Read Ȧŋlemrȧnɛ Ȧfu Mathiu 24 Bible Online

Mathiu 24 - Ȧŋlemrȧnɛ Ȧfu bible

Mathiu 24

¹Ka Yisɔsȧŋ ɔ wur ka ȧŋseth ŋa Kuru tǝ kǝkɔnɛ, ɔwa aŋkarande aŋ der kȧmȧ aŋ tɔri kɔ mabɛmpa ma ȧŋseth ŋa Kuru.

²Ka Yisɔs ɔ pa ro ŋaŋ, Nǝ nənk ɛye bɛ-i? Tɛntɛnɛ i kanɛ nu a ba hɛ kǝtey nɔ ȧsar ŋin rokɔm ka alɔm aŋa mǝ a te fak.

³Ɔwa ma ɔ yirȧ ka kateŋ ka Ɔlif-e, aŋkarande ŋɔŋ aŋ der ro ŋɔŋ sɔy, aŋ pa, Kanɛ su ȧŋlɔkɔ aŋa mȧtȧy ame mǝ tǝ yi-e, dɛ yi ko mǝ yi ȧŋmisali ŋa kȧder ka mu, yi ɔthalnɛ wa raru-e?

⁴Ka Yisɔsȧŋ ɔ wosa ɔ pa ro rɔŋaŋ, Botnɛ nu kȧmȧ wuni o wuni ɔ te nu yɛthǝs.

⁵kotȧy-e agbȧthi aŋ tǝ der ka ȧŋes a mi, aŋ tǝ pa, Minɛ yi ɔKrayst, ɔwa aŋ tǝ yɛthǝs agbȧthi.

⁶Ɔwa nǝ tǝ tǝl ta tǝtim yi tibari ta tǝtim, kɛrɛ ta pǝ te sɔmpa nu kotȧy-e mȧtȧy ame bɛ mǝ ba kǝyɔnɛ. Kɛrɛ ɔlǝpsɔ ɔ tha bek hɛ.

⁷Abona aŋ tǝ yokar abona, rǝbai rǝ tǝ yokar rǝbai, dor rǝ tǝ yi, afithina ŋa tǝtu dɛ yi kǝyɛr ka ȧŋthɔf rǝ dɛr ɔgbaskɛ gbaskɛ.

⁸Kɛrɛ mȧtȧy ame bɛ mǝ yi gbo ɔtǝpɛr wa ȧŋsɔmpanɛŋ.

⁹Ka ȧŋlɔkɔ ŋati a tǝ lȧnki nu rǝ asɔmpanɛ, a tǝ dif nu, ɔwa tǝbona bɛ tǝ tǝ gbɛŋa nu salata ȧŋes a mi.

¹⁰Ɔwa afǝm agbȧthi aŋ tǝ pǝnthbǝla, aŋ tǝ sɔndanɛ, ɔwa aŋ tǝ gbɛŋanɛ.

¹¹Ɔwa anȧbi ayem agbȧthi aŋ tǝ yokanɛ, aŋ tǝ yɛthǝs agbȧthi.

¹²Ɔwa mȧbɔthǝr ma agbȧthi mǝ tǝ gbǝnkɛ pǝkasifɛ mǝlǝs mǝ tǝ bȧrnɛ gbo.

¹³Kɛrɛ ɔwe mǝ muyu haŋ ka ɔthalnɛ, kɔnɔ kati ɔ tǝ kisi.

¹⁴Ɔwa ȧkɛra kǝfinɔ ka rȧbȧy ake-e, a ba kǝtamǝs ki ka ȧdȧru bɛ ta mǝseri ka tǝbona bɛ. Kǝdarǝŋ kati ɔthalnɛ ɔ der tɛnɛ.

¹⁵Tiyȧŋ, bepi nǝ nənk ɔtheranɛ ka kadinɛ ɔwe Danɛl ɔnȧbi ɔ lei, ɔ tǝma ka ɔdɛr ɔsǝm-e, (ɔwe mǝ karaŋ ta pǝ sɔk kɔ)

¹⁶ka ȧŋlɔkɔ ŋati ta ŋaŋ aŋa yi ro Yudia aŋ gbukɛ ka tȧteŋ.

¹⁷Kɔnɔ ɔwe yi ka ȧŋseth rokɔm ta ɔ te thor tǝ kǝwura ɛyɛt ɛyɛ yi ro seth kɔŋ.

