Read Ȧŋlemrȧnɛ Ȧfu Mathiu 27 Bible Online

Mathiu 27 - Ȧŋlemrȧnɛ Ȧfu bible

Mathiu 27

¹Ɔwa, ma pǝ sɔk-e, aŋkərbomp kǝtɔŋ ka aŋfode bɛ yi aŋbȧki ŋa aŋfǝm aŋ kɔ nǝŋkanɛ ta Yisɔs tǝ kǝdif kɔ.

²Maŋ po sek kɔ-e, aŋ kera kɔ, kaŋ lȧnki kɔ ka Paylet ɔgbǝka.

³Ȧŋlɔkɔ ŋati-e, Yudasȧŋ ɔwe sɔnd kɔ-e, ma ɔ nənk kǝpa a po sɔŋ kɔ mǝtheri-e, ɔ thupinɛ kɔ kala ɛbɛm ya aŋkala ȧferȧ kǝgba tɔfɔt ka aŋkərbomp kǝtɔŋ ka aŋfode yi aŋfǝm abȧki,

⁴ɔ pa, I po yɔ ahakɛ pǝkasifɛ i po sɔnd mǝtir mǝpaŋi tȧy. Kɛrɛ ŋaŋ, aŋ pa, To ȧte tǝ yi ro rɔsu-e? Munɔ ba kǝkǝlȧnɛ ti.

⁵kɔ fitha ɛbɛm ya ȧŋkala ȧferȧ kǝgba tɔfɔt ka ȧŋseth ŋa Kuru, ɔ wur, ɔ kɔ gbaknɛ.

⁶Ka aŋkərbomp kǝtɔŋ ka aŋfode aŋ gbasi aŋkala ȧferȧ, aŋ pa, Pǝ lomp hɛ tǝ kǝbot ŋi rǝ ɔbɛnɛ, ȧtesoma-e aŋkala ŋa mǝtir ŋaŋ.

⁷kaŋ nǝŋkanɛ, aŋ wai ȧkay ka ɛyɔftha tǝ kǝmaŋk ri atik.

⁸Tasom a bont ɔdɛr wati, Akay ka mǝtir, haŋ thonɔŋ.

⁹Ka a lasǝr ȧte Yɛrimaya ɔnȧbi ɔ fɔf-e, ma ɔ pa, A gbasi ɛbɛm ya aŋkala ȧferȧ kǝgba tɔfɔt, amɔlɔ ma ɔwe aŋwuth ŋa Isrɛl aŋ bot mɔlɔ,

¹⁰aŋ sɔŋ yi ta ȧkay ka ɛyɔftha, mɔ mǝ ɔMarki ɔ tɔri mi.

¹¹Ka Yisɔsȧŋ ɔ tǝma rodi ka ɔgbǝka, ka ɔgbǝka ɔ yif kɔ, ɔ pa, Munɔ yi ɔbȧy ka aŋYuda-i? Ka Yisɔsȧŋ ɔ pa ro ŋɔŋ, Munɔ mǝ po ti thɔ pa.

¹²Ma aŋkərbomp kǝtɔŋ ka aŋfode yi aŋbȧki aŋ gbanthir kɔ-e, ɔ wosa hɛ tȧy o tȧy.

¹³Ka Paylet ɔ pa ro ŋɔŋ, Mǝ tǝl hɛ mȧtȧy mǝgbathi ama a seri ta ȧtȧ mu-i?

¹⁴Kɛrɛ ɔ wosa hɛ hali rim rin, haŋ ɔgbǝka ɔ kabanɛ ti.

¹⁵Ɔwa ka ȧŋlɔkɔ ŋa amet mati ɔgbǝka ɔ la tera ȧruniya wuni tand ukin, ɔwe aŋ yema.

¹⁶Ka ukǝrǝŋka ugbuŋi ɔ yi ri ka ȧŋlɔkɔ ŋati, ȧŋes ŋɔŋ aŋ yi Barabas.

¹⁷Tiyȧŋ, maŋ po thoŋklanɛ dɛr rɔkin-e, Pailatȧŋ ɔ pa ro rɔŋaŋ, Kanɛ nǝ yema i tera nu-e, Barabasȧŋ thalɔm Yisɔsȧŋ ɔwe a bont Kraist-e?

¹⁸kotȧy-e ɔ tȧrȧ kǝpa ta kǝtut tǝ aŋ lȧnki kɔ.

¹⁹Ma ɔ yirȧ ka kawaŋ ka kǝthoŋkas-e, ɔrani kɔŋ ɔ somǝr kɔ, kɔ pa, Te ba tȧy o tȧy tǝ kǝyɔ ɔlaŋgba ulompi ɔwɔŋ, kotȧy-e i sɔmpanɛ mətȧy mǝgbathi thonɔŋ rǝ kǝwɔrǝp ta sala tɔŋ.

²⁰Ka aŋkərbomp kǝtɔŋ ka aŋfode yi aŋbȧki aŋ pǝr ȧruniya kȧmȧ aŋ thola Barabasȧŋ, dɛ yi kȧmȧ aŋ dif Yisɔsȧŋ.

²¹Ka ɔgbǝka ɔ pa ro rɔŋaŋ, Ureke ka ŋa ŋarǝŋȧŋ nǝ yema kȧmȧ i tera nu-e? kaŋ pa, Barabasȧŋ.

²²Ka Paylet ɔ pa ro ŋaŋ, To mǝ i yɔ thɔŋ Yisɔsȧŋ-e, ɔwe a bont Krayst-e? kaŋ pa ro ŋɔŋ, Tȧŋ kɔ ka akǝnt kǝpǝnkinɛ!

²³Ka ɔgbǝkȧ ɔ pa, kɔyɛŋ, ko ɔlǝs wɔŋ ɔ po yɔ-e? Kɛrɛ aŋ bȧr gbo woŋa, aŋ pa, Ta a tȧŋ kɔ ka akǝnt kǝpǝŋkinɛ.

²⁴Ka Pailatȧŋ ma ɔ nənk kǝpa ɔ gbǝli hɛ koko-e, kɛrɛ atotok aŋ tǝp kǝfumpɔ-e, ɔ gbasi mȧnt ɔ yak mȧta mɔŋ rodi ka ȧruniya bɛ, ɔ pa, Minɛ min paŋi tȧy ka mȧtir ma ɔwuni lompi ɔwe. Kǝlɛnɛ ti nu.

²⁵Ka aŋfǝm bɛ aŋ wosa, aŋ pa, Ta mȧtir mɔŋ mǝ rensa su, yi aŋwuth a su.

²⁶kɔ tera ŋa Barabasȧŋ; kɛrɛ ɔ sap Yisɔsȧŋ kɔ lȧnki kɔ tǝ kǝtaŋ tȧŋ kɔ ka akǝnt kǝpǝŋkinɛ.

²⁷Ka aŋtim ŋa ɔgbǝka aŋ kȧrȧ Yisɔsȧŋ ro seth ro aŋ gbanɛ, kaŋ thoŋkla aŋtim bɛ ro ɔ yi.

²⁸kaŋ bus kɔ ȧsuma tɔŋ, aŋ wɔns kɔ ruma rǝyim.

²⁹Maŋ po ru ȧniyɔ ŋa tǝbȧnk-e, aŋ reŋ ŋi ro bomp rɔŋ, kaŋ sɔŋ kɔ kǝthȧnkɛ ka kȧta kɔŋ kǝdiyɔ, aŋ sɔna kɔ tǝwu, aŋ sel kɔ, aŋ pa, Kori mu-o, ɔbȧy ka aŋYuda!

³⁰kaŋ thufǝr kɔ, aŋ nɔy kɔ kǝthȧnkɛ, aŋ gbantha gbantha kɔ ro bomp.

³¹Ɔwa maŋ po sel kɔ-e, aŋ bus kɔ aruma, aŋ kala kɔ ȧsuma tɔŋ, aŋ kera kɔ tǝ kǝtaŋ kɔ ka akǝnt kǝpǝŋkinɛ.

³²Maŋ wur-e, aŋ nənk ulaŋgba ka ro Sirini, a bont kɔ Saymɔn. Kɔnɔ aŋ fɔs kȧmȧ ɔ gbanɛ akǝnt kɔŋ kǝpǝŋkinɛ.

³³Ɔwa maŋ bek ka ɔdɛr mǝ a bont Kɔlkɔtha-e, ara a tepa tǝ kǝpa, Ɔdɛr wa kǝgbɛŋkǝt-e,

³⁴aŋ sɔŋ kɔ afinika tǝ kǝmun-e, a kuluŋanɛ ma yi ɔroŋkǝth. Ma ɔ tham ma-e, ɔ selɔ hɛ sɔ mun ma.

³⁵Maŋ po tȧŋ kɔ ka akǝnt kǝpǝnkinɛ-e, aŋ yeranɛ ȧsuma tɔŋ yi kǝfȧk tǝfȧnt, kȧmȧ ȧte ɔnȧbi ɔ pa tǝ lasǝr kǝpa, Aŋ yerȧnɛ ȧsuma ta mi, ɔwa ta kafɔl kȧmi aŋ fak tǝfant.

³⁶kaŋ yirȧ aŋ kǝlȧnɛ kɔ ri.

³⁷Rokɔm ka rȧbomp rɔŋ aŋ bot mȧgbal ama tɔri ȧte a gbanthir kɔ, mǝ pa, YISƆS KƆNƆ ƆWE ƆBȦY KA AŊYUDA.

³⁸Ka a tȧŋ tȧŋ ri rǝ tǝnt tǝpǝŋkinɛ yi kɔnɔŋȧŋ, akey ŋarǝŋ, ukin ka kȧdiyɔ, ukin ka kȧmɛrɔ.

³⁹Ɔwa aŋa thas ri aŋ nals kɔ aŋ fil fil tabomp taŋ,

⁴⁰kaŋ pa, Munɔ ɔwe mǝ lǝsǝr naŋ ȧŋseth ŋa Kuru, ɔwa mǝ kȧl tǝmǝr ŋi ka mǝrei mǝsas-e, kisisnɛ. Bepi mǝ yi ɔWan ka Kuru-e, wur, mǝ thor ka akǝnt kǝpǝŋkinɛ.

⁴¹Ya pǝ yi sɔ aŋkərbomp kǝtɔŋ ka aŋfode yi aŋkarmɔkɔ yi aŋbȧki aŋ sel kɔ, aŋ pa,

⁴²Ɔ la kisis alɔm, kɛrɛ ɔ gbǝli hɛ kisisnɛ. Bepi ɔ yi ɔbȧy ka aŋIsrɛl-e, ta ɔ thor ka akǝnt kǝpǝŋkinɛ ka-ake kȧmȧ sǝ lanɛ kɔ.

⁴³Ɔ pǝlǝnɛ Kuru; ta ɔ tafi kɔ ka-ake bepi ɔ yema kɔ-e, kotȧy-e ɔ pa, Minɛ yi ɔWan ka Kuru.

⁴⁴Aŋkey sɔ aŋa a tȧŋ ka atǝnt tǝpǝŋkinɛ yi kɔnɔ aŋ kanɛ kɔ ȧsim tati sɔ.

⁴⁵Ɔwa kǝtǝp ka aŋhawa aŋa bekȧ tamthǝrukin kǝkɔ ka aŋhawa aŋa bekȧ tamthǝrɛŋanlɛ asum aŋ yi ka ȧŋthɔf bɛ.

⁴⁶Kɛrɛ mɔlɔ ma aŋhawa aŋa bekȧ tamthǝrɛŋanlɛ-e, Yisɔsȧŋ ɔ sel ɛrɔŋ lɛɔ, ɔ pa, Ila, Ila, lama sabakthani? Ȧtȧ a tepa kǝpa, Kuru ka mi, Kuru kȧmi, kɔyɛŋ mǝ tey mi-e?

⁴⁷Alɔm aŋa tǝma ri-e, maŋ tǝl ti-e, aŋ pa, Ɔlaŋgba ɔwe ɔ tela Ilaya.

⁴⁸Ka wuni kin ɔ gbukɛ ka ɔlɛmp wati, ɔ gbasi asponge, ɔ lasǝr ŋi yi afinika, kɔ bot ŋi ka kǝthȧnkɛ ɔ sɔŋ kɔ tǝ kǝmun.

⁴⁹Aŋlɔm aŋ pa, Tey thɔŋ, ta sǝ kǝli bepi Ilaya ɔ tǝ re kisis kɔ.

⁵⁰Yisɔsȧŋ ma ɔ po wurɔ sɔ rim rǝbɔli rǝkɔm-e, ɔ ternɛ.

⁵¹Kǝla, ȧŋkunkla ŋa ȧŋseth ŋa Kuru aŋ pima kǝtǝp rokɔm haŋ kǝbek roratha. Aŋthɔf aŋ yɛr, ɔwa masar mǝ gbaya,

⁵²ɔwa taboma tǝ kanthɛ, ɔwa aŋfǝm ŋa Kuru agbȧthi aŋa sa po fi aŋ yokanɛ.

⁵³Kǝdarǝŋ ka kȧyokanɛ kɔŋ-e, aŋ wur ka taboma ta ŋaŋ aŋ kɔnɛ ka kȧpet kǝsǝm, kaŋ tɔrinɛ rǝ afǝm agbȧthi.

⁵⁴Ɔkaptin yi ŋaŋ aŋa yi yi kɔnɔȧŋ aŋa bumǝr Yisɔsȧŋ, maŋ nənk kayɛr ka aŋthɔf-e yi mȧtȧy ama yɔnɛ-e, aŋ nesa ɔthasǝr aŋ pa, Tɛntɛnɛ ɔwe ɔ yi ɔWan ka Kuru.

⁵⁵Afǝm abom agbȧthi aŋ yi ri aŋa po tȧŋ Yisɔsȧŋ kǝwur ro Kalili, tǝ kǝyɔna kɔ, aŋ tǝma ɔbɔli poŋ aŋ kǝli.

⁵⁶Meri ɔwe ro Makdala ɔ yi kǝtɔŋ ka ŋaŋ yi Meriȧŋ ɔkara ka Yemǝs yi Yoses, dɛ yi ɔkara ka aŋwuth ŋa Sɛbidi.

⁵⁷Ɔwa ma rȧfɔy rǝ po bek-e, uyola ɔ wur ro Arimathia ɔ der, ȧŋes ŋɔŋ aŋ yi Yosɛf, kɔnɔ sɔ ɔ yi ukarande ka Yisɔs.

⁵⁸Ɔ kɔnɛ ka Paylet ɔ thola kabel ka Yisɔs. Ka Paylet ɔ yamari kȧmȧ a sɔŋ kɔ kɔ.

⁵⁹Ka Yosɛf ɔ gbasi kȧbel-e, ɔ rapǝr kɔ kotha kǝfera kǝgbǝraŋ,

⁶⁰kɔ bot kɔ ka kȧboma kɔŋ kǝfu ȧke a bɛs rǝ agbalaŋ, a bǝnkli ȧsar ȧbana ka kadare ka kȧboma, kɔ kɔnɛ.

⁶¹Meri ɔwe ro Makdala yi Meri ulɔm aŋ yi ri, kaŋ yirȧ aŋ lomanɛ kȧboma.

⁶²Ka rabǝth ara tand ȧŋrey ŋa kabɛnɛnɛ, aŋkərbomp kǝtɔŋ ka aŋfode ȧbana yi aŋFarisi aŋ thoŋklanɛ dɛr rɔkin ka Pailatȧŋ, aŋ pa,

⁶³Pa, sǝ kala ȧmerȧ kǝpa ɔwuni tɔns tȧy ɔwɔŋ ma ɔ yi ras ukǝli-e, ɔ pa, Kǝdarǝŋ ka mǝrei mǝsas-e i ti kȧl yokanɛ.

⁶⁴Tiyȧŋ yamari kȧmȧ a bumǝr kȧboma haŋ ȧŋrey aŋa bekȧ mǝsas, ta thani aŋkarande ŋɔŋ aŋ der tȧtȧk kȧmȧ aŋ keya kɔ, ɔwa aŋ pa ka aŋfǝm, Ɔ po yokanɛ ka rafi; ɔwa kayɛtha kǝlǝpsɔ kǝ tǝ yi kǝlǝs kǝthasi katɔtɔkɔ.

⁶⁵Ka Pailatȧŋ ɔ pa ro ŋaŋ, Nǝ ba ubumǝr. Kɔnɛ nu nǝ bȧksǝr ki nu mɔ mǝ nǝ tȧrȧ.

⁶⁶kaŋ kɔnɛ aŋ bȧksǝr kȧboma, aŋ mathlɛ aŋsar, ɔwa ȧŋbumǝr aŋ yi ri sɔ.