Read Ȧŋlemrȧnɛ Ȧfu Mathiu 25 Bible Online

Mathiu 25 - Ȧŋlemrȧnɛ Ȧfu bible

Mathiu 25

¹Ka ȧŋlɔkɔ ŋati rȧbȧy ra ro riyana rǝ tǝ bȧlȧnɛ mɔ afanɛ tɔfɔt aŋa gbasi tamulɛ taŋ, aŋ wur tǝ kǝgbans ɔnȧntȧ ufu.

²Antamath aŋ yi atempi, ɔwa aŋtamath aŋ yi apǝŋk,

³ȧtesoma-e ȧŋpǝnk aŋ gbasi tamulɛ taŋ kǝte keranɛ mȧro.

⁴Kɛrɛ aŋtempi aŋ keranɛ mȧro yi tamulɛ taŋ.

⁵Ɔwa ma ɔnȧntȧ ufu ɔ te der-e, ŋa bɛ aŋ rɔns, kaŋ dirȧ,

⁶kɛrɛ ka kǝrendatɔŋ a tam kǝpa, Kǝlo, ɔnȧntȧ ufu ɔ bek! Wur nu nǝ kɔ gbans kɔ.

⁷Ȧŋlɔkɔ ŋati aŋfanɛ ŋati bɛ aŋ yokanɛ, aŋ bɛmpa bɛmpa tamulɛ taŋ.

⁸Ka ȧŋpǝnk aŋ pa ka aŋtempi, Yer su nu ȧmȧro ma nu mǝlɔm, kotȧy-e tamulɛ ta su tǝ yema dimsɛ.

⁹Kɛrɛ aŋtempi aŋ wosa aŋ pa, Thalɔm mǝ gbǝli hɛ bek ta ȧtȧ su yi naŋ-e. Pǝ tǝ yi ɔfisa bepi nǝ kɔ wayanɛ ka ŋaŋ aŋa mǝ thila.

¹⁰Ɔwa maŋ kɔnɛ tǝ kǝway-e, ɔnȧntȧ ufu ɔ der. Ɔwa ŋaŋ aŋa po bɛnɛnɛ aŋ wɔŋ yi kɔnɔ ka amet ma kanantǝ; ka a kantha kadare.

¹¹Kǝdarǝŋ kati aŋfanɛ alɔm aŋ der sɔ, aŋ pa, Pa, Pa, kanthɛ su.

¹²Kɛrɛ ɔ wosa ɔ pa, Tǝ tɛntɛnɛ i kanɛ nu, i tɛ hɛ nu.

¹³Tiyȧŋ kǝlɛnɛ nu kotȧy-e nǝ tɛ hɛ ȧŋrey thalɔm ȧŋlɔkɔ aŋa ɔWan ka wuni mɔ der.

¹⁴kotȧy-e pǝ yi mɔ wuni ɔwe mǝ kɔ rǝ athɔf alɔm, ɔ tela ɛbɔy yɔŋ, kɔ laŋklia ŋa ɛyɛt yɔŋ.

¹⁵kɔ sɔŋ ukin ɛtalent tamath, ka ulɔm ɛtalent yɛrǝŋ, ka ulɔm sɔ atalent ŋin; rǝ ukin o kin mɔ mǝ kagbǝli kɔŋ kǝ yi-e. Kɔ kɔnɛ ka ȧŋbiyas ŋɔŋ.

¹⁶Ka ɔlɛmp wati-e, ɔwe sɔthɔ ɛtalent tamath-e, ɔ kɔnɛ ɔ sǝkinɛ yi, kɔ sɔthɔ tamath rokɔm kati.

¹⁷Ya pǝ yi sɔ ta ɔwe sɔthɔ ɛtalent yɛrǝŋ-e, ɔ sɔthɔ yɛrǝŋ rokɔm kati.

¹⁸Kɛrɛ kɔnɔ ɔwe sɔthɔ atalent ŋin-e, ɔ kɔnɛ ɔ bɛs ro thɔf, ɔ maŋk aŋkala ŋa ɔmarki kɔŋ.