¹⁸Ɔwa kɔnɔ ɔwe yi ro kor ta ɔ te kȧlanɛ tǝ kǝgbasi aruma rɔŋ.

¹⁹Ɔwa mɔnɛ ro ŋaŋ aŋa yi ator, dɛ yi ŋaŋ aŋa mǝ masǝr afɛth ka mȧrey mati!

²⁰Kɛrɛ ramnɛ nu kȧmȧ kagbukɛ ka nu kǝ te yi ka adarǝŋ thalɔm ka aŋsabath,

²¹kotȧy-e ka ȧŋlɔkɔ ŋati asɔmpanɛ ȧbana aŋ tǝ yi awunɔŋ aŋa te tha la yi kǝbi ȧdȧru rǝ tǝpɛ haŋ ka-ake, dɛ yi aŋa te sɔ ba kǝyi thǝbana.

²²Ɔwa thambe a gbǝŋki mȧrey mati-e, wuni o wuni ɔ ba hɛ kǝkisi; kɛrɛ salata aŋthith ŋa Kuru a tǝ gbǝŋki mȧrey mati.

²³Bepi wuni o wuni ɔ pa ro nu, Kǝlo, Kraistȧŋ ɔ yi nɔ, thalɔm ɔ yi ro, te ti lanɛ.

²⁴kotȧy-e aKrayst ayem yi anȧbi ayem aŋ tǝ yokanɛ, aŋ tǝ tɔri ɛmisali ɛbana yi mətȧy mǝkabanɛ, kȧmȧ a yɛthǝs aŋthith ŋa Kuru bepi pǝ fɔi tȧy.

²⁵Kǝla i po yeŋk kanɛ nu.

²⁶Tiyȧŋ bepi a pa ro nu, Kǝli, ɔ yi ro wula, te kɔ ri. Thalɔm, Kǝli, ɔ yi ka tǝkoŋko rokor, te ti lanɛ.

²⁷kotȧy-e mɔ mǝ ɔnakthinɛ mǝ ɔ wur ro thɔrɔŋ-e, ɔwa a nənk ŋi haŋ ro pil-e, ya kȧder ka ɔWan ka wuni mǝ kǝ yi.

²⁸Dɛr o dɛr rǝ kabel kǝ yi-e, rǝ ɛyiba mǝ aŋ thoŋklanɛ dɛr rɔkin.

²⁹Ka ɔlɛmp wati, kǝdarǝŋ ka kasɔmpanɛ ka mȧrey mati, aret rǝ tǝ biyȧ, ɔwa aŋof aŋ ba hɛ kǝsɔŋ kawalɛ kati, dɛ yi atɔs tǝ tǝ fumpɔ kǝwur ka ȧkuru, ɔwa ɛfɔsɔ ya ȧturu ɛ tǝ yiŋkthanɛ.

³⁰Ɔwa ka ȧŋlɔkɔ ŋati ȧŋmisali ŋa ɔWan ka wuni aŋ tǝ tɔrinɛ ka ȧkuru. Tȧbona bɛ ka ȧdȧru tǝ tǝ kulɔ, ɔwa aŋ tǝ nənk ɔWan ka wuni ɔ der ka karǝnt ka ȧkuru rǝ afɔsɔ yi ayiki ȧbana.

³¹Ɔ tǝ som aŋmȧleka ŋɔŋ yi rim rǝbana rǝ kǝthɛma, ɔwa aŋ tǝ thoŋkla aŋthith ŋɔŋ dɛr rɔkin kǝwur ka ɛkoŋ yanlɛ ya ȧdȧru, kǝwur ka ɔthalnɛ wa aŋfena haŋ kǝkɔ ka ɔthalnɛ ɔlɔm.

³²Ɔwa thǝkǝs aŋlomɔ ŋa aŋǝnt ŋa aŋgbɔnɔ. Ma aŋra ŋati aŋ po fɛthȧnɛ-e, aŋ wur ɛbɔpǝr, nǝ tȧrȧ ti kǝpa rawok rǝ fat.

³³Ya pǝ yi sɔ naŋ-e, ma nǝ nənk mȧtȧy ame bɛ-e, tȧrȧ ti nu kǝpa ɔ yi ɔfati, hali ka tadare.

³⁴Tɛntɛnɛ i pa ro nu, rȧkomra are rǝ ba hɛ kǝthas haŋ mȧtȧy ame bɛ mǝ gbenthis.

³⁵Ȧkȧriyana yi ȧdȧru ɛ ba kǝthas, kɛrɛ ȧsim ta mi tǝ ba hɛ kǝthas.

³⁶Kɛrɛ ta ȧŋrey ŋati yi ȧŋlɔkɔ ŋati wuni o wuni ɔ tɛ hɛ, hali aŋmȧleka ŋa ro riyana, thalɔm ɔWan. ƆKas kȧmi son kɔnɔ tȧrȧ.

³⁷Ɔwa mɔ mȧrey ma Noaȧŋ mǝ sa yi-e, ya mǝ pǝ kȧl sɔ yi ka kȧder ka ɔWan ka wuni.

³⁸kotȧy-e ka mȧrey mati ama yi yeŋka ȧmȧnt mǝfɔl mǝ der, aŋ di-o, aŋ mun-o, aŋ nantȧ-o, aŋ sɔŋ tǝnantǝ haŋ ka ȧŋrey aŋa Nowaŋ ɔ wɔŋ ka ȧŋbil.

³⁹Ɔwa aŋ tɛ hɛ ti haŋ ȧmȧnt mǝfɔl mǝ der, ɔwa mǝ dim ŋa bɛ; ya mǝ pǝ yi ka kȧder ka ɔWan ka wuni.

⁴⁰Ka ȧŋlɔkɔ ŋati alaŋgba ŋarǝŋ aŋ tǝ yi ro kɔr; a tǝ gbasi ukin, a tǝ tey ukin.

⁴¹Afǝm abom ŋarǝŋ aŋ tǝ tɔ; a tǝ gbasi ukin, a tǝ tey ukin.

⁴²Tiyȧŋ, kǝlɛnɛ nu, kotȧy-e nǝ tɛ hɛ ȧŋlɔkɔ ɔMarki ka nu mǝ ɔ der.

⁴³Kɛrɛ tȧrȧ nu ȧte kǝpa bepi ɔmarki ka ȧŋseth ɔ tȧrȧ ȧŋlɔkɔ aŋa ɔkei mǝ ɔ der-e, ɔ tǝ kǝlɛnɛ, ɔ gbǝli hɛ selɔ a bɛs ȧŋseth ŋɔŋ.

⁴⁴Tiyȧŋ yi nu a bɛnɛnɛ kotȧy-e ka ȧŋlɔkɔ aŋa mǝ nǝ te nanɛ ɔWan ka wuni ɔ tǝ der.

⁴⁵Kanɛ yi thɔŋ ȧŋbɔy ubɔthi lanɛ yi atempi, ɔwe ɔmarki kɔŋ ɔ po bot kɔ rokɔm ka kabɔr kɔŋ, kȧmȧ ɔ sɔŋ ŋa yɛt ɛdi ka ȧŋlɔkɔ ŋati-e?

⁴⁶Ȧŋbɔy ŋati ɔ ba aruba ɔwe ɔmarki kɔŋ ɔ bǝp ɔ yɔ mɔ yaŋ bepi ɔ der-e.

⁴⁷Tɛntɛnɛ i kanɛ nu kǝpa ɔ tǝ sɔŋ kɔ afɔsɔ rokɔm ka ara ɔ ba bɛ.

⁴⁸Kɛrɛ bepi ȧŋbɔy ulǝs ŋati ɔ pa ka ȧŋmerȧ ŋɔŋ, Ɔmariki kȧmi ɔ tǝ won.

⁴⁹Ɔwa ɔ tǝp kǝsapǝth aŋkos ŋɔŋ ɛbɔy, ɔwa ɔ di, ɔ mun dɛ yi antis-e.

⁵⁰Ɔmariki ka ȧŋbɔy ŋati ɔ tǝ der ka ȧŋrey aŋa mǝ ɔ te nanɛ kɔ-e, ɔwa ka ȧŋlɔkɔ aŋa mǝ ɔ te tȧrȧ.

⁵¹Ɔwa ɔ tǝ sȧp kɔ kǝsȧp kǝbana, ɔ tǝ bot kɔ dɛr yi ȧŋmunafȧki, ro kȧkulɔ yi kȧŋȧkŋȧk ɛsek kǝ yi.