Read Ȧŋlemrȧnɛ Ȧfu Mathiu 4 Bible Online

Mathiu 4 - Ȧŋlemrȧnɛ Ȧfu bible

Mathiu 4

¹Ȧŋlɔkɔ ŋati ɔYina ɔ kera Yisɔsȧŋ ro wula kȧmȧ Sethani ɔ gbɔns kɔ.

²Ma ɔ po wop asum mǝrei tǝgba tǝrǝŋ pali gbɛsȧŋ, dor rǝ wop kɔ.

³Ka ɔgbɔns ɔ bek-e, ɔ pa ro ŋɔŋ, Bepi munɔ yi ɔWan ka Kuru-e, yamari kȧmȧ masar ame mǝ sǝkɛ tǝbo.

⁴Kɛrɛ Yisɔs ɔ pa, A po gbal kǝpa, Wuni ɔ ŋesǝm hɛ rǝ kǝbo gbo son, kɛrɛ rǝ rim o rim ara wur ka kasǝŋ ka Kuru.

⁵Ka Sethaniȧŋ ɔ kera kɔ ka kȧpet kǝsǝm, kɔ tǝmǝr kɔ rokɔm ka ȧŋseth ŋa Kuru, ɔ pa ro ŋɔŋ,

⁶Bepi mǝ yi ɔWan ka Kuru-e, tǝlpɛ roratha, kotȧy-e a po gbal kǝpa, Ɔ tǝ yamari aŋmȧleka ŋɔŋ ta ȧtȧ mu, Ɔwa aŋ tǝ kɛkǝr mu ka mȧta maŋ Ta thani mǝ gbuŋanɛ akatǝk ka mu rǝ ȧsar.

⁷Yisɔs ɔ pa ro ŋɔŋ, A po sɔ gbal kǝpa, Te mɛmǝr ɔMarki ɔKuru ka mu.

⁸Ka Sethaniȧŋ ɔ kera kɔ sɔ ka kǝteŋ kǝbɔli rǝkɔm, kɔ tɔri kɔ tabȧy bɛ ta ȧdȧru, yi ɛyiki yati.

⁹kɔ pa ro ŋɔŋ, I ti sɔŋ mu mayɛt ame bɛ-e bepi mǝ gbǝpsa, ɔwa mǝ bȧtho mi.

¹⁰Ka Yisɔs ɔ pa ro ŋɔŋ, Sethani, sək mi rȧŋ! kotȧy-e a po gbal kǝpa, Mǝ yi tǝ kǝbatho ɔMarki ɔKuru ka mu, ɔwa kɔnɔ gbo son mǝ mǝ yɔna.

¹¹Ka Sethaniȧŋ ɔ ter kɔ, ka aŋmȧleka aŋ der aŋ yɔna kɔ.

¹²Ma Yisɔsȧŋ ɔ tǝl kǝpa a bot Yɔnȧŋ ka ȧŋseth ŋa tǝrǝŋka-e, ɔ kɔnɛ ro Kalili.

¹³kɔ wur ro Nasarɛth, ɔ der yirȧ ro Kepaniyɔm ȧke yi ro baŋ rayɛr, ka mȧnǝnkǝra ma ro Sɛbulɔn yi Nafthalim.

¹⁴Kama tǝ lasǝr ȧte Isaya ɔnȧbi ɔ pa, kǝpa,

¹⁵Aŋthɔf ŋa ro Sɛbulɔn, yi ȧŋthɔf ŋa ro Nafthalim, Kǝbalǝr ro baŋ Yɔrdan mɔri, Ka Kalili ka tȧbona tǝlɔm,

¹⁶Aŋfǝm aŋa yirȧ ka ȧŋsum Aŋ nənk kǝwalɛ kǝbana; Ɔwa kǝwalɛ kǝ put ro ŋaŋ Aŋa yirȧ ka ɔdɛr yi ka ȧŋmumpǝl ŋa rǝfi.

¹⁷Kǝtəp ka ȧŋlɔkɔ ŋati Yisɔsȧŋ ɔ tǝp kǝtam, ɔ pa, Thupi nu kotȧy-e rȧbȧy ra ro riyana rǝ po fat.

¹⁸Ɔwa ma Yisɔsȧŋ ɔ kɔth kɔth rayɛr ka kȧbȧŋ ka ro Kalili-e ɔ nənk awɔnt aruni ŋarǝŋ, Symɔnȧŋ ɔwe a bont Pita, yi Andrɔŋ ɔwɔnt kɔŋ, aŋ bɔ fitha kǝpɛl ro baŋ, kotȧy-e aŋ yi alǝm.

¹⁹kɔ pa ro ŋaŋ, De nu tȧŋ mi, i ti yɔ nu nǝ lǝm afǝm.

²⁰Ɔlɛmp wati aŋ tey tapɛl ta naŋ, kaŋ tȧŋ kɔ.

²¹Ma ɔ wur ri-e, ɔ nənk awɔnt aruni ŋarǝŋ alɔm, Yemǝsȧŋ ɔwan ka Sɛbidi, yi ɔwɔnt kɔŋ Yɔnȧŋ, aŋ yi ro bil dɛ yi Sɛbidi ɔkas ka ŋaŋ, aŋ bɔ gbɛŋgbǝlɛ tapɛl taŋ. Kɔ tela ŋa.

²²Ɔlɛmp wati aŋ tey ȧŋbil yi ɔkas ka ŋaŋ, kaŋ tȧŋ kɔ.

²³Ka Yisɔsȧŋ ɔ kɔth ro Kalili bɛ, ɔ thǝksa ka ɛseth ɛgbanɛ, ɔ tamǝs ȧkɛra kǝfinɔ ka rȧbȧy, ɔ yeŋkǝs rǝtu o rǝtu kətɔŋ ka aŋfəm.

²⁴Ka ȧŋes ŋɔŋ aŋ gbanthɛnɛ ro Siria bɛ; kaŋ kȧrȧ ro ŋɔŋ aŋboma bɛ aŋa ba tǝtu yi ɛsɔmpanɛ ɛbaŋ ɛgbanthɛ tǝtǝp, ŋaŋ aŋa ba akǝrǝfi-o, tatuk-o, mȧthanthaŋ-o, ɔwa ɔ yeŋkǝs ŋa bɛ.

²⁵Ka suniya tǝbana tǝ tȧŋ kɔ kǝyɛfȧ ro Kalili, ro Dikapɔlis, ro Yerusalɛm, ro Yudia dɛ yi ro Yɔrdan mɔri.