¹⁹Ɔwa ma pǝ won haŋ-e, ɔmarki ka ɛbɔy yati ɔ der, ka ɛbɔy aŋ kanɛ ro ŋɔŋ.

²⁰Ka ɔwe sɔthɔ ɛtalent tamath ɔ der ɔ kȧrȧ ɛtalent tamath ɛlɔm, kɔ pa, Pa, mǝ laŋklia mi ɛtalent tamath. Kǝla, i po sɔthɔ ɛtalent tamath rokɔm kati.

²¹Ɔmariki kɔŋ ɔ pa ro ŋɔŋ, Mǝ yɔ ɔlompi, munɔ mun bɔy ufinɔ ubɔthi lanɛ. Mǝ po yi ubɔthi lanɛ rǝ yɛt ɛthan. I ti bot mu rokɔm ka yɛt ɛgbathi. Wɔŋ ka mabɔnɛ ma ɔmarki ka mu.

²²Kɔnɔ sɔ ɔwe sɔthɔ ɛtalent yɛrǝŋ-e, ɔ der ɔ pa, Pa, mǝ laŋklia mi ɛtalent yɛrǝŋ. Kǝla, i po sɔthɔ ɛtalent yɛrǝŋ rokɔm kati.

²³Ɔmariki kɔŋ ɔ pa ro ŋɔŋ, Mǝ yɔ ɔlompi, munɔ mun bɔy ufinɔ ubɔthi lanɛ; mǝ po yi ubɔthi lanɛ rǝ yɛt ɛthan, i ti bot mu rokɔm ka yɛt ɛgbathi. Wɔŋ ka mabɔnɛ ma ɔmarki ka mu.

²⁴Ka kɔnɔ ɔwe sɔthɔ atalent ŋin-e, ɔ der sɔ, ɔ pa, Pa, i tȧrȧ mu kǝyi wuni bȧk mǝdɛr, mǝ rɔk ro mǝ te sak, mǝ thoŋkla ro mǝ te sakthi.

²⁵Tǝ i nesa, i kɔnɛ maŋk aŋkala a mu ro thɔf. Kǝla, mǝ ba ara mu.

²⁶Kɛrɛ ɔmarki kɔŋ ɔ pa, Munɔ mun bɔy ulǝs dɛ yi uyai. Mǝ tȧrȧ kǝpa i rɔk ro i te sak, i thoŋkla ro i te sakthi.

²⁷Mǝ yi naŋ tǝ kǝsɔŋ aŋkala a mi ka aŋsinkanɛ ɛkala, kȧmȧ ma i der-e, i gbǝli sɔthɔ kǝthɛksɛ rokɔm kati.

²⁸Tiyȧŋ nɔy kɔ nu aŋtalent ŋin kȧmȧ nǝ sɔŋ ŋi ka ɔwe ba ɛtalent tɔfɔt.

²⁹kotȧy-e rǝ wuni o wuni ɔwe ba-e a tǝ bȧrȧ kɔ, ɔwa ɔ tǝ ba ɔgbȧthi. Kɛrɛ ka ɔwe te ba-e, hali ara ɔ ba-e, a tǝ nɔy kɔ ri.

³⁰Kama nǝ fitha ȧŋbɔy uyai ɔwe ka ȧŋsum rokaŋ. Ro kǝkulɔ yi kȧŋȧkŋȧk ɛsek kǝ yi.

³¹Kɛrɛ ma ɔWan ka wuni ɔ po der ka aŋyiki ŋɔŋ, yi aŋmȧleka aŋa yi yi kɔnɔȧŋ, ka ȧŋlɔkɔ ŋati ɔ tǝ yirȧ ka kawaŋ ka rȧbȧy ka aŋyiki ŋɔŋ-e,

³²ɔwa ɔ tǝ thoŋkla tǝbona bɛ rodi kɔŋ. Ɔ tǝ gbaski ŋa kǝtɔŋ mɔ utɔl tǝlɔmɛ mǝ ɔ gbaski talɔmɛ ka atirȧŋ.

³³Ɔ tǝ tǝmǝr talɔmɛ ka kȧdiyɔ kɔŋ, kɛrɛ atir ka kȧmɛrɔ kɔŋ.

³⁴Ka ȧŋlɔkɔ ŋati ɔBȧy ɔ tǝ pa ro ŋaŋ ka kȧdiyɔ kɔŋ, Der nu naŋ aruba ŋa ɔKas kȧmi, wɔŋ nu ka rȧbȧy ara a bɛnɛnɛ ta ȧtȧ nu kǝbi ma ȧdȧru rǝ tǝpɛ.

³⁵kotȧy-e ma i yi udor-e, nǝ sɔŋ mi da rǝdi. Ma rǝmun rǝ bȧk mi-e, nǝ sɔŋ mi i mun. Ma i yi utik-e, nǝ yia mi.

³⁶Ma i yi utiŋ-e, nǝ lonsǝr mi. Ma i yi utuy-e, nǝ kori mi. Ma i yi ka ȧŋseth ŋa tǝrǝŋka-e, nǝ der ro mi.

³⁷Ɔwa aŋlompi aŋ tǝ pa ro ŋɔŋ, Pa, alɔkɔ areke sǝ nənk mu mun dor-e, sǝ fantha mu-e, thalɔm mǝ fela tǝ kǝmun sǝ yer mu mant-e?

³⁸Ɔwa alɔkɔ areke sǝ nənk mu utik-e, sǝ yia mu-e? Thalɔm, mun tiŋ-e, sǝ lonsǝr mu-e?

³⁹Alɔkɔ areke sǝ nənk mu mun tuy-e, thalɔm ka ȧŋseth ŋa tǝrǝŋka, ka sǝ der ro mu-e?

⁴⁰Ɔwa ɔbȧy ɔ tǝ pa ro ŋaŋ, Tɛntɛnɛ i kanɛ nu kǝpa, kǝbi ma nǝ po yɔ yi ka ukin ka aŋwɔnt mi-e, hali aŋlɔl lɔl aŋe-e, nǝ po yɔ ti ro rɔmi.

⁴¹Ȧŋlɔkɔ ŋati ɔ tǝ pa ro ŋaŋ aŋa yi ka kȧmɛrɔ kɔŋ, wur mi nɔ naŋ aŋa ba ȧranka, kɔnɛ nu ka anant na tǝbana ana a bɛnɛnɛ ta ɔkǝrǝfi yi aŋmȧleka ŋɔŋ.

⁴²kotȧy-e, ma i yi udor-e, nǝ sɔŋ hɛ mi da rǝdi. Ma rǝmun rǝ bȧk mi-e, nǝ sɔŋ hɛ mi i mun.

⁴³Ma i yi utik-e nǝ yer hɛ mi. Ma i yi utiŋ-e, nǝ lonsǝr hɛ mi. Ma i yi utui thalɔm ka ȧŋseth ŋa tǝrǝŋka-e, nǝ kori hɛ mi.

⁴⁴Ȧŋlɔkɔ ŋati aŋ tǝ pa, Pa, alɔkɔ areke sǝ nənk mu udor-e, thalɔm mǝ yema mun, thalɔm mǝ yi utik, thalɔm mǝ yi utiŋ, thalɔm mǝ yi utui, thalɔm mǝ yi ka ȧŋseth ŋa tǝrǝŋka-e, ɔwa sǝ te mu yɔna-e?

⁴⁵Ɔwa ɔ tǝ pa ro ŋaŋ, Tɛntɛnɛ i kanɛ nu kǝpa, kǝbi ma nǝ te yɔ yi ka ukin ka aŋlɔl lɔl aŋe-e, nǝ yɔ hɛ ti ro rɔmi.

⁴⁶Ɔwa aŋe aŋ tǝ kɔ ka athalǝr ŋa thǝbana, kɛrɛ aŋlompi aŋ tǝ kɔ ka aŋesǝm thǝbana.