gbiŋ ka ȧŋbɛsɛ, tȧy thahɔ, kɛrɛ wuni o wuni ɔwe mǝ gbiŋ ka ȧŋboya rokɔm kati-e, ɔ sekǝrnɛ.

¹⁹Na apǝŋk dɛ yi afith. Areke thas-e, ȧŋboya thalɔm ȧŋbɛsɛ aŋa sǝmǝs ȧŋboya-e?

²⁰Tiyȧŋ, ɔwe mǝ gbiŋ ka ȧŋbɛsɛ-e, ɔ gbiŋ ka ȧŋbɛsɛ dɛ yi ka ɛyɛt bɛ ɛyɛ yi rokɔm kati.

²¹Ɔwa ɔwe mǝ gbiŋ ka ȧŋseth ŋa Kuru-e, ɔ gbiŋ ka ȧŋseth dɛ yi ka kɔnɔ ɔwe yirȧ ri.

²²Ɔwa ɔwe mǝ gbiŋ ka ȧriyana-e, ɔ gbiŋ ka kawaŋ ka rȧbȧy ra Kuru, yi ka kɔnɔ ɔwe yirȧ ri.

²³Mɔnɛ ro nu, naŋ akarmɔkɔ yi aFaresi, amunafaki! Pǝkasifɛ nǝ sɔŋ ɛyaka ya ɛsoro yi anisi, dɛ yi kamin, kɛrɛ nǝ tey kǝyɔ mȧtȧy mǝbana ma aŋthɔ, pǝ yi mɔ-e kǝgbǝk ɛpa ɔlompi, kǝba ȧney dɛ yi kǝlanɛ. Nǝ yi tǝ kǝyɔ ȧte, ɔwa pǝ mar hɛ nǝ tey talɔm.

²⁴Naŋ atǝmȧ kǝdi afith, nǝ sais mȧnt tǝ kǝwura amǝnthǝl, kɛrɛ nǝ mer ȧyɔkmɛ.

²⁵Mɔnɛ ro nu, naŋ akarmɔkɔ yi aFaresi, amunafaki! kotȧy-e nǝ yak ampɔthi yi ȧŋbɔl romuth, kɛrɛ rokor ɛ la yɛt ɛnɔy rȧ ȧfɔsɔ yi mǝfela mǝlǝs.

²⁶Munɔ ɔFaresi ufith, mɔtha gbǝrans rokor ka ampɔthi yi ȧŋbɔl, kȧmȧ kamuth kati sɔ kǝ yi kǝgbǝraŋ.

²⁷Mɔnɛ ro nu, naŋ akarmɔkɔ yi aFaresi, amunafaki! Ȧtesoma-e nǝ bȧlȧnɛ mɔ tǝboma tǝfera ȧte tɔrinɛ ɔfinɔ romuth, kɛrɛ rokor tǝ la tǝbanth ta afǝm afi, yi mǝnɔkɔ bɛ.

²⁸Ya pǝ yi sɔ mɔ naŋ, nǝ tɔrinɛ nɔru kǝyi na alompi ka aŋfǝm, kɛrɛ rokor nǝ la rǝmunafaki yi mǝkǝnȧ.

²⁹Mɔnɛ ro nu, naŋ akarmɔkɔ yi aFaresi, amunafaki! Pǝkasifɛ nǝ bɛs taboma ta aŋnabi, ɔwa nǝ yesi tapali ta aŋlompi,

³⁰nǝ pa, Bepi sǝ yi naŋ thǝpaŋ ka aŋyamana ŋa aŋkas a su-e, sǝ gbǝli hɛ naŋ kasa yi ŋaŋ tǝ kǝloŋ mȧtir ma aŋnabi.

³¹Tiyȧŋ nǝ gbakɛnɛ kǝpa nǝ yi awuth ŋa ŋaŋ aŋa difǝth Aŋnȧbi.

³²Tiyȧŋ, lasǝr nu aŋthuntha ŋa aŋkas a nu.

³³Naŋ ɛbok, naŋ rǝkomra ra ɛgbɔrɔ, to mǝ nǝ gbǝli kisi ka aŋthoŋka ŋa ro yahanama-e?

³⁴Te ba ti, kǝla, i somra nu anȧbi, afǝm atempi yi akarmɔkɔ; alɔm ŋati nǝ tǝ dif, nǝ tǝ tȧŋ ŋa rǝ tǝnt tǝpǝŋkinɛ, alɔm nǝ tǝ sapa ŋa nǝkɛt ka ɛseth ɛ nu ɛgbanɛ, nǝ tǝ bȧl ŋa kǝwur ka kǝpet kin kǝkɔ ka kǝlɔm,

³⁵kȧmȧ a reŋ nu mathɛkɛ ma mȧtir mǝpaŋi tȧy bɛ ama a loŋ ka ȧŋthɔf kǝtǝp ka mȧtir ma Ebɛl ɔlompi haŋ ka mȧtir ma Sakaraya ɔwan ka Barakaya ɔwe nǝ dif kǝtɔŋ ka ȧŋseth ŋa Kuru yi ȧŋbɛsɛ.

³⁶Tɛntɛnɛ i kanɛ nu, mȧtȧy ame bɛ mǝ ba tǝ kǝder ka rȧkomra are.

³⁷O Yerusalɛm, Yerusalɛm, munɔ mǝ difǝth aŋnabi, ɔwa mǝ lǝmǝs ŋa mǝsar aŋa a som ro mu, amɔlɔ ɛlɔkɔ naŋ i fela tǝ kǝthoŋkla aŋwuth a mu dɛr rɔkin, mɔ kȧbɛt mɔ thonkla aŋwuth ŋɔŋ ka ɛkufna yɔŋ ratha, kɛrɛ mǝ selɔ hɛ.

³⁸Kǝla, a tey ȧŋseth a mu yeŋ.

³⁹Tiyȧŋ i kanɛ nu, nǝ ba hɛ kǝnǝŋk mi kǝtǝp ka-ake haŋ nǝ pa, Uruba wɔŋ ɔwe mǝ der ka ȧŋes ŋa ɔMarki.