Read Ȧŋlemrȧnɛ Ȧfu Mathiu 28 Bible Online

Mathiu 28 - Ȧŋlemrȧnɛ Ȧfu bible

Mathiu 28

¹Mba ma aŋsabath aŋ poŋ-e, ka pǝ yema sɔk-e, ka ȧŋrey ȧtɔtɔkɔ ŋa ȧŋyik, Meri ɔwe ro Makdala yi Meriȧŋ ulɔm, aŋ der tǝ kǝkǝli kȧboma.

²Ɔwa ȧŋthɔf aŋ yɛr kǝyɛr kǝbana kotȧy-e umaleka ka Kuru ɔ thor kǝyɛfǝ ro riyana, ɔ der ɔ bǝnkli aŋsar kǝwur ka kadare, kɔ yirǝr ŋi.

³Mȧbȧlȧnɛ mɔŋ mǝ yi mɔ ɔnakthinɛ, ɛlopra yɔŋ ɛ yi ɛfera mɔ ɛpɔmpɔ.

⁴Ɔwa ta ranes ara ȧŋbumǝr aŋ ba ta atɔŋ-e aŋ yɛr yɛr, kaŋ sǝkɛ mɔ afǝm afi.

⁵Kɛrɛ ɔmaleka ɔ pa ka aŋfǝm abom, Te nu nesa, i tȧrȧ kǝpa nǝ thɛns Yisɔsȧŋ ɔwe a tȧŋ ka akǝnt kǝpǝŋkinɛ.

⁶Ɔ yi hɛ nɔ; ɔ po yokanɛ mɔ mǝ ɔ po pa. Der nɔ, kǝli ɔdɛr rǝ ɔMarki ɔ sa fǝntha.

⁷Ɔwa kɔnɛ nu lɛmp lɛmp kȧmȧ nǝ kanɛ aŋkarande ŋɔŋ kǝpa ɔ po yokanɛ ka rafi. Kǝla, ɔ tǝma nu kǝdi ro Kalili, ro mǝ nǝ nənk kɔ. Kǝla i po kanɛ nu.

⁸kaŋ kɔnɛ lɛmp lɛmp kǝyɛfǝ ka kȧboma yi rǝnes dɛ yi mǝbɔnɛ mǝbana, kaŋ gbukɛ tǝ kǝtɔri ȧrim are ka aŋkarande ŋɔŋ.

⁹Ka Yisɔs ɔ gbanɛ ŋa, ɔ pa, Kori nu-o. Kaŋ der aŋ wop ȧtȧtək tɔŋ, aŋ bȧtho kɔ.

¹⁰Ka Yisɔsȧŋ ɔ pa ro ŋaŋ, Te nu nesa; kɔ nu kanɛ aŋwɔnt mi kȧmȧ aŋ kɔ ro Kalili ro mǝ aŋ nənk mi.

¹¹Ɔwa mɔ aŋ bɔ kɔ-e, alɔm ka ȧŋbumǝr aŋ der ro pet, kaŋ kanɛ aŋkərbomp kǝtɔŋ ka aŋfode mȧtȧy bɛ ama po yɔnɛ.

¹²Ɔwa ŋaŋ-e, maŋ po thoŋklanɛ yi aŋbȧki-e, ɔwa aŋ po nǝŋkanɛ-e, aŋ sɔŋ akala agbȧthi ka aŋkurgba,

¹³aŋ kanɛ ŋa kȧmȧ aŋ pa, Aŋkarande ŋɔŋ aŋ der tȧtȧk, kaŋ keya kɔ ma sǝ dirȧ.

¹⁴Bepi ȧte tǝ bek ka ɛlǝns ya ɔgbǝka-e, sǝ tǝ thɔnthɔ kɔ kȧmȧ sǝ wurɔ nu.

¹⁵kaŋ nɔy aŋkala, kaŋ yɔ mɔ mǝ a kanɛ ŋa. Ka ȧŋpa aŋe aŋ gbanthɛnɛ kǝtɔŋ ka aŋYuda haŋ thonɔŋ.

¹⁶Kɛrɛ aŋkarande tɔfɔt ukin aŋ kɔnɛ ro Kalili ka kateŋ ȧke Yisɔsȧŋ ɔ tɔri ŋa.

¹⁷Ɔwa maŋ nənk kɔ-e, aŋ bȧtho kɔ kɛrɛ aŋlɔm aŋ sikɛ.

¹⁸Ka Yisɔsȧŋ ɔ der ɔ fɔfȧnɛ ŋa, ɔ pa, A po sɔŋ mi afɔsɔ bɛ ro riyana yi ka ȧdȧru.

¹⁹Tiyȧŋ kɔnɛ nu ka tǝbona bɛ-e, nǝ sǝki ŋa akarande, nǝ baftays ŋa ka ȧŋes ŋa ɔKas, yi aŋa ɔWan, yi aŋa ɔYina mǝsǝm;

²⁰ɔwa thǝksa ŋa tǝ kǝwop mȧtȧy bɛ ama i po yamari nu. Ɔwa minɛȧŋ i yi yi naŋȧŋ alɔkɔ o lɔkɔ, haŋ ka ɔthalnɛ wa ȧdȧru. Amina